1967 сыллаахха Куба тустууктара Саха сиригэр кэлэн тустубуттара. Куба тустууктарын Ю.Н.Замятин диэн Ленинград куорат маастара онно баран тренердээбит этэ. Кини бэйэтин ыйааһыныгар Советскай Союз чемпиона буола сылдьыбыт тустуук.
Куба тустууктара 3-4 сыл эрэ эрчиллибит буоланнар, ситэ сайда илик быһыылаахтара. Биһиги тустууктарбыт бары кэриэтэ хотуталаабыттара.
Роман Дмитриев, Алквиад Иванов, Петр Алексеев, Николай Захаров, Владимир Андросов утарылаһааччыларын бары кыайбыттара. Мин 63 киилэҕэ биир кубинеһы 6:0 кыайбытым.
Василий Кустуктуров киинэҕэ устубута. Ол киинэ Коркин Дмитрий Петровичка хаалбыта. Ону Чурапчы тустууктара экраҥҥа таһааран көрдөрүөхтэрэ диэн эрэнэ саныыбын.
Владимир ДАНИЛОВ,
1960 сылтан ССРС
спордун маастара.
