– Чубайс Турцияҕа күрээбит, онон эмиэ бүтүн Россияны халыыр саҥа уоруйах наада буолла.

– Тоҕо?

– Куһаҕаннык олорорбутугар аны кими буруйдуохпутуй? Бэйэбитин буруйдаабат буоллахпыт…

😂😂😂

– Дорообо! Эн тугу интэриэһиргиигин?

– Политиканы.

– Актыыбынайдык дуу, таах мээнэ дуу?

– Ол аата?

– Оттон депутаккын дуу, эбэтэр мээнэ телевизоры көрөҕүн дуу?

😂😂😂

– Коронавирус сүүрбэ сыллааҕыта саҕаламмыта!

– Ону хайдах дакаастыыгын?

– Бырабыыталыстыба өссө сүүрбэ сыллааҕыта самоизоляцияҕа барбыта.

😂😂😂

Быыбарга элбэх киһи кэлиэ диэн куттанан, быыбардыыр хамыыһыйа быыбар түмүгүн быыбар буолуо биир күн иннинэ биллэрбит.

😂😂😂

– Табаарыс, эн президент уонна правительство үлэтин өйүүгүн дуо? Санааҕын эт эрэ.

– Ээ, ол мин санаам кими интэриэһиргэтиэй. Кыра киһи буоллаҕым…

– Итинник диэмэ. Психбалыыһаҕа олус интэриэһиргииллэр. Баҕар, ойуун буолаайаҕын?

😂😂😂

– Эйигин тоҕо полициялар хаайдылар?

– Үс тылы суруйбутум иһин.

– Х.. диэн дуо?

– Суох, “эйэ” диэбитим иһин.

😂😂😂

Ынырык кутталлаах кинигэлэри суруйар Стивен Кинг аны Россияҕа бэйэтин кинигэлэрин таһаарбат үһү. Тоҕо диэтэххэ, телевизорынан көстөр сонуннарга тэҥнээтэххэ кини кинигэлэрэ оҕо остуоруйаларын курдуктар.

😂😂😂

Биллэрии: “ООО “Байылыат+” экэнэмиичэскэй кириисиһинэн сибээстээн аатын уларытта – ООО “Дьадаҥы-” диэн буолла. Кириисис буолбутугар кимиэхэ махтанаргытын билэр инигит”.

😂😂😂

Оҕо эрдэхпиттэн сааһырыахпар диэри “ыарахан кэмнэргэ” олорон кэллим. “Чэпчэки кэмнэр” ханна эрэ баалларыгар дылы.

😂😂😂

Жирик коматтан дьэ тахсыбыт. Киниэхэ сонуннары кэпсииллэр:

– Украинаҕа анал байыаннай операцияны оҥоробут, Америкаҕа атомнай буомбаны туттуохпут. Сотору сахалары Муустаах муораҕа үүрүөхпүт, саппыкыбытын Индийскэй акыйааҥҥа сууйуохпут.

– Туох даа?! Эһиги ол бырахтардыгыт дуо? Оонньоон эппитим дии, быыбарга элбэх куолаһы ылаары!

😂😂😂

– Сорох баай чиновниктар тоҕо эбэһээт кыһыл көмүс унитаз ылыналларый?

– Үрүҥ көмүстэн эмэһэлэрэ хараарар үһү.

– Ээ, оччоҕо сөп…

😂😂😂

– Дьэ эрэ, буруйданааччы! Кырдьыккын дакаастыыргар төһөнү төлүүгүн?

😂😂😂

– Эт эрэ миэхэ: тоҕо эр дьон дьахталлардааҕар үчүгэйдик астыылларый?

– Тоҕо диэтэххэ дьахтар эр киһиэхэ анаан астыыр, оттон эр киһи – бэйэтигэр.

😂😂😂

Кырдьаҕастары ытыктаа. Кинилэр эн оҥоруохтаах алҕастаргын барытын оҥорон бүтэрбиттэрэ.

😂😂😂

Корреспондент уулуссаҕа ыйыталаһар:

– Украинаҕа буола турар спецоперацияҕа хайдах сыһыаннаһаҕын?

– Куһаҕаннык.

– Байыаннайдар үлэлэрин биһириигин дуо?

– Суох, биһирээбэппин.

– Дьэ эрэ, ол тоҕо биһирээбэккин?

– Бытааннара бэрт!

😂😂😂

– Ити уулуссаҕа тоҕо улахан эрэ холууптар баалларый? Оттон оҕолоро ханналарый? Дьикти дии!

– Кинилэр Госдума депутаттарын курдуктар. Оҕолорун кыраныысса таһыгар иитэллэр, оттон манна аһыы уонна саахтыы эрэ кэлэллэр.

*  *  *

Похожая запись

Добавить комментарий

Ваш адрес email не будет опубликован. Обязательные поля помечены *