Кэлэйэбин мин аҕай буолан
Киэбирэр, киһиргиир дьонтон,
Киһини кэннигэр хоруотаан
Кулгуйар түктэри быһыыттан.
Вера Павловна тулаайах хаалан баран, билэр дьахтарын батыһан эдэр сааһыгар куораты булбута. Хараҕа суохтар уопсастыбаларыгар остуораһынан үлэҕэ киирбитэ. Үчүгэй үлэһит буолан, сотору кэминэн хаарбах да буоллар бэйэтэ бас билэр муннуктанан үөрэ-көтө үлэлии сылдьар.
Сыл – хонук. Дьиэтэ сунуоскаҕа баран куорат килбэйэр киинигэр биир хостоох кыбартыыра ылан олорбута иккис сыла. Тастыҥ балта кыыс Аанчык улуустан көһөн киирэн киниэхэ олорор. Эдьиийэ кэпсэтэн уопсастыбаҕа сэкиритээринэн үлэлиир. Эдьиийигэр күүс-көмө буо. Асчыта, ырааһа сүрдээх. Соторутааҕыта 18-с сааһын туолла. Үрдүк уҥуохтаах, арыы саһыл хааннаах, ыйаастыгас соҕус харахтаах, синньигэс бииллээх. Быһыы-таһаа мааны. Аанчык үрдүк үөрэххэ туттарсан архитектор буолуон баҕарар.
Ыкса ыаллара Осиповтар диэн, баай-талым ыаллар. Иккиэн урбаанынан дьарыктаналлар. Күҥҥэ көрбүт соҕотох кыыстара Ася – ыарыһах. ХИФУ-га үөрэнэр этэ да иккис куурустан академ ылан олорор, эмтэнэр. Осиповтар ыалдьыт, хоноһо бөҕөлөр. Светлана Васильевна кытаанах, чучураан дьахтар. Кыра-хара дьону сэниир, ыалларын кытта көрүстэҕинэ даҕаны дорооболоспот. Ааһан хаалар. Үрдүк сололоохтору кытта куодарыһар. Бэйэтин тэҥнээхтэрин кытта күлүү-салыы, үөрүү-көтүү бөҕө буолар.
Онтон Вера Павловналаах уу-чуумпутук, орто баайыынан иллээхтик олороллор. Аанчык үрдүк үөрэххэ докумуонун туттаран, консультацияҕа сылдьар, библиотекаҕа дьарыктанар.
Арай биирдэ эрдэ бүтэн дьиэтигэр кэлэн иһэн оҕо былаһааккатыгар ханнык эрэ кыыс охто сытарын көрдө. Сүүрэн тиийэн көрбүтэ ыалларын кыыстара Ася эбит. Туруора сатаата да, кыайбата. Биир уол ааһан иһэрин көрөн: “Тохтоо, баһаалыста”, – диэтэ. Уол улгумнук кэлэн көмөлөһөн, иккиэн өйөөн кыыһы ыскамыайкаҕа олортулар. Түргэнник суһал көмөнү ыҥыран балыыһаҕа илтилэр. Ася балыыһаҕа тиийэн укуол эҥин ылан арыый ама буолла.
Сырылатан-сырбатан куйаас күннэр тураллар. Ася дабылыанньата тахсан, мэйиитэ эргийэн охтубут. Хата тута Аанчык кэлэн быыһаабыт. Кыыс ийэтигэр эрийэн балыыһаҕа киирбитин эттэ. Сотору соҕус Светлана Васильевна аҕылаан-мэҥилээн тиийэн кэллэ. Аанчык быыһаабытын билэн кыыска биэс тыһыынчаны биэрдэ, махталын биллэрдэ.
Уонча хонон баран Ася балыыһаттан таҕыста. Киэһэ аһыы олордохторуна Светлана Васильевна улахан торт тутан, күлэн-үөрэн киирдэ…
Ити түгэнтэн билсиһэн-бодоруһан, кыргыттар дьүөгэлии буоллулар. Светлана Васильевна саҥа табаар аҕаллаҕына анаан-минээн Аанчыкка тугу эмэ биэрэр буолла. Кыргыттар былааннара үгүс. Олоххо киирдэр ханнык.
“Киһи киһитэ кини” дэтэр,
Ытыктанар үчүгэй.
Олох саҥа аартыгын тэлэр
Ол дьэ чахчы үчүгэй.
Харыстаана КАРДАШЕВСКАЯ.
