Ленин өйдөбүнньүгүн суох гына сатыыллар. Тоҕо диэтэххэ кини дьыалата барыта норуот туһугар. Үөрэҕи, эмтэнэри босхо диэн уураах таһаарбытын уонна баай-дьадаҥы диэн арахсыбакка киһи бырааба тэҥ буоларын иһин. Көннөрү үлэһит норуоту өрө тардарын, тойон хамнаһын мээнэ чорбоппотун иһин. Ленин аатын хараардаллар.
Оттон Санкт-Петербурга муостаны Хадырап аатынан ааттаары гыналлар. Кини Арассыыйаҕа туох үтүөнү оҥорбутай? Питер дьоно миbтиҥҥэ тахсаннар: «Блокада кэмигэр 150 оҕону хоргуйууттан быыһаабыт дьахтар аатынан муостаны ааттыаҕыҥ», – дииллэр. Суох, биһиэннэрэ төттөрүтүн өлөрүөхсүт аатын биэрээри гыналлар.
* * *
Сэтинньи сэттис күнүн бырааһынньыгын ылан бырахпыттара. 1612 сыллаахха Москубаҕа нууччалар поляктары кытта охсуспуттар. Ону сорох нууччалар билбэттэр. Путин Өктөөп өрөбөлүүссүйэтин күнүн ылан быраҕан баран, хаһан эрэ нууччалар Москубаттан поляктары кырбаан куоттарбыт күннэрин » Народное единство» диэн ааттаан киллэрбит.
Ханнааҕы норуотун сомоҕолоһуутун күнүн этэрэ буолла. Наай гыннар норуот сомоҕолоһон, миитиҥҥэ тахсан санаатын этээри гыннаҕына дубинканан кырбаан куоттартыыллар. Оччотугар ону эмиэ эмиэ бырааһынньыкка киллэриэҕиҥ. “Народное единство” диир уонна норуот түмүстэҕинэ бункерыгар саһан хаалар.
* * *
Арассыыйа олохтоохторун, биһигини, көмүскүүр армиябыт апыссыардара, саллааттара Күрүөмүл дьонун көмүскүүр росгвардиялардааҕар аҕыйах хамнаһы ылар эбиттэр.
* * *
Былыр дьон мааскалаах бандьыыттартан куттанар буоллахтарына, билигин кааскалаах росгвардиялартан куттаналлар.
* * *
Ньиэмэстэри сэриилээн кыайбыппыт. Хотторбут ньиэмэс сэриитин бэтэрээнэ кыайбыт-хоппут сэбиэскэй бэтэрээннээҕэр икки бүк элбэх пиэнсийэни ылар.
* * *
Снайпер Кульбертиновка тыыннааҕар дьоруойу биэрбэтэхтэрэ. Атын да бэтэрээннэр тиксибэтэхтэрэ. Билигин нолуогабай эҥин дьахталлара – генераллар, түөстэрэ толору мэтээл, уордьан бөҕө. Уонна оборонабыт миниистирэ аармыйаҕа да сулууспалаабатах.
* * *
Оруобуна хоруона дьаҥ кэлиэн иннинэ солотуулаах төбөлөөх Солодов Саха сирин быраастарын, балыыһаларын көҕүрэппитэ. Биһиэнэ барыта төттөрү буолан иһэр. Ол кэннэ Солодов мантан баран, балыгынан аһаан олорор камчаткалар муораларын химикатынан сүһүрдэн балык бөҕөнү өлөрбүтэ.
* * *
Саха сиригэр ковид айдаана. Уонна аан дойду омугун аҕалан кик-бокса тэрийэллэр, ханна эрэ туста бараллар. Дьон курортары кэрийэллэр. Ааммыт тэлэччи аһаҕас. Биһиэнэ барыта төттөрү.
* * *
Саха сиригэр чохпутун хостууллар. Уонна ханна тымныы сиргэ, бэйэбитигэр, мөлтөх шлакообразнай чоҕу карьер бөҕүн-саҕын холбуу биэрэллэр. Онтон ичигэс дойдуга, Москубанан эҥин үчүгэй, суос биэрэр чохпутун онно ыыталлар.
* * *
Гааспытын Кытайга ыыттылар. Кинилэргэ төлөбүрэ чэпчэки, бэйэбитигэр ыарахан.
* * *
Сөмөлүөтүнэн Москубаҕа көтөрдөөҕөр хоту улууска көтөрбүт ыарахан. Түҥнэстигэстэр киэннэрэ барыта түҥнэри!
Родион ДАНИЛОВ
-Ородьумаан.
