Аан дойду араас муннугар элбэх киһи олорор, кинилэр күҥҥэ хаста да аһаатахтарына сатанар. Аһа суох кыайан олорбот буоллаҕыҥ. Омук-омук араастык аһаан-сиэн олорор. Бүгүн ким ханнык аһы аһыырын, биир нэдиэлэҕэ араас дойду дьоно төһө элбэх харчыны тутталларын туһунан кэпсэтиэҕиҥ.
Манна нэдэлэтээҕи ас сыанатын суруйдубут. Ону ыйга таһаарыаххытын баҕардаххытына 4,5-кэ (түөрт аҥаарга) төгүллүүгүт, оччоҕуна аска ыйдааҕы ороскуоттара тахсан кэлиэ.
Германияҕа биир нэдиэлэҕэ түөрт киһи аһылыгын сыаната 500 доллар, ол аата 38 тыһыынча солкуобай. Ньиэмэстэр тугу аһыылларый? Сөбүлүүр астара: ыһаарыламмыт лууктаах хортуоппуй, бекон, селёдка, ыһаарыламмыт сымыыттаах уонна сырдаах лапса, пицца, ванильнай пудинг, эт, килиэп, араас алкогольнай уонна безалкогольнай утахтар.
Люксембурга түөрт киһи нэдиэлэҕэ аска 465 доллары туттар, ол аата 35 аҥаар тыһыынча солкуобай. Сөбүлүүр астара: креветкалаах пицца, виннай соустаах куурусса, турецкэй кебаб, маҕаһыын утахтара уонна фрукталар.
Францияҕа түөрт киһи нэдиэлэҕэ 419 доллары туттар – 32 тыһыынча солкуобай. Французтар тугу сииллэрий? Сөбүлүүр астара: карбонара макарон, абрикосовай пирог, фабричнай астар уонна фрукталар.
Австралияҕа нэдиэлэҕэ сэттэ киһиэхэ ас уопсай сыаната 376 доллар, ол аата 28 тыһыынча солкуобай. Австралия дьиэ кэргэнин сөбүлүүр астара: австралийскай персиктэр, пирог, йогурт, эт, маҕаһыын утахтара, рафинированнай бородуукталар уонна фрукталар.
Канадаҕа нэдиэлэҕэ биэс киһиэхэ аска 345 доллар туттуллар – 26 тыһыынча солкуобай. Канадецтар тугу аһыылларый: нарвал уонна үрүҥ эһэ эттэрэ, сырдаах пицца, арбуз, балыктар, оҕуруот астара уонна фабричнай бородуукталар.
Америкаҕа нэдиэлэҕэ түөрт киһи 341 долларга аһыыр, ол аата 26 тыһыынча солкуобай. Американскай дьиэ кэргэн сөбүлүүр аһа: спагетти, хортуоппуй, кунжуттаах куурусса, чипсы, пицца, рафинированнай эт, эттэн оҥоһуллубут полуфабрикаттар уонна маҕаһыын утахтара.
Японияҕа түөрт киһиэхэ 317 доллар буолар. Биһиги сыанабытынан – 24 тыһыынча солкуобай. Тугу сииллэрий? Дьоппуоннар сөбүлүүр астара: сашими балыктан оҥоһуллубут бүлүүдэлэр, фрукталар, пирожнайдар, чипсы, соустар, араас балыктар уонна да атын специфическэй японскай астар.
Гренландияҕа нэдиэлэҕэ биэс киһи аһын сыаната 277 доллар, ол аата 21 тыһыынча. Гренландскай дьиэ кэргэн сөбүлүүр астара: үрүҥ эһэ уонна нарвал эттэрэ (канадецтар курдук), тушёнай тюленина, араас эттэр уонна фабричнай бородуукталар.
Италияҕа нэдиэлэҕэ биэс киһи 260 долларга, солкуобайга таһаардахха 19 тыһыынчаҕа аһыыллар. Итальянецтар сөбүлүүр астара: балык, тоҥ балыктан оҥоһуллубут палочка, паста (спагетти уонна макарон), рагу, хот-дог, фрукталар, килиэп, кэнсиэрбэ уонна маҕаһыын утахтара.
Великобританияҕа нэдиэлэтээҕи ас түөрт киһиэхэ 253 доллар – 19 тыһыынча солкуобай. Британецтар тугу сиир эбиттэрий? Сөбүлүүр астара: авокадо, майонезтаах бутерброд, креветка миинэ, сливкалаах шоколаднай торт, шоколаднай батончиктар, рафинированнай ас уонна оҕуруот аһа.
Кувейтка нэдиэлэҕэ 221 долларга аҕыс киһи аһыыр, ол эбэтэр 17 тыһыынча солкуобайга. Кувейтан сылдьар дьиэ кэргэн сөбүлүүр астара: басмати диэн ириистээх куурусса, фрукталар, оҕуруот аһа уонна сымыыт.
Чэ, мантан антах доллара суох тута солкуобайынан суруйуоҕуҥ.
Мексикаҕа нэдиэлэҕэ биэс киһи 14 тыһыынча солкуобайга аһыыр. Мексиканецтар таптаан сиир астара: биллэн турар пицца, салгыы краб, паста (макарон), куурусса, фрукталар, килиэп уонна олус элбэх “Кока-кола” уонна пиибэ иһэр эбиттэр.
Кытайга түөрт киһиэхэ нэдиэлэтээҕи ас сыаната 12 тыһыынча солкуобай. Кытай дьоно сөбүлүүр астара: кисло-сладкай соустаах ыһаарыламмыт сибиинньэ этэ, фрукталар, оҕуруот аһа, эттэр уонна да атын рафинированнай ас.
Польшаҕа биэс киһиэхэ нэдиэлэтээҕи астарын сыаната 11 аҥаар тыһыынча солкуобай буолар. Поляктар тугу сөбүлээн аһыыр эбиттэрий? Моркуоптаах сибиинньэ атаҕа (буута), сельдерейдээх уонна пастернактаах бүлүүдэлэр, араас оҕуруот аһа, фрукталар, шоколаднай батончиктар уо.д.а.
Турцияҕа алта киһиэхэ нэдиэлэтээҕи аска 11 тыһыынча солкуобай барар. Туроктар дьиэ кэргэннэрин сөбүлүүр астара: “Melahat” диэн воздушнай бичиэнньэ, килиэп, оҕуруот аһа, фрукталар уонна араас бородуукталар.
Гватемалаҕа сэттэ киһи нэдиэлэҕэ 5 аҥаар тыһыынча солкуобайга аһыан сөп эбит. Гватемалецтар сөбүлүүр астара: тушёнай турецкай индейка, бараан миинэ, оҕуруот аһа, куруппалар уонна фрукталар.
Египеккэ сыалай 12 киһи нэдиэлэтээҕи аһын сууммата – 5 тыһыынча солкуобай. Сөбүлүүр астара: окралаах (үүнээйи) баранина, эттэр, оҕуруот аһа уонна фрукталар.
Монголияҕа түөрт киһи нэдиэлэтээҕи аһын сыаната үс тыһыынча солкуобай. Монголлар таптыыр астара: баранинаттан пельмень, эттэр, сымыыт, килиэп, оҕуруот аһа.
Индияҕа нэдиэлэҕэ түөрт киһи аһыырыгар үс тыһыынча барар. Индия дьиэ кэргэнин сөбүлүүр астара: рисовай хлопья, оҕуруот аһа уонна фрукталар.
Малига 15 киһи нэдиэлэтээҕи аһылыгын сыаната икки тыһыынча солкуобай. Малиецтар сөбүлүүр астара: ириистэн оҥоһуллубут семейнэй бүлүүдэлэр, куруппа уонна оҕуруот аһа.
Бутаҥҥа сыалай 13 киһиэхэ нэдиэлэтээҕи ас сыаната баара-суоҕа түөрт мөһөөх буолар. Бутан дьоно тугу аһыыр эбиттэрий? Сөбүлүүр астара: тэллэй, сыр, сибиинньэ этэ, оҕуруот аһа уонна фрукталар.
Саамай кыра ороскуоттаах Чад диэн дойду эбит. Онно алта киһиэхэ нэдиэлэтээҕи ас сыаната 1 доллар 23 цент буолар эбит. Биһиги солкуобайбытынан биир даҕаны мөһөөххө тиийбэт, ол аата баара-суоҕа 93,5 солкуобай буолар. Чадецтэр тугу аһыылларый? Сөбүлүүр астара: сибиэһэй бараан этиттэн оҥоһуллубут миин уонна куруппалар.
Инньэ гынан, саамай тоттук уонна араас элбэх аһы Германия, Америка уо.д.а. улахан дойду дьоно аһыыр эбиттэр. Оттон кыра дойдуларга, холобур Чад курдуктарга, олус аҕыйах суумалаахха аһыыллар. Сүрүнэ диэн – тыыннаахтар, ааһа баран хата кимнээҕэр төрүүллэр-ууһууллар.
Бэлэмнээтэ Дмитрий СИВЦЕВ.
