Саха норуота айылҕа оҕолоро буоларбыт быһыытынан Үөһээ Айыыларга, сир дойду иччилэригэр сүгүрүйэбит уонна тугу барытын тыыннааҕымсытан көрөбүт. Бу курдук кыылларга, көтөрдөргө сүгүрүйэрбит эмиэ мээнэҕэ буолбатах.
Холобур, биир саамай ытыгыланар сүгүрүйэр көтөрбүт кыталык буолар. Кыталыгы өбүгэлэрбит олус ытыктыыр буолан Көтөр кыыл диэн ааттаабыттар. Олоҥхоттон, остуоруйалартан ылан көрдөххө Үрүҥ Аар Тойон саамай тапталлаах кыра кыыһын кыталык кыылга кубулутан орто дойду дьонун көрө-истэ, харыстыы, дьолу түстүү сырыт диэн ыыппыт.
Кыталыгы атыннык дьолу аҕалар кыыл диэн эмиэ этэрбит мээнэҕэ буолбатах. Бу олоххо олоҕурбут норуот кэпсээннэриттэн ыллахха кыталыктар үҥкүүлэрин көрбүт, кыҥкыр-лыҥкыр ырыаларын истибит киһи дьоллоох буолар дииллэр. Икки атаҕынан хаампат оҕо кыталыктар үҥкүүлэрин көрөн баран ол ыарыытыттан босхоломмутун туһунан номохтор эмиэ бааллар.
Биир түмсүү буолаҥҥыт иллээх олоххо олороҥҥут, уйгу-быйаҥ олоҕор Аар Айылҕаттан көмө көрдөһөн, үс саханы үөскэтэн, түөрт саханы төрөтөн, илии-илииттэн ылсан, үүнэн-сайдан биир кэлимсэҕэ турарбытыгар анаан ыытыллыбыт.
Бу орто дойдуга олорорго анаан, хара дьайга сыстыбакка, сырдыгынан сыдьаайаҥҥыт инники кэскилгитин, Үрүҥ Айыылартан көрдөһөҥҥүт, сырдык ааҥҥытын арыйан биэрэллэригэр күүс көмө гына ыыппыттар.
Сиргитин-баайгытын бэйэҕитигэр илдьэ хааларгытыгар анаан, чөл олоххо олороргутугар, төрүөхтээх оҕону төрөтөҥҥүт, илиигит иһинэн илдьэ сылдьаҥҥыт, бу сахабыт дэнэҥҥит Үрдүкүлэртэн көмө көрдөһөн үөһээттэн үөһээ тахсан иһэрбитигэр анаан ыытыллыбыт.
Кылбаа маҥан кыталыктар Аар Айылҕа маанылаах көтөрдөрө. Сирдээҕи дьоҥҥо үтүөнү, сырдыгы кэрэhэлээн орто туруу бараан дойдуга көмөлтө буолан түстэхтэрэ.
Кыталык алгыhа
Аҕыс иилээх-саҕалаах,
Айыы тыына доҕуһуоллаах,
Аан ийэ дойдуга!
Айыы аймаҕа үөскүөҕүттэн
Үтүөкэннээх Үрүҥ Аар Тойоммут,
Кыҥкыр-лыҥкыр ырыалаах,
Кынталдьыйар үҥкүүлээх,
Тапталлаах Кыталык кыысчаанын
Күн уруу дьонугар
Сылаас хараҕынан көрөн,
Сымнаҕас быһыытынан билгэлээн,
Үрүҥ тыыннарын
Өллөйдөөтүн диэн!
Хара тыыннарын
Харыһыйдын диэн!
Айыы кыыла оҥорон
Орто дойдуга ыыппыта.
Үрүҥ күнтэн көнтөстөөх,
Айыы дьоно буоламмыт
Үөрэбит-көтөбүт!
Ылынабыт!
Сүгүрүйэбит!
Ольга ПОПОВА.
