Саас кэлиэ
Күн үрдээн мичиҥниэ,
Дьиримнии тыгыаҕа,
Халыҥ хаар оччоҕо
Быһыта сиэһиэҕэ.
Туллуктар кэлэннэр
Саас иһэр диэхтэрэ,
Тураахпыт дааҕырҕаан
Сонунун кэпсиэҕэ.
Харалдьык тахсыаҕа,
Ньургуһун тыллыаҕа,
Үрүйэ сүүрдүөҕэ –
Дьэргэлгэн оонньуоҕа.
Күөх халлаан күөнүгэр
Күөрэгэй дьирилиэ,
Хатыҥнаах кэриибэр
Кэҕэ кыыл чоргуйуо.
Алааһым күөлүгэр
Үөр куспут айманыа,
Дурдатын иһигэр
Сааһыт уол кирийиэ.
Мутукча тыллыаҕа,
Сибэкки ситиэҕэ,
Күөх тыабыт салгына
Эриэккэс сыттаныа.
Ол кэми биһиги
Уруйдуу көрсүөхпүт,
Күн тахсар суһумун
Кэрэхсии көрүөхпүт.
Сахабыт сиригэр
Саас кэлэн сандаарыа,
Сахабыт аймаҕар
Саргыбыт салаллыа!
Кыыс оҕо барахсан
Кыыс оҕо барахсан,
Айылҕа эйигин айбыта
Тулуурдаах, уйаҕас дууһалаан,
Олоҕу, кэрэни салгыырга.
Тоҕус ый устата
Сүрэҕиҥ анныгар бигээҥҥин,
Күн сирин көрдөрөр баҕаттан
Биэбэйгин эн илдьэ сылдьыаҕыҥ.
Бу кыра киһини
Күн сирин көрдөрөр
Күүтүүлээх ол күҥҥэр
Хайдахтаах ыарыыны тулуйуоҥ.
Ол эрэн барыта төлөнүө
Кырачаан, эн оҕоҥ биэбэйиҥ
Бастакы бэбээрбит тылынан,
Күнчээниҥ минньигэс сытынан.
Аан бастаан эмиийиҥ чопчутун
Уоһунан даҕайбыт кэмигэр,
Бастакы хардыыны оҥорон,
«Ийээ» диэн саҥарбыт күнүгэр.
Бу сиргэ этиллэр
Кэрэттэн кэрэкий тылынан
«Ийэ» диэн ааттанан,
Күннэтэ биэбэйдиэҥ оҕоҕун.
Эмиийиҥ үүтүнэн эмсэхтээн,
Тапталыҥ уотунан угуттаан,
Чыычааҕыҥ күн ахсын улаатыа,
Борбуйун сотору көтөҕүө.
Ийэ, күн ийэ барахсан
Уйалаах чыычааҕы санатан,
Дьиэ кэргэн туһугар
Түбүгүҥ күннэтэ үксүөҕэ.
Кыыс оҕо барахсан,
Айылҕа эйигин айбыта
Тулуурдаах, уйаҕас дууһалаан
Олоҕу, кэрэни салгыырга.
* * *
Мин кырасаабыссам
Мин отой кырасаабысса көссүүлээхпин. Ону ыл, маны ылан кулу диирэ элбэх. Ылан биэрдэҕим аайы аппетита өссө улаатан иһэр. Аны, хаһыс чыыһылаҕа хамнаһым, пенсиям кэлэрин бэйэбинээҕэр ордук билэр.
Күһүн сабыс-саҥа, сымнаҕас баҕайы, сыаналаах унтуу Владиктан аҕалан бэлэхтээбитим. Көрүҥүн тупсарынарыгар кырааска ылан биэрбитим. Үлэҕэр киирэн өр буоллаххына тоҥорум бэрт диэбитигэр, шуба бэлэхтээбитим, «Наташа» диэн. Таҥаһым эргэ диэбитигэр сыаналаах кожа ылан биэрбитим. Ачыкым кырыарар диэбитигэр хос таас ылан биэрбитим, үчүгэй сиэркилэтэ атыылас диэбитигэр үс сабыс-саҥа кылабачыйа сылдьар, кэннэ хромированнай сиэркилэ бэлэхтээбитим.
Аны музыка наада диэбитигэр “М-Видеоттан” хаачыстыбалаах, отой кэнники модель радиомагнитофон ылан бэлэхтээбитим. Үчүгэй хаачыстыбалаах бэргэһэ диэбитигэр «Экспертэн» бэргэһэ ылан биэрбитим, онтун көрүнэригэр кирилиэс биэрбитим.
Аны арыы диэн, ас диэн сыаналааҕа наада, утаҕа эмиэ кыһыл буолуохтаах. Чэ уонна уос-тиис кырааската, французскай духуу эҥин диэннэри бэлэхтээбитим элбэх буоллаҕа. Өссө сайын кэтэригэр японскай сапожка бэлэхтээбитим.
Онтум аата “Ноашка” диэн. Ээ, бэйэбиттэн отут сыл балыс, 21-дээх. Эмээхсиним отой сиэх курдук, биир да харчыны көрдөрбөккүн, барытын көссүүгэр барыыгын диир…
Абаҕан.
