Доллар61.26 Евро72.24
+18 °С

Тыыннаах буоларга – тэҥ быраап

10:27 в 11.04.20180 9

Ааспыт 2017 сыл бүтэһигэр хаһыаттарга Ил Түмэн дьокутаатын көҕүлээһининэн хаайыы (түрмэ) аһа балыыһа аһыттан ордугун туһунан балай эмэ киэҥ, сытыы мөккүөр, араас суруйуулар тахса сылдьыбыттара, араас санаа этиллибитэ.

Чэ, буоллун, билиҥҥи олохпут элбэх очурун-чочурун туһунан үгүһү, арааһы этиэххэ, суруйуохха сөп. Тус бэйэм, ааспыт сыл икки ыйын балыыһаларга атаарбыт киһи, балыыһа аһын көмүскүүбүн. Кырдьык, хаайыы аһын амсайбатаҕым, онон тэҥниир кыаҕым суох. Ол эрээри бу олохпор ол дойду аһын боруобалаабатах киһи диэн баҕалаахпын. Балыыһа аһыгар төнүннэххэ, сорохтор баҕар балыыһаҕа киирдэхтэринэ олохторун таһыма үрдүгэ бэрт буолан ресторан, кафе аһын ирдииллэрэ буолуо.

Оттон миэхэ, талымаһа суох, үлэлээбэт пенсионерга балыыһа да аһа сөрү-сөп буолар. Быһата тотобун, амтана да минньигэс.

Сааһым тухары балыыһа аһа мөлтөҕүттэн бэргээбит, үтүөрбэтэх, бэттэх кэлбэтэх ыарыһаҕы истэ иликпин. Кырдьык, балыыһа аһыгар эбинэр, дьиэлэртэн ас аҕалтарар ыарыһахтар бааллар, ол хас биирдии киһи бэйэтин бырааба, көҥүлэ, көрдөбүлэ буоллаҕа.

Бу туһунан биир дойдулааҕым, биллэр мелодист, ырыаһыт, суруналыыс Владимир Индигирскэй хаһыакка саамай сөпкө суруйбута, интервью биэрбитэ. Онуоха кыттыһан туран, балыыһа аһын туһунан үрдүк таһымҥа айдаан таһаарар туох да төрүөт суох дии саныыбын.

Бюджекка тыырыллыбытыгар олоҕуран, араас тустаах специалистар кыттыыларынан оҥоһуллубут, бэрэбиэркэлэнэр күннээҕи ас нуормата баар. Онтон быстах кыһалҕалар, түгэннэр этэллэринии үлэ бэрээдэгинэн быһаарыллыахтара турдаҕа.

Хата ол оннугар ас көрдөөн бөх дьааһыктарын хаһар, дьиэлэр техэтээстэригэр, подъезтарыгар, сылаас турбаларга хонор дьон олохторун, кыһалҕаларын тустарынан саамай үрдүк таһымҥа айдаан тардар кэм кэллэ. Бу – омуннааһына суох иэдээннээх проблема буолла. Дьокутаат бу сытыы боппуруоһу дьон дьүүлүгэр көтөхпүтэ буоллар үөрүөм, хайгыам, өйүөм эбитэ буолуо.

Ити бомж диэн ааттааччыларбыт, эмиэ биһиги барыбыт курдук, хаһан эрэ кус сыгынньах бу орто дойдуга кэлбиттэрин марылаччы ытаан биллэрэн, ийэттэн күн сирин көрдөхтөрө.

Бары араас дьылҕалаахпыт… Ол эрээри бука бары тыыннаах буоларга тэбис-тэҥ бырааптаахпыт. Судаарыстыбалар уонна аан дойду таһымнарыгар ол сокуонунан мэктиэлэнэр эрээри, хомойуох иһин, ити биһиэхэ тутуһуллара, олоххо киирэрэ ыраах быһыылаах.

Харахпытын киэҥник арыйан тулабытын көрүнүөҕүҥ эрэ… Ыраата барбакка, биһиги Дьокуускайбытыгар төһөлөөх элбэх киһи маннык дьылҕаланна? Бу күннэтэ көстөр хартыына буолла.

2018 сылга араас таһымнаах элбэх быыбардар буолаары тураллар. Судаарыстыба үрдүкү дуоһунаһыгар дураһыйааччылартан, дьокутаат мандаатын иһин охсуһааччылартан ким эмэ бу проблеманы күүстээхтик, аһаҕастык этиэ, хорсуннук, сорунуулаахтык ону быһаарарга ылсыа дуо?

Олох араас кыһалҕаларын була сатаан көтөхпөккө, быыбар чугаһаабытыгар онон бэйэ баарын биллэрэ сатаабакка, үгүстэр тыыннаах буолар туһугар күннэтэ көрсөр кыһалҕаларын быһаарарга бары таһымҥа ылсар уолдьаста.

 

Николай РЕБРОВ,

суруналыыс, үлэ бэтэрээнэ.

Дьокуускай.

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
2 + 0 =
Solve this simple math problem and enter the result. E.g. for 1+3, enter 4.