Доллар58.9 Евро69.43
-35 °С

Түмсүүлээх буолуоҕуҥ

16:48 в 23.03.20170 13

«Туймаада» хаһыат бар дьон көҥүл хаһыата дэнэрэ отой сөп эбит. Дьон өйө-санаата биир буолбатах. Ким эрэ үчүгэйдик, кыахтаахтык олорор, оттон ким эрэ олоҕор сатаммат, тиийиммэт-түгэммэт, оҕолорун иннин санаан долгуйар, кимтэн эрэ хомойор.

Ырыынак олоҕо кэлэн, онуоха эбии кризис буолан, сатаан дьаһаммат киһиэхэ ыарахан кэм кэллэҕэ. Ол иһин буолуо «Туймаада» хаһыакка билиҥҥи олоҕу кириитикэлээн, таарыйа салайааччылары хаарыйан, эмиэ да сөптөөх курдугу, эмиэ да соччото суоҕу, сороҕор онно суоҕу суруйуулара элбэхтик бэчээттэнэллэр. Ол гынан баран барыта куһаҕан буолбатах. Холобура, Томпо Мэҥэ-Алдантан ССРС үөрэҕин туйгуна, РСФСР үтүөлээх учуутала Пантелеймон Дарбасов «Ил дархан үлэтин хайгыыбын» диэн суруйуутун аахтым уонна сэргээтим. Кырдьык кини этэрин курдук тутуу бөҕө барда. Оскуолалар, балыыһалар, уһуйааннар, спорт саалалара (үксэ таас тутуулар), ону таһынан элбэх этээстээх дьон олорор дьиэлэрэ куораттарга эрэ буолбакка, улуус кииннэригэр эмиэ тутулуннулар. Егор Афанасьевич норуоту кытары кэпсэтэрин, бары боппуруостарга астыктык эппиэттиирин, тыа хаһаайыстыбатыгар эмиэ кырата суох болҕомто уурарын Пантелеймон Дарбасов кырдьыктаахтык суруйбут. Үрдүк үөрэхтээх, үтүөлээх учуутал, олоҕу олорбут кырдьаҕас ил дархан үлэтин-хамнаһын ырыҥалаан көрөн биллэҕэ. Мин эмиэ манна кыттыһабын.

Сорохтор В.Путин уонна Д.Медведев олигархтар тустарыгар үлэлииллэр диэн агитациялыыллар. Биир бэйэм маннык дииллэрин саарбахтыыбын. Тоҕо диэтэххэ Путиннаах Медведев олигархтары үөскэпптэхтэрэ. Бу Борис Ельцин оҥорбут дьыалата. 90 сылларга үспүкүлээннээһин, бандьыыттааһын, коммерсаннары бултаһыы, сороҕор өлөрүү, ыһыллыы-тоҕуллуу, бэргэһэни устуу, кими эрэ кырбааһын, ыгыы-түүрүү, оскуола оҕолоругар тиийэ «мафия» диэн тыл тарҕаныыта, «каратэ» диэн охсуунан оҕо тэбиэлэһэ сылдьыбыта мэлдьэх буолбатах. Маннык кырыктаах олоххо оҕолорбут дьылҕаларын санаан, долгуйан, сүрэх ыарыһах буолан эрдэхпитинэ В.Путин былааска кэлэн, бытааннык да буоллар бэрээдэктэнэн, олохпут тупсан барбыта. Билигин оптуобуска эдэр оҕолор кырдьаҕастарга миэстэ туран биэрэллэр. Суолу туоруурга, кирилиэһи тахсарга кыамматтарга көмөлөһөллөр. Үөрэххэ, үлэҕэ үөрэнээччилэрбит, студеннарбыт Россияҕа бастыҥнар кэккэлэригэр сылдьаллар. Ырыаны-үҥкүүнү киһи этэ да барбат, үксүлэрэ лауреаттар.

Ленскэй оройуонуттан Владимир Бурцев итэҕэтиилээхтик баары баарынан суруйарын эмиэ кэрэхсээтим. Кини этэр: «Сэбиэскэй былаас эстибитигэр маҥнайгы сылларыгар тыа сиригэр күүскэ үлэ барбыта. Сылгыны, сүөһүнү кыайан үллэстии, сир түҥэтиитэ, саҥа тэриллибит бааһынай хаһаайыстыбаларга чэпчэтиилээх кредиттэр уонна да атын үлэлэр ыытыллыбыттар. Ол саҕана мин дэриэбинэҕэ олордохпуна, ыал барыта кэтэх хаһаайыстыбаламмыта. Бэйэ үүтүн, этин, оҕуруотун аһын манна эбии айылҕа бэлэҕин арааһынай отоннору, тэллэйи эбинэн үчүгэйдик да аһыы сылдьыбыппыт. Маҕаһыынтан килиэп, туус, саахар эрэ ыларбыт. Билигин саҥа хотоннор механизированнай үлэҕэ киирдилэр, техника арааһын түҥэттилэр. Олохтоох нэһилиэнньэ өйө-санаата уларыйда, кэккэ бааһынайдар кыаҕырдылар, бэйэлэрин олохтоох бородууксуйаларын атыылыы үөрэннилэр, ыаллыы уобаластарга таҕыстылар. Кырдьыгынан эттэххэ сүрэҕэ суох эрэ киһи куһаҕаннык олоруон сөп», – диэн Владимир Бурцев суруйуута эмиэ да сөпкө дылы.

«Коммунистарга тоҕо куоластаабатыҥ? Коммунситар олигархтары суох гыныахтаахтар этэ», – диэн мөҥүү былаастаан куолулуур дьон бааллар. Дьэ, ким билэр. Олигархтар күҥҥэ мөлүйүөннүү харчыны аахсар дьон бары дьиэ кэргэннэринээн Американан, Европанан дьиэлэнэн-уоттанан олороллор. Бары чааһынай самолёттаахтар, яхталаахтар, муҥура биллибэт баайдаахтар, харчылаахтар. Маннык сытыйа байбыт дьон коммунистарга эбэтэр атын дьоҥҥо баайдарын таах туран биэриэхтэрэ дуо? Кэмэ суох боевиктары, терактары, аныгы сэрии сэптэрин төһө баҕарар атыылаһан гражданскай сэрини оҥордохторуна да көҥүллэрэ. Туох баар норуот туппут социальнай дьиэлэрэ, дьон олорор квартиралара урусхалланнахтарына алдьархай буолбатах дуо?

Хаайыыга буруйу оҥорооччулар аһара элбэхтэр, баппат үлүгэрэ дииллэр. Россияҕа теракт-бардак буолар түгэнигэр, патриоттуу санаалаах эдэр дьон, омоннарбыт, полицияларбыт үгүстэрэ бирикээһинэн киин сирдэргэ «Россия, дойдубут туһугар» диэн сэриилэһэ барыахтара. Оччоҕуна күлүгээннэрбит, арыгыһыттарбыт, бомжтарбыт, педофилларбыт, хаайыыттан тахсыбыттар талбыт сирдэригэр халаан-талаан, атаҕастаан таҕыстахтарына олохпут дьэ огдолуйарыгар тиийэр. Тьфу-тьфу-тьфу, маннык эрэ буолбатын. Ол иһин Россия салайааччылара олигархтары кытары эйэлээхтик кэпсэтэн, сокуону тутуһан нолуок төлөттөрөн, быа быстыбатынан наһаа да байылыаттык буолбатар, сири бааһырдан олордохпут. Биир бэйэм баҕа санаам сэрии буолбатын диэн.

Россия тас политикатыгар өйдөөбөппүт элбэх. Аан дойду кистэлэҥ балаһыанньатын биһиги, боростуой норуот, билбэппит. Америка байыаннай сэптэрэ биһиэнин баһыйар диэни ханна эрэ аахпытым. Баҕар ол иһин Кытайы доҕордуу куустахпыт буолуо. Онтон Кытай хардары кууһарыгар туохтаах эрэ буоллахпытына сатанар буоллаҕа. Саха сириттэн саҕаланар «Сила Сибири» диэн далааһыннаах үлэ бара турарын бары да билэбит. Баҕар сэриитэ суох эйэлээхтик олорбуппутугар туһалыыра буолуо.

Онон биһиги Саха сирин дьоно Россия үрдүкү былаастарыгар кыттыспакка, кинилэри хомуруйбакка, бэйэбит сирбитигэр-уоппутугар баар кыһалҕалары быһаарар, ону туоратар суруйуулар бааллара ордук. Мөккүһүү баар буоллаҕына олох сайдар диэн буолар.

Кремльга да сөп-сөп быһылаан тахсар быһыылаах. Ол курдук үрдүкү дуоһунаска үлэлиир Улюкаевы В.Путин биир сыл кэтээн, бэрик ыларын билэн туттарбыт этэ. Дьэ, бу Улюкаев курдук дьон төһө баалларын билбит суох. Манан буоллаҕына саха правительствотын салайааччылара, Ил Түмэн депутаттара уонна ил дархаммыт соруктаах-сыаллаах үлэлэрин туруорсалларыгар төһө ыарахаттары көрсөллөрө буолуой? Саха сирэ салгыы сайдарын туһугар бөлөҕүнэн эмиэ баран кэпсэтэ сатыылларын өйдүөххэйиҥ. Холобура, уот тарибын чэпчэтээри уон сылы быһа тохтообокко туруорсаллар, кыайтаран быстыбат баҕайытай. Хайдах дойдуга олорорбун өйдөөбөппүн. Киһи барыта сыыһалаах. Үлэлиир дьон алҕастары оҥороллоро баар суол. Ол гынан баран ил дархаммытын Егор Афанасьевич Борисовы убаастыаҕыҥ, харыстыаҕыҥ. Түмсүүлээх буолуоҕуҥ!

 

МЭНДИЭРЭ.

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
7 + 1 =
Solve this simple math problem and enter the result. E.g. for 1+3, enter 4.