Доллар61.26 Евро72.24
+8 °С

Таатта ытык олохтооҕо Дмитрий Колесов санаатын үллэстэр

07:53 в 30.01.20180 390

TUYMAADA.RU 2018 сыл тохсунньу 30 күнэ. Таатта ытык олохтооҕо Дмитрий Колесов бүгүҥҥү тирээн турар кыһалҕалар тустарынан бэйэтин санаатын аһаҕастык үллэстэр.

Билиҥҥи олоххо социальнай өртүнэн ырааҕынан тэҥэ суох буолуу, хамнас, пенсия сирдээх халлаан курдук араастаһыыларын, сокуоннарга, экономикаҕа даҕаны сыһыаннаах мөкү көстүүлэргэ муҥатыйан, бэркиһээн, кэлэйэн суруйуулар хаһыаттарга элбэхтик тахсалларын ааҕабыт. Киин бэчээккэ эмиэ. Баларга барытыгар да буолбатар сэбиэскэй кэмҥэ курдук хардалар, бэрэбиэркэлэр, туох эрэ миэрэлэр бааллара соччо иһиллибэт ээ, таах хаалан иһэр быһыылаах.

Тыһыынчанан да ыстатыйалар, сүүһүнэн да миитиннэр, пикеттэр, демонстрациялар буоллахтарына туһааннаах чиновниктар кымаардаан да көрбөттөрө биллибитэ ыраатта. Тугу да кураанахха куолулаатыннар диэн мээнэ ымаҥнаһан, күлэн эрэ кэбиһэллэр дииллэр. Ону ыт да үрбүтүгэр холообот буоллахтарына, «собака лает – караван идёт» диэн өс хоһоонун куруук тутталлар. Сорох улахан чиновниктар баҕаларынан, модьуйууларынан хоруупсуйанан (бэригинэн), мафиянан (билсиинэн) ханнык баҕарар улахан дьыалалары оҥороллоро билиҥҥи олоххо наһаалаабыта биллэр. Сокуоннары даҕаны мэкчиргэ төбөтүн курдук хайа баҕарар өттүгэр хайыһыннараллара, киин бэчээккэ буолбут чахчыларга олоҕуран, элбэхтик суруйаллар.

Убайдарбыт онно оруобуна сөп түбэһэр өс хоһоонноохтор: «Закон как дышло – куда повернёшь, туда и вышло».

Хаһыаттарга үчүгэй ыстатыйалары куруук суруйар И.Пономарёв аахпыт-билбит дааннайдарыгар олоҕуран «Туймаадаҕа» бу саҥа суруйбутуттан көрдөххө урукку Оборона министрэ, атын да үрдүк сололоохтор элбэх миллиардынан үбү уорбуттарын, аны төрүт даҕаны миллиардынан доллары(!) бэрик ылбыт чахчыларын аахтыбыт. Интэриэһинэйэ диэн дьыалаҕа эриллибиттэрэ, сууттаммыттара биллибэт. Оччоҕуна сэрэйдэххэ дьэ манна хоруупсуйа илэ бэйэтинэн үлэлээбит эрэ буолуон сөп. Ол миллиардынан үптэн «наадалаах» дьоҥҥо сүүсчэкэ мөлүйүөнү бэрик биэрдилэр да бүттэҕэ дии. Ерунда. Все дела.

Наһаалаабыт, үүнэ-тэһиинэ суох барбыт хоруупсуйа бука хаһан да кыайтарбыта буолуо. Билигин 10% да кыайан арыллыбат дииллэр. Ханна эрэ сыһыыга-толооҥҥо күүлэйдии таарыйа ылалларын-биэрэллэрин хайдах да тохтоппот буоллахтара. Киинэлэргэ көстөрүн курдук кабинекка буолбатах буоллаҕа.

Сэбиэскэй саҕана уларыйыы-тэлэрийии иннинэ органнар ити дьыалаҕа үчүгэйдик үлэлиир быһыылаахтара. Ордук улаханнык аатыра-сураҕыра сылдьыбыт, номоххо киирбит, чиэһинэй энтузиаст-следователлэр Гдлян, Иванов этилэр. Кинилэр хоруупсуйаны төрдүттэн, силистэри-мутуктары түөрээри алдьархайдык арыйталаан Узбекистанынан уо.д.а. республикаларынан эрэ муҥурдаммакка улахан чиновниктарга Москваҕа, Кириэмилгэ тиийэн эрдэхтэринэ, уйаларыгар уу киирээри гыммытын билэн кинилэри тохтоппуттарын, туораппыттарын истибиппит.

Соторутааҕыта «Кыымҥа» биллиилээх юрист, ХИФУ профессора Октябрьскай революция 100 сылыгар анаан улахан ыстатыйата тахсыбыта. Онно кини ХНТ дааннайдарыгар олоҕуран, кэнники сылларга олохпут наһаа таҥнары барбытын дьулаан сыыппараларынан көрдөрбүтэ. Төрүт да иэдэйэн баран сылдьар эбиппит. ХНТ сыыппараларга чуолкай буоллахтара. Онтон көрдөххө Россия элбэх дойдулартан үгүс көрдөрүүлэргэ тиһэх миэстэлэргэ тэбиллибит эбит.

Оттон сахаларга улахан үтүөлээх-өҥөлөөх Ельцин эрэйдээх былааһы Путиҥҥа туттарарыгар, кэс тылын түмүктүүрүгэр «Береги Россию» диэбитин телевизорга көрбүппүт. Ону кини толорбото, кыайбата, провал буолбут. Кэлээри турар быыбарга дойду таҥнары барбытын да иһин, баайдары, олигархтары өйөөбүтүн да иһин син-биир кыайбыта эрэ баар буолуо. Буолаары буолан букатын ырааҕынан. Уопсайынан, адьас улахан аптаах киһи быһыылаах.

Маннык быһыы-майгы уһун сылларга бардар бара турара чуолкай. Общественнай-экономическай формация (систиэмэ) аны кэлэн төттөрү социализм диэки уларыйбата биллэр.

Туолбатар даҕаны мээнэ оҥорон көрөн, фантазиялаан эттэххэ арай былааска иккис Сталин кэлэр эрэ түбэлтэтигэр билиҥҥи быһыы-майгы, балаһыанньа тосту уларыйара чахчы. Кини курдук халдьаайыны саамай туруорутунан, күрүөнү саамай үрдүгүнэн сылдьыбыт уонна бил баһыттан сытыйарын букатын сөбүлээбэт киһи кэллэҕинэ үрдүкү коррупционер-чиновниктары оройдорун тоҥсуйара чахчы. Тус бэйэтин туһугар кыратык да кыһаллыбатах киһи билиҥҥи баайдары, олигархтары начаас оннуларын буллартыа этэ.

Хаалынньаҥ, сухалаах Россияны атомнай сэбилэниилээх модун социалистическай державаҕа кубулуппут, бары көрдөрүүлэргэ Американы ситэ сыспыт, икки үйэҕэ биирдэ кэлэр улуу салайааччы кэлиэ дуо? Оннук киһи Менделеев таблицатын элеменнэрэ барыта баар баһырхай потенциаллаах дойдуну аан дойдуга бастакы миэстэҕэ таһаарара саарбахтаныа суох этэ.

Дмитрий КОЛЕСОВ.

Таатта.

tuymaada.ru

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
13 + 6 =
Solve this simple math problem and enter the result. E.g. for 1+3, enter 4.