Доллар61.26 Евро72.24
+18 °С

Сыл бүтүөр диэри туох буолуой?

14:00 в 09.07.20180 77

Госдума уларыйбат депутата В.В.Жириновскай, мин өйдүүрбүнэн, В.В.Путин туох диэн баҕа санаалааҕын мэлдьи норуокка тириэрдэр идэлээх. Ол сиэринэн бу соторутааҕыта балтараа мөлүйүөн кэриҥэ тиражтаах “АиФ” хаһыакка (25-с №-гэ) “Не пора ли поправить Конституцию?” диэн төбөлөөх ыстатыйаны бэчээттэттэ. Ыстатыйа ис хоһооно Конституцияҕа уларыйыылар киирэллэрэ наада диэн. Ол курдук улуу нуучча норуота баһылыыр-көһүлүүр оруолун чорботон бэлиэтииргэ, нууччаттан атын омуктар тылларын булгуччулаахтык оскуолаҕа үөрэтэри тохтотуохха, судаарыстыбаннай тыл биир буолуохтаах – бу нуучча эрэ тыла, тус-туһунан омуктар республикаларын барыларын суох гыныахха, кинилэри барыларын нуучча губернияларыгар холботолуохха диэн.

Билигин баар 85 регион оннугар 30-40 эрэ губерния баар буолуон наада диэбит. Хаһан эрэ өрдөөҕүтэ Д.А.Медведев регионнарбыт элбэхтэрэ бэрт буолан сатаан дьаһаллыбаттар диэбиттээҕэ.

Мин толкуйбунан Саха сирин промышленнай оройуоннарын Мииринэйи Иркутскай уобалаһыгар, Алданы, Нерюнгрини Амурскай уобалаһыгар холбуохтара, хаалбыт улуустары ханна эрэ Хабаровскай кыраайга холбуохтара. Эбэтэр итиннэ майгынныыр уларытыылар баар буолуохтарын сөп. Хайа да барыйааҥҥа Саха сирэ диэн регион суох буолуо. Туспа да олороммут өнүйбүппүт көстүбэт. Сирбит баайа барыта атыыланан бүппүтэ. Ол сирбит баайын хостооһуҥҥа олохтоох дьон букатын кэриэтэ кыттыспаппыт уонна онтон ким да улаханнык долгуйара, санааргыыра көстүбэт. Быйылгы алдьархайдаах айылҕа алдьатыытыттан да өйдөммүппүт көстүбэт. Туох баар оонньуу, көр-нар быыстала суох барбыттарын курдук бара тураллар. Өйбүт-санаабыт, ычабыт көрү-нары эрэ көҕүлүттэн тутарга уһуктар быһыылаах. Атыҥҥа, холобур үлэҕэ-хамнаска, норуот быраабын сокуон ирдэбилинэн көмөлөһүннэрэн көмүскүүргэ, тарифтар быыстала суох үрдүү туралларын утаран көҥүллэммит да миитиҥҥэ кэлэн турарбытын сүрэҕэлдьиир дьонноох норуот буолабыт. Ол оннугар Туймаада ыһыаҕар икки сүүс тыһыынча дьон кытынна диэбиттэрэ. Кыра ычалаахпыт хас күннээҕи олохпутугар көстөр. Саха араадьыйата тура-тура саха дьонугар туох да сыһыана суох тиэмэлэргэ биэрии бөҕөнү ыыталлар. Холобур, күн аайы футболу ырытар идэлэннилэр, тугу эрэ ити дьыалаҕа ыйдаҥардарга дылы. Оннооҕор нууччалар бэйэлэрэ тугу да итиннэ өйдөөбөттөр быһыылаах. Өйдүүллэрэ буоллар киһилии оонньуо этилэр.

 

Юрий МЕКУМЯНОВ.

Сунтаар.

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
1 + 0 =
Solve this simple math problem and enter the result. E.g. for 1+3, enter 4.