Доллар61.26 Евро72.24
+8 °С

Саҕаланна! “Кремлёвскай дакылаат”

12:21 в 11.04.20180 37

“Туймаада” ааспыт нүөмэригэр “Санкциялар: аҕыйах хонугунан...” диэн ыстатыйаны суруйбутум. Онно АХШ Минфинэ Кремль эргимтэтин дьонугар, санкцияҕа сыһыаннаах испииһэги билиһиннэриэхтээҕин туһунан кэпсээбитим.

Ситэри нэдиэлэ ааспата, тута “Кремлёвскай дакылаат” эбэтэр “Кремлёвскай испииһэк” дэммит айдааннаах испииһэк күөрэс гына түстэ.

Бу сонун сибиэһэйэ бэрт, дьон-сэргэ ситэн-хотон өйдүүрүгэр балачча бириэмэ наада буолуо. Ол да буоллар “Туймаада” ааҕааччыларыгар биһиги син быһаарар кыахтаахпыт, тоҕо диэтэххэ баччааҥҥа диэри барыллааһыннарбыт барыта туолан иһэллэр. Эмиэ ааспыттааҕы курдук “хомойуох иһин”, дииргэ тиийэбит.

Бу “Кремлёвскай испииһэги биһиги хаһыат 10-с балаһатыгар толору бэчээттээтибит. Ааҕыҥ, билсиҥ.

АХШ Минфинэ билиҥҥитэ испииһэги эрэ таһаарда. Испииһэккэ баар дьоҥҥо тута санкциялары биллэрбэттэр, “баҕар биллэриэхпит” диэн кэлиҥҥигэ хаһааналлар.

Туох дьайыылаах испииһэгий? Кремль салалтата төһө да “собака лает, караван идёт” диэбитин иһин, оннооҕор испииһэгинэн эрэ бу олус күүстээх дьайыы буолар. Манна ааттаммыт дьон аан дойдуга ааттара-суоллара киртийэр – АХШ өстөөхтөрө аатыраллар. Кинилэрдиин аан дойду ааттаахтара АХШ-тан дьулайан туох да дьыаланы-куолуну, ылсыыны-бэрсиини оҥорбот буолуохтара. Быһата, бу испииһэк дьонун аан дойду хараҕар “изгой” оҥорооһун буолла.

Маныаха “омук киһитэ биһиги киһибитиниин дорооболоһоро даҕаны сааттаах буолбут эбит” диэн судургутук толкуйдуо суохтаахпыт. Олигархтар уонна чиновниктар тас дойдуга үлэлэрэ күүскэ атахтаныа, холобур “Росвооружение” сэрии сэбин атыылыыра хааччахтаныа, о.д.а..

Санкциялар уһун кэмҥэ барыахтара диэн эппитим “этэҥҥэ” үһүс сыла буолан эрэр. Маныаха киһи өтө көрө сатыыра суох, – АХШ Сэбиэскэй Союһу төһө эмэ уһун кэмҥэ туллаҥнатан, “тымныы сэриигэ” кыайбытын билэбит.

Коррупцияҕа батыллыбыт чиновниктары, олигархтары омуктар бэйэлэрэ билэллэринэн оннуларын буллараллар. Тоҕо диэтэххэ кинилэр бэйэлэрин дойдуларыгар “кирдээх харчыттан” босхолонон, туох да коррупцията суох олоруохтарын баҕараллар. Ол наһаа биһиэхэ, боростуой россияннарга кыһаллан итинник испииһэктэри, санкциялары оҥорбот буоллахтара.

Куһаҕана диэн, биһиги чиновниктарбыт уонна олигархтарбыт бэйэлэрин кыһыыларын боростуой дьонунан таһаарбаталлар ханнык: өссө күүскэ нолуоктаан-сүүлүктээн дьадатан, сөбүлээбэтэхтэри хаайталаан-өлөртөөн... Оннук гынан олохторун балачча уһатыахтарын сөп. Ол баар, куһаҕана.

Үчүгэйэ диэн, оннук гыннахтарына син биир уһаабаттар. Оттон иэстэбилэ өссө ынырык буолуо: ыраахтааҕыны дьиэ кэргэнин – кыра оҕолору-баҕастары – хайдах курдук кыыллыы дьакыйталаабыттарын санааҥ. Үтэһэ туолуута буоллаҕа...

 

Александр ЯКОВЛЕВ -Айсан.

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
1 + 1 =
Solve this simple math problem and enter the result. E.g. for 1+3, enter 4.