Доллар63.77 Евро72.59
-14 °С

Пётр ГУЛЯЕВ: Барытын кырдьыгынан эттэххэ...

08:42 в 31.12.20180 212

Сахабыт сирин норуоттарын билиҥҥи балаһыанньаларын кырдьыгынан этэр буоллахха:

  1.  Суверенитеппыт сууралынна, Конституциябыт ыстатыйалара уларыйан биһигини салайар, көмүскүүр кыаҕын сүтэрдэ, сирбит баайа былдьанна, “Гектар” сокуона киириитинэн мөлүйүөнүнэн атын дьон олохсуйуулара саҕаланна. Ити биһиги ханна да суох хаарыаннаах айылҕабыт өлүүтэ саҕаланар. Төрүт омуктар суураллан, бытанан сыыйа симэлийиибит саҕаланан эрэр. Аан дойду сирин баайын 40% баар Сахабыт сирин олохтоохторо ол баайтан кыайан туһаммакка, быста дьадайан олоробут. Федеральнай кииҥҥэ элбэх миллиард иэстээх буолбуппут туһунан иһитиннэриилэр кэлэллэр.
  2.  Кремль диктаторскай политиката киириитинэн Саха сирэ үөһээттэн “прямой” президентскай салалтаҕа киирдэ. Онон бэйэбитин бэйэбит бас билинэр бырааппыт суох буолла, батталлаах, балыырдаах салалтаҕа олороммут умналаан ытыс тоһуйан олорор кыахха киирдибит.
  3.  Биһиги сахалар инники дьылҕабытыгар омук быһыытынан хаалар суолу көрдүүр буоллахпытына бу маннык ыарахан балаһыанньаттан хайаан да тахсар туһугар туруорсууну, кэпсэтиини ыытыахтаахпыт.

Инники дьылҕабытынхайдах быһыылаах оҥостобут?

  1.  Саха сирин “Гектар” сокуонуттан хайаан да таһаарарга ыҥырабын, атыннык эттэххэ Саха сиригэр бу сокуон үлэтин тохтотуохтаах.
  2.  Саха сирин олохтоохторо суверенитекка төннүөхпүтүн наада. Суверенитекка төннөрбүт олохпут ирдэбилэ буолла. Суверенитеттаах эрэ буоллахпытына биһиги омук быһыытынан бу сиргэ өрүү баар буолуохпут. Ол аата биһиги ыччаттарбыт инники кэскиллээх дьылҕаларыгар эрэллээх буолуохтара.
  3.  Сирбит баайын норуоппутугар төннөрөн, Федеральнай киини кытта саҥалыы дуогабары түһэрсэн тэҥ быраапка, көҥүлгэ олоҕурбут, хардарыта көмөлөсүһүү, көмүскэһии сыһыанын олохтуурбут буоллар, улуу нуучча норуотун кытта дьиҥ чахчы доҕордуу сыһыан олохтонуо этэ. Ити барыта Россия элбэх омуктаах дойду быһыытынан сайдыытыгар тэҥ быраапка олоҕурбут саҥа суолу аһыа этэ.

Түмүккэ. Конституция сүрүн ыстатыйата «Право нации на самоопределение», ити ыстатыйа сүрүн ис хоһооно хайаан да тутуһуллуохтаах.

Ол аата хас биирдии омук бэйэтин олоҕун бэйэтэ хайдах билэринэн оҥостор. Ким да, ханнык да омук онно таһыттан орооһор бырааба суох. Ол гынан баран манна биири өйдөтүөҕү баҕарыллар: Саха Республиката Российскай Федерация састаабыгар баар, баар да буолуоҕа, тахсан барар санаабыт суох.

Итини этэн туран, федеративнай салалта иһигэр омук улаханыттан-кыратыттан тутулуга суох тэҥ быраапка, көҥүлгэ олорор олох систематын тутуохтаахпыт. Күөмчүлээһин, үөһээттэн хамаандалааһын хаһан да эргиллиэ суохтаах.

Саха омук олоҕун инники дьылҕатын көмүскээһинтэн ордук бу сиргэ бэриллибит дьолу көрбөппүн. Ол да иһин буолуо, саха бастакы үөрэхтээҕэ, саамай улуу киһибит Алампа Софронов этиитин аҕалабын: “Норуотуҥ санныттан тайан, норуотуҥ туһугар үлэлээ, барыны барытын норуот эрэ быһаарар”. Бу улуу киһини хараҥа хаайыы, Соловки сыылкалара кини модун санаатын самнарбатахтара.

Пётр ГУЛЯЕВ.

Нам улууһа, Түбэ.

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
4 + 0 =
Solve this simple math problem and enter the result. E.g. for 1+3, enter 4.