Доллар58.9 Евро69.43
-37 °С

Мэҥэ-Хаҥалас ааспыт быыбарын анаардахха: кырдьыгы - кырдьыгынан, баары - баарынан!

08:09 в 04.09.20172 78

Мэҥэ-Хаҥалас ааспыт быыбарын анаардахха: кырдьыгы – кырдьыгынан, баары – баарынан!

5 сыл анараа өттүгэр Мэҥэ-Хаҥалас улууһугар эмиэ баһылыгы талыы быыбара буолан ааспыта. Тыҥааһыннаах киирсии Родион Фёдоров уонна Николай Старостин ыккардыларыгар буолбута. Родион Фёдоров Мэҥэ-Ханалас улууһуттан төрүттээх, биһиги биир тарбахха баттанар, министр, депутат, Дьокуускай куорат баһылыгын солбуйааччытынан уонна Правительствоҕа да үлэлээн бүтүн республиканы салайсыбыт, улахан таһымнаах үлэлэргэ буспут-хаппыт, экономист, учуонай, көстөр дьүһүнүнэн, бөдөҥүнэн-садаҥынан даҕаны чахчы саха  саарына, киһи кэрэмэһэ, дьон эрэ астына, киэн тутта ааттыыр киһитэ. Уу сахалыы дириҥ, тобуллаҕас толкуйдаах, тутта-хапта сатаабат, ис-иһиттэн дириҥ култууралаах, аныгы саха интеллигенциятын биир чаҕылхай бэрэстэбиитэлэ. Бииргэ алтыһар да дьоно саханы саха дэттэрбит биллэр учуонайдар, академиктар, художниктар, Сахабыт сирин дьоһун-мааны дьоно буолаллар.

Кэнники биэс улуус баһылыгынан үлэлээн кэлбит Н.Старостин: салайар үлэҕэ иккис эрэ оруолга, солбуйааччынан сылдьыбыт киһи. Кини хамаандата, табаарыстара да диэххэ сөп, улуус дьаһалтатын дьаһайан олорор үрдүк дуоһунастаахтарбыт: ордук культура эйгэтигэр уонна эппэтэххин этиттэрэр, оҥорботоххун оҥотторор оҕуруктаах өйдөөх саха тылын учуутала, маны таһынан, Р.Фёдоров баннердарын кэнниттэн сырса сылдьан тырыта-хайыта тыытыынан  дьарыктаммыт, онон баһылык көмөлөһөөччүтэ дуоһунаска тиксибит, ЯГСХА-ҕа үҥкүүлүүр эрэ буолан хапсыбыт (ол саҕана ити тэрилтэҕэ талааннарынан эрэ көрөн ылыы баара), однокурсниктара этэллэринэн юрист идэтин нэһииччэ бүтэрбит эдэр уол.

Бу дуо – хамаанда? Дьэ, таһым диэтэҕиҥ. Уолаттар билигин даҕаны сылаас миэстэлэригэр хаалаарыылар араас албаһы туттан кымаахтаһа сылдьаллар. Оннук гынан кыайаллара буолуо оттон, араас албаска, сирэй көрбөх буолууга үөрэммит эрэттэр. Урукку ньымаларын – быыбар «кирдээх» технологиятын эмиэ хото туттаннар, хатылаан эрэллэр – өссө уопутурбуттар, биллэ сайдыбыттар. Куруутун дьиктиргии, сөҕө көрөбүн, маннык дьон дуоһунастаннылар да доруоһалыы үллэллэрин, тугу эрэ тоҕу көтөн оҥорбукка дылы өйдөөх баҕайытык тутталларын-хапталларын. Дьэ оннукка баҕас маастардар, улуу артыыстар.

Бу билигин буола турар быыбар иннинээҕи агитацияларыгар эмиэ уруккуларын курдук «чиэһинэй быыбары да, ыраас быыбары» – диэн кураанаҕынан куолулаабыттара, сымыйанан бэйэлэрин ньалҕаарытыммыттара эмиэ саҕаланна. Дьэ уонна кэннигиттэн кэлэннэр «бу ыраас быыбардарбыт» тугу гыналларай?

Бастакытынан, 2012 сыллаахха, быыбар агитацията саҕаланаатын кытта, эмиэ сэрэйбиккит курдук «За честные выборы» диэн общественнай комитет тэриммитэ буолбуттара, Майаҕа биллэр киһини координатор оҥостубуттара. Биһиги тугу да тэриммэтэрбит да, дьиҥ-чахчы саҥата суох чиэһинэй быыбары ыытарбыт курдук ыытабыт. Ама да ким тугу кэһиэҕэй. Ол профессор Ксенофонт Уткин, академик-художник Осипов, саха итэҕэлин тарҕатааччы Мандар Уус, Тарбахов, «Арчы» дьиэтин дириэктэрэ, Духуобунас академиятын учуонай сэкэрэтээрэ Бочонина, биллэр быраастар, артыыстар о.д.а. республикабыт, улууспут биллэр дьоно сиэри таһынан сокуону кэһиэхтэрэ этэ дуо?

Оттон бу «чиэһинэй быыбарбыт» координатора тугу гынарай? Били киинэҕэ баар куһаҕан кэмэлдьилээх геройдар курдук, киэһэ хараҥарыыта «чиэһинэй» мааскатын устан баран, түөкүн курдук Родион Фёдоров хамаандатын кэнниттэн сылдьан кинилэр сыаналаах баннердарын, плакаттарын алдьатыынан дьарыктанар. Ону Ньургун Пинигин көрөн харытыттан харбаан ылан, буруйа сылааһына Р.Фёдоров штабын дьонугар дэллэритэн аҕалан «умса» анньан кэбиһэр. Түөлбэ дьахталлара «чиэһинэй быыбары» тыыннаахтыы тутан сии сыһаллар. Онно ньимиликээн буолан уутун тохпут оҕо курдук муостаны умса көрөн турбуккун өйдүүр тнигин? Хайҕатаары саастаах киһи ээ уонна сиэри-туому тарҕатааччы үһү. Пахай даҕаны! Кинилэр эрэ кандидаттара «саары чаккыланан» ыйанан туруохтаах, биһиги кандидаппыт эрэ гиэнэ туруо суохтаах үһү.

Күн бүгүн да бу координаторбыт Майа устун былаас кандидатын батыһа сылдьан, салгыы эмиэ «ыраас, чиэһинэй» быыбарын ыыта сылдьар. Били нууччалыы өс хоһооно баара дии: «Держитө вора! – громко всех кричит сам вор», – диэн. Дьэ уонна бэйэҕит «ыраас быыбары», «координаторы» истэ-билэ сыаналааҥ…

Иккиһинэн. Р.Фёдоров аһаҕас дебакка ыҥырбытыгар куттанан кэлбэккэ гынан баран, ыҥырыы биллэриитин үрдүгэр «Фёдоров кэлбэт» диэн ис хоһоонноох бэйэлэрин листовкаларын сыбыыллара. Родион Фёдоров нууччалыы-сахалыы кутан, саҥаран-иҥэрэн таһыма таһыччыта бэрт буоллаҕа. Ханнык баҕарар боппуруостан иҥнэн-толлон турбат киһи, онон киниэхэ тэҥнэспэтин билинэр  эрэ киһи итинник ньымалары туттара биллэр суол. Хайыахпытый? Онон чаас курдук дебакка кэтэһэ сатаан баран, тарҕаһарбытыгар эрэ тиийбиппит. Төһө да уведомление биир нэдиэлэ инниттэн киниэхэ тус илиитигэр туттарыллыбытын үрдүнэн, ыраах нэһилиэккэ барбыт аатырбыта. Ханныгын да иһин, Н.Старостин дебакка кэлэн сирэй-сирэйгэ көрсөн, биир-бииргэ киирсэн, баары-баарынан, суоҕу-суоҕунан, биир муостаҕа туран эрэ эр киһилии тахсан аахсыбыта эбитэ буоллар, аҥаардастыы ол да иһин кинини убаастыахха сөп этэ. Дьэ уонна маннык халбаҥ, ыарахантан куотуна, хаптас гына саһан хаала сылдьар киһини баһылык оҥостуҥ!

Үсүһүнэн. Аны туран, «Железные дороги» улахан тэрилтэ салайааччыта Р.Фёдоров туһатыгар интервью биэрбитин кэнниттэн, бэйэлэрин хаһыаттарыгар ол тойон аатыттан «биэрбэтэҕим, эппэтэҕим, суох» дэттэрэллэр, көрдөрбүтүнэн кубарыччы сымыйалаан, «Кыым» бүтүн республика хаһыатыгар ол тойон аатыттан интервью таһаараллар. Дьэ, буолар да эбит диэтэҕиҥ, кэнниттэн сылдьан сирэйэ-хараҕа суох элбэх киһини итинник түктэри ньыманан – эппиттэрин этиттэрбэтэх курдук оҥороннор, кэнниттэн сиппийэ сылдьыбыттара. Уонна маннык дьоҥҥо итэҕэй!

Төрдүһүнэн. Родион Фёдоров Москва куоракка Россия Президенин иһинэн государственнай сулууспа академиятыгар диссертациятын 2008 с. көмүскээн экономическэй наука кандидата буолбута. Онон суоттаан-ааҕан көрөн баран, быыбар иннинээҕи программатыгар үүт туттарааччыларга анаан бастакытынан «үүт субсидиятын харчыта, билиҥҥи курдук переработкалыыр тэрилтэҕэ бэриллибэккэ, нэһилиэктэргэ быһаччы тиийэрин ситиһиэм» уонна «үүт туттарааччыларга, кинилэри тэрээһин көрүҥүнэн араарбакка, барыларыгар биир тэҥник республика субсидията, переработчик тутар сыаната, оройуон бюджета көмөлөөн уонна холбоон туттарыллыбыт үүккэ биир киилэтигэр 34 солкуобай бэриллэрин хааччыйыам» диэн өссө 2012 сыллаахха, биһиги улууспутугар үүт 22-24 эрэ солкуобайга тутуллан олордоҕуна эппитэ. Дьэ бу ордук «үүт лиитэрэтигэр 34 солкуобайы биэриэм» диэнтэн утарылаһааччы Старостин хамаандата улаханнык аллергиялаан турар, 34 солкуобайга хайдах да кыайан тахсыбатын туһунан араас дакаастабылы аҕала-аҕала бүтүн Саха сирэ таптаан ааҕар хаһыатыгар «Кыымҥа» таһаарбыта, итиннэ олоҕуран Фёдоров программатын барытын туора сото сатаабыттара (Кыым №19-17.05.2012 с., №20-20.05.2012 с.).

Ол да буоллар Р.Фёдоров этиитэ дакаастаныллан, олоҕунан бигэргэтиллэн билигин бүтүн республика үрдүнэн үүт туттарыы сыаната 45 солк. тахсыбыта. Хомойуох иһин, бу маннык баһылыктардаах буоламмыт тыа хаһаайыстыбатын салаатыгар көрдөрүү улаханнык түстэ, чуолаан Мэҥэ-Хаҥаласка эмиэ диирбитигэр тиийэбит. Ол курдук биһиги улууспут үүт ыаһын былаанын 2015 сыллаахха кыайан толорботоҕо.

Бэсиһинэн. Кыайтараары гыммыттарын билинэннэр, аны улуустарын дьонун-сэргэтин, бэйэлээх бэйэлэрин улуустарын дьонун самнараары, бэйэлэрин туһаларыгар тыл этиттэрээри республика Президенин иккитэ бөртөлүөтүнэн көтүтэн аҕалбыттара. Өйдүүр инигит Майа театырыгар дьон ону бырачыастаан айманан, Е.А.Борисов атахха биллэрбитин? Эбэтэр оннук үлүгэр норуоттарын сэнииллэр дуу? Биһиги даҕаны бээ, син ону-маны ыйдаҥардабыт, сокуоҥҥа эмиэ быһаарсабыт – административнай ресурс буккуһуо, дьону ыгыа-түүрүө суохтаах, үрдүк сололоох дуоһунастаахтар эмиэ кыттыһыа суохтаахтар!

Оттон билигин хайдаҕый, улууспут дьаһалтатын специалистарыгар тиийэ үлэ кэмигэр бэйэлэрин наймыласпыт «политкиллердэрин» техническэй кандидатынан туруораары подпись хомуйа сүүрэллэр. Онтукайдара биллэн, бу соторутааҕыта Т.Нестеров үҥсүүтүнэн, суут уурааҕынан бу Максимовтара быыбар марафонуттан уһулунна, туораата. Маны таһынан дуоһунаһынан сирэйэ-хараҕа суох туһаныы, өттөйүү, бензовоз массыынаҕа тиийэ араас манньа, бэрик барыта барбытын, админ.ресурс диэннэринэн тоҕо солоон сылдьыбыттарын? Итинэн сылыктаатахха, балаһыанньалара мөлтөөрү гыннаҕына эмиэ сотору Ил Дархан бөртөлүөтүн тыаһын истэрбит буолуо диэн баар. Ол аайы бэриниллибэт, суут-сокуон барыларыгар биир буолуохтаах!

Алтыһынан. Родион Фёдоров курдук чөл олоҕу тутуһар, бастыҥ баскетболист, хайыһардьыт, дьиҥ-чахчы спорду өрө туппут, сарсыардатын сүүрүүнэн, күннээҕи сэрээккэнэн саҕалыыр салайааччы бэрт ахсааннаах буолуоҕа. Дьэ бу өттүгэр бэйэлэрин туһааннаах тус олохторунан киниэхэ эмиэ ханан да тэҥнэспэт буоланнар, быыбар «кирдээх» технологиятын туһанан аны киһибитин улуу арыгыһыт, Бэстээххэ арыгы собуотун тутар үһү, анаан-минээн нууччаларга, омуктарга – «дьаарай националист, эһигини суох оҥорор, үүртэлиир үһү» диэн интернети, хаһыаты олоҕо суох сураҕынан-садьыгынан көмөн кэбиһэллэр, эбиитин Р.Фёдоровы кэлтэйдии хараардар сыаллаах-соруктаах, хара пиарынан дьарыктанар «Нижне-Бестяхские новости»  диэн анал хаһыат таһаараллар. Уонна эмиэ буоларын курдук кылбаччы көрөн кэбиһиҥ, ытыскытын соттунуҥ!

Аны туран Р.Фёдоров хамаандата хаһыат нөҥүө кырдьыгын этиннэҕинэ, албыннарын саралаатаҕына, харыларыттан харбаатаҕына – «хара пиары» тутуннулар диэн өлөрдүү өһүргэммитэ буолаллара эмиэ баара дии. Биһиги кырдьыкпыт – «хара пиар», кинилэр гиэннэрэ – «ыраас быыбар» үһү. Дьэ сүөргү быһыы диэтэҕиҥ – оҕуруктаах өйдөрүттэн, үөҥҥэ-күрдьэҕэҕэ тиллэллэриттэн киһи кэлэйэр даҕаны, сонньуйар даҕаны. Хайҕатаары өссө «суолу-эдэрдэргэ» диэн лозуннаахтар. Сиэрэ суох итинник суолларын тэлинэр эдэрдэртэн киһи дьаахханар, салгыы тугу оҥоруохтара, ханна тириэрдиэхтэрэ биллибэт… Маннык дьоҥҥо уонна эрэнэбит дуо?!

Сэттиһинэн. Аны Фёдоров хас да сыл салайбыт куоракка баар биир дойдулаахтарбыт түмсүүлэрин «Дойду ситимин», быыбар кэнниттэн дьону буккуйан, иккис «Дойду ситимин» клоннаан төрөтөллөр. Бу түмсүү аатыттан бэйэлэрин тустарыгар ыҥырыы бөҕөтүн таһаараллар, Владимир Птицыны салайааччынан талаллар. Онтукайдара хантан үлэлэтиэй, суох буоллаҕа, бу да түмсүү үлэтин симэлитэр, нуктуу олорор гына оҥорор. Бу ааспыт биэс сыл устата куоракка олорор биир дойдулаахтарбытыгар анаан ыһыах диэн ыһыллыбата,  кинилэри түмүү быстар мөлтөх. Арай бу соторутааҕыта Старостин аҕытаассыйатыгар хаартыскаҕа туран түспүттэрин «ватсап» нөҥүө ыыталаан сэргэхсиппитэ буоллулар. «Дойду ситимин» аҕытаассыйаҕа эрэ туһаныллар тэрилгэ кубулуттулар, итинэн Птицыммыт үлэтэ бүтэр.

Хата куорат дьоно Родион Фёдоровтарын, кини салайан кэлбит кэмигэр араас түмсүү тэрээһиннэринэн ньиргийэн олорбуттарын күн бүгүҥҥэ диэри сотору-сотору суохтууллара иһиллэр. Буолумуна даҕаны, Родион Иннокентьевич дьону ылыннарыылаах тылынан түмэрэ-тардара, сүүрэрэ-көтөрө – мээнэ киһиэхэ бэриллибэт айылгыта, туһунан талаан буолар. Хаарыан киһибитин көрдөрөн туран балыйдахтара, сирэйэ-хараҕа суох тэбистэхтэрэ ити.

Ахсыһынан. 2012 сыл быһаарыылаах быыбар күнүгэр, киэһэ 8 чаас кэннэ: нэһилиэктэртэн итэҕэллээх дьон кыайыы эрэ көтөллөөх дакылааттаан истилэр (Мэҥэҕэ 31 нэһилиэк баар). Ортотугар кэлэн аны Фёдоров төрөөбүт дойдута, Наахара «209 : 174»-кэ диэн эмиэ «кыайыыны» биллэрдэ, былааҕы өссө үрдүккэ өрө күөрэтэн таһаарда, мантан инньэ эрэллээх кыайыы баар буолара саарбахтаммат буолла.  Эмиэ хаһыы-ыһыы, үөрүү-көтүү! Ити куоластааһын «ортотугар» диэн тоһоҕолоон этэбин. Дьэ ити биллэрии кэнниттэн, тоҕо эрэ нэһилиэктэртэн сводка тохтоон, 1 чаас курдук дьикти ньимийии, тохтобул буолла. Ол быыһыгар Майа быыбардыыр учаастагар, театырга уоттара барда диэн дьиксинии эҥэрдээх биллэрии кэллэ.

Онтон аны иккистээн Наахараттан эрийдилэр: “Кыайтарыы эбит – 181 : 202-гэ диэтилэр, сыыһа аахпыттар үһү”, – диэн буолла. Аҕыйах куолаһы ол элбэх киһи хайдах сыыһа ааҕыан сөбүн дьэ өйүм хоппот, 1-2 эбитэ буоллар сыыстарбыттар диэн баҕар сөпсөһүөххэ сөп эбитэ буолуо… Дьэ ити кэмтэн ыла 10-20 куолаһынан быысаһан биһиги кандидаппыт хотторор аатыгар барда.

Бу кэнниттэн бэйэҕит сыаналааҥ… Туох дииргит эбитэ буолла? Мин – көрдөрөн туран сирэйэ-хараҕа суох балыйбыттара  диибин. Эбэтэр билигин биһиги, Мэҥэ-Хаҥаластар, атын баһылыктаах буолан, республикаҕа дьиҥ-чахчы үлэбитинэн-хамнаспытынан, үлүскэн сайдыыбытынан ньиргийэн олоруохтаах этибит. Быыбар кэнниттэн улаханнык кыайбыт-хоппут киһи быһыытынан Н.Старостин быыбарга кыайбытын сууйар, бэлиэтиир бырааһынньыгар улуустааҕы быыбар хамыыһыйатын салайааччытыгар көмүс хары чаһытын бэлэхтээбитин туһунан сонун норуокка интернет нөҥүө тилийэ сүүрбүтэ.

Тохсуһунан. Аны сааскы быыбар кэнниттэн күһүн Москваттан көҥүл социологическай оппуруос оҥоро биир нуучча киһитэ кэлэн уулуссаттан ааһан иһэр 10 киһини үлүбээй хомуйан, Киин библиотека дьиэтигэр мунньан, анкета толотторбут. Онно ааспыт быыбарга санааҕын кимиэхэ уурбуккунуй, кимҥэ куоластаабыккыный диэн боппуруостаах эбит. Өлүү түбэлтэлээх онно Фёдоров штабыгар үлэлээбит биир дьахтар алҕас хапсан дьон эппиэтин истибитэ, биһиги сабаҕалааһыммытын өссө бигэргэтэн, тоһоҕолоон биэрбитэ. Бу 10 киһиттэн 9-һа – Р.Фёдоровы талбыттар. Ол быыһыгар 1 эрэ – Н.Старостин. Ол да иһин дьон быыбартан кэлэйэр буоллаҕа, кыайбыт да буоллаҕына – кыайтарбыт оҥоруохтара диэн. Хата билигин балаһыанньа уларыйбыт курдук буолла, үөһээ ЦИК-кэ Элла Памфилова диэн хотун кэллэ, кытаанах бэрээдэги олохтоон эрэр. Ама да буолбутун, ааспытын иһин син тардынар инилэр диэн баҕа санаа кыыма баар.

Өссө ити элбэхтэн аҕыйаҕы эрэ сүрүннээн быһа тардан кэпсээтэххэ итинник, киһи сөҕүөх быракаастара дьиҥинэн элбэх этэ. Аллараа Бэстээххэ буолбут нэһилиэк баһылыгын быыбарыгар ити этиллибит «кирдээх» технология олус хото туттуллубута.

Дьэ итини барытын тоҕо билигин кэлэн санаатыҥ, тоҕо тэбээтиҥ, кыһыыгын-абаҕын таһаардыҥ диир буоллахха, бу быйылгы быыбар хампаанньатыгар эмиэ ити ньымалар оруобуна туттуллан эрэллэрэ киһини дьиксиннэрэр, ол эбэтэр быыбар урукку сценарийынан баран эрэр. Онон быыбардааччыларбар «кылабачыйар барыта көмүс буолбатаҕын» өссө төгүл санатыахпын баҕарабын. Ол курдук, былаас  өттүттэн сымыйа аҥардаах «ыраас быыбар» диэн аатынан шоу саҕаланна. Ол курдук:

а) улахан харчыга наймылаһан, Максимов диэн чуолаан Т.Нестеровы суутунан соскойдоон сэниэтин эһэр, быыбар күрэҕиттэн туоратыахтаах «политкиллеры» аҕалан баран, ону норуот сөбүлээбэтэҕин, онтон Н.Старостин рейтинэ биллэ түһээри гыммытыттан сэрэхэчийэн, төттөрүтүн өҕүйэн, аны Т.Нестеров тус бэйэтэ аҕалан бэйэтин сууттаппытын курдук  өйдөбүл оҥорон, кэпсээн – төттөрү сураҕы ыыттылар. Онон этэбин, оҕуруктаах өйдөөхтөр дьэ сатыыр да буолаллар эбит диэн! Максимов Н.Старостиҥҥа эрэ буолбатах, Аллараа Бэстээххэ улуус дьаһалтата туруорбут кандидатыгар Ю.Колмаковка эмиэ довереннай, онно Максимов Г.Бору суох оҥоруохтаах. Салгыы эмиэ баннердар хайы тардыллан бардылар, эмиэ биир эрэ киһи «баһылык манна мин эрэ» диэбиттии «саары чаккыланан» турар.

б) элбэх куолаһы биэрбит нэһилиэккэ манньата – эмиэ массыына, дьону ыгыы-түүрүү, үлэ миэстэтинэн куттааһын, куоластаабыт бюллетеҥҥитин ватсапка түһэрэн ыыттаххытына эрэ үлэ миэстэтин аттестациялыыбыт эҥин диэн араас албастара элбэх… Тоҕо кыаллыбатый, чахчы да быыбары ыраастык ыытыы? Итини дьону, быыбардааччылары сэнээһин, баар сокуоннары кэлтэйдии кэһии курдук эрэ сыаналыахха сөп! Өссө «ыраас быыбардарыгар» ватсап нөҥүө сэрэтиилээхтэр: «улуус иһиттэн кир-хох тахсыа суохтаах» диэн. Бастаан бэйэни көрүнүөх баара.

Киһи кыбыстарын, сирэй кытарарын оҥорбокко быыбары дьиҥ-чахчы ыраастык ыытан, дьиҥ-чахчы норуот талбыт легитимнэй былааһа кэм ирдэбилэ. Оччоҕуна туох кир-хох таска тахсыай? Олоххо саҥа көстүү баар буолбут: таспыт былаас киһитэ, испит норуот киһитэ – диэн этинии…

в) араас кырасыабай агитациялыыр видеороликтары ватсапка ыыттылар, өйдөөх баҕайы, ол гынан баран иһэ кураанах, ыйааһына суох уонна халыып буолбут тыллары тыал хоту мээнэ ыстылар. Быыбар эрэ кэмигэр норуокка чугаһаабыта, араас субуотунньуктары ыыппыта буоллулар, кылабыыһаны кытары ыраастаатылар. Таах да биһиэхэ сороҕор бокуонньуктар да анараа дойдуттан кэлэннэр эмиэ куоластааччылар. Баар суол – баар! Шоу, барыта шоу, киһи итэҕэйбэт артыыстааһына барыта.

Уонна кэннитэ кэтинчэ да буоллун, кинилэргэ баһылык эрэ буолуохха, кыайыахха, хайдах эрэ тутуһан хаалыахха эрэ наада!  Бернард Шоу этэн турар: «Уопсайынан этэр буоллахха, былаас дьону буортулаабат. Ол оннугар татым өйдөөхтөр былааска таҕыстахтарына былааһы буортулууллар» диэн. Дьэ бу чахчы уот харахха этии диэтэҕиҥ!

Онон итини барытын этэн, сааһылаан тураммын, убаастабыллаах быыбардааччылар, эһиэхэ анаан этиэхпин баҕарабын.

Албыҥҥа-көлдьүҥҥэ киирэн биэримэҥ, араарарга, анаарарга үөрэниҥ уонна дьиҥ-чахчы эһиэхэ, норуотун туһугар үлэлиэн баҕалаах киһиэхэ аартыгын суолун арыйан биэриэҕиҥ. Онтон былааска эрэ тардыһааччыларга, онон туһанан бэйэлэрин инникилэригэр үктэл эрэ оҥосто сатааччыларга олбохторун түөрэ тэбиэххэ, аартыктарын аанын сабыахха.

Түксү, албынтан-түөкэйтэн сылайыы, кэлэйии барда. Онон культура үлэһитэ – театырыгар бардын, саха тылын учуутала оскуолатыгар тиийэн оҕолору сиэргэ-туомҥа үөрэттин, арчылаан, бэйэтин ыраастаннын, «Аман өс» күрэҕин ыыттын, экономист казначействотыгар олордун – ол биһиэхэ да, эһиэхэ да, улууска да быдан туһалаах буолуоҕа. Мин эттим – эһиги иһиттигит.

2012 сыллаахха Родион Фёдоров штабын салайсыбыт

Руслан НИКИФОРОВ.

Комментарии(2)

Аватар пользователя Гость
JeffLype 26.09.2017, 17:43

Jolessa And Amoxicillin Levitra Femme <a href="http://cheapestcial.com" rel="nofollow">cialis</a> Keflex For Herpes Le Propecia Et Il En Vente Libre Amoxicillin Capsule

Аватар пользователя Гость
RonWace 05.10.2017, 15:03

Stendra Avanafil Cost Non Prescription Prozak Retin A From Canadian Pharmacy <a href="http://cheapvia25mg.com" rel="nofollow">online pharmacy</a> Direct Rx Deal Viagra Generic Isotretinoin Tab Internet Pharmacy With Free Shipping

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
11 + 2 =
Solve this simple math problem and enter the result. E.g. for 1+3, enter 4.