Доллар58.9 Евро69.43
-37 °С

Кириитикэлииргэ төрүөт суох

11:26 в 24.03.20171 55

Мин бу ыстатыйаны суруйарга баҕам да, санаам да, кыаҕым да кыратынан баҕарбат этим. Сэбиэскэй кэм туһунан историк үөрэхтээх учуонайдарбыт тугу да суруйбаттар, ууну омурдубут курдуктар. Оскуолаҕа үөрэнэ сылдьар үрдүкү кылаас үөрэнээччилэрэ сэбиэскэй кэм туһунан ыйыталаһан көрдөххө олус мөлтөх билиилээхтэр. Сорох оҕолор сэбиэскэй кэм төһө өр, ханнык сылларга буолан ааспытын, эгэ салайааччыларын билиэхтэрэ дуо, суох буоллаҕа дии.

Сэбиэскэй судаарыстыбаны В.И.Ленин, И.В.Сталин, Н.С.Хрущёв, Л.И.Брежнев бары 10, 20, 30-чаҕа чугаһыыр сыл салайан историяҕа суруллар суолу-ииһи хаалларбыттара, кинилэр дойдуга электрификацияны, коллективизацияны, бары бүттүүн босхо үөрэхтээһини, эмтэниини олохтообуттара, аҕа дойдуну көмүскүүр улуу сэриигэ бүтүн аан дойдуга суоһуур фашизмы кыайыыны, арыый кэлин космоһы баһылааһыны ситиспиттэрэ. Итиннэ Никита Сергеевич Хрущёв сэбиэскэй сойууһу уонча сыл салайбыт кэмигэр дьон хобугар олоҕурбут политическэй репрессийэни суох оҥорбута. Наукаҕа бөдөҥ ситиһиилэр түмүктэригэр сэбиэскэй киһи Ю.А.Гагарин космоска бастакынан көппүтэ, тимир суолу оҥоруута, БАМ тутуутугар, кырыс уонна оһорбо сирдэри баһылааһыҥҥа ыччаттар, комсомолецтар күүскэ туруммуттара. Н.С.Хрущёв бэйэтин үлэтигэр үлэһит дьоҥҥо, оробуочайдарга, бааһынайдарга тирэҕирэрэ, кини кэмигэр бастыҥ үлэһиттэр Верховнай сэбиэт депутата буолаллара, сэбиэскэй судаарыстыба боппуруостарын быһаарыыга актыыбынай кыттыыны ылаллара. Ол иһин депутаттары норуот хамначчыта (слуга народа) дииллэрэ.

Н.С.Хрущёв кэмигэр уордьаннаах үлэһиттэр, үлэ дьоруойдара элбээбиттэрэ, үлэһит дьон бочуоттанар буолбуттара. Кини кэмигэр үлэһит дьоҥҥо анаан, бүтүн сойуус үрдүнэн элбэх түөртүү-биэстии этээстээх таас дьиэлэр тутуллубуттара. Билигин ол дьиэлэри “хрущёвкалар” диэн хос ааттыыллар. Мин чуолкайдык билбэппин эрээри, сэрэйдэхпинэ ол буор босхо ылбыт хрущёвкаларыгар билигин Арассыыйа дьонун аҥаарын кэриҥэ олороллоро буолуо...

Билигин Арассыыйа Верховнай сэбиэтигэр биир эмэ орто, эбэтэр үрдүк үөрэхтээх оробуочай киһи баарыгар саарбахтыыбын. Санаан да көрдөххө үлэһит киһи болҕомтоҕо ылыллыбата, сэнэбилгэ сылдьара туох үчүгэйдээх буолуой? Ханна баҕарар бэйэлэрин баҕа санааларыгар олус бэриниилээх, ол аата оптимист дьон үөрэххэ, наукаҕа, спортка, үлэҕэ улахан ситиһиилэрдээх буолаллар. Никита Сергеевич коммунистическэй олох кэлэригэр олус итэҕэйэ саныыр буолан, коммунизм олоҕо аны 20-30 сылынан, ол аата 1980-1990 сылларга коммунизмҥа олоруохпут диэн кини улаханнык сыыстарбыта. Мин учууталлыыр кэммэр Н.С.Хрущёв сийиэскэ, пленумҥа дакылааттара “Кыым” хаһыат иккилии сирэйигэр тиэтэлинэн тылбаастанан, бэчээттэнэн тахсаллара, ону биһиги ааҕан, бэлиэтэнэн баран ис хоһоонун дьоҥҥо, нэһилиэнньэҕэ кэпсиирбит. Сэбиэскэй олох туох да куһаҕана суоҕа, сахаларга үчүгэйи эрэ аҕалбыта. Урут ыраахтааҕылаах олоххо үс сүүс сыл олорон сахалар бары кэриэтэ үөрэхтэн маппыппыт, арай таҥара дьиэлэрэ эрэ элбээбиттэрэ. Доруобуйа харыстабылын туһунан этэ да барыллыбат. Ити итэҕэстэри сэбиэскэй былаас сүүрбэччэ сылынан суох оҥорбута.

Н.С.Хрущёв саҕана үлэтэ суох буолуу суоҕа, киһи барыта үлэлээҕэ, сопхуостар ыанньыксыттара, суоппардара, тырахтарыыстара учууталлары кытта тэҥ, өссө арыый элбэх хамнастаахтара. Онон сэбиэскэй кэми холуннарарга, баһааҕырдарга, кириитикэлииргэ ханнык да төрүөт суох. Сэбиэскэй кэм үөһээ салалтаҕа да, атын да үлэһиттэргэ кэнники сылларга үлэ бэрээдэгэ мөлтөөбүтүн, үлэҕэ эппиэтинэһэ суох ээл-дээл буолуу, уоруу элбээбитин уонна үлэ оҥорон таһаарыытын түмүгэр ким да эппиэттээбэт буолбутунан эстибитэ дии саныыбын. Билигин оскуолалары бүтэрэр 18 саастарын туолбут эдэр дьон бэйэлэрин эбэлэрэ, эһэлэрэ, хос эбэлэрэ туох-ханнык олоххо олорон кэлбиттэрин биллэрэргэ учууталлар бары сыралаахтык үлэлиирбит эрэйиллэр.

 

Пантелеймон ДАРБАСОВ.

Томпо, Мэҥэ-Алдан.

Комментарии(1)

Аватар пользователя Гость
RonWace 03.10.2017, 03:13

Cephalexin Dosage For Urinary Amoxicillin Swelling Compare Viagra Levitron Cialis <a href="http://cialtobuy.com" rel="nofollow">cialis</a> Indications For Zithromax Bactrim Ds Fors Sale

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
17 + 0 =
Solve this simple math problem and enter the result. E.g. for 1+3, enter 4.