Доллар61.26 Евро72.24
+8 °С

Быыбар кэминээҕи санаалар

17:11 в 18.06.20180 17

Сэбиэскэй кэмҥэ 1974 с. Иркутскайга тутуу техникумун бүтэрэн кэлэн баран, Аммаҕа үлэлии-хамныы сылдьан 24-с нүөмэрдээх Курашовтааҕы быыбардыыр уокурукка оройуон депутатыгар талыллан үлэлии сылдьыбыттааҕым. Ол кэмнэргэ туох барыта дьэҥкэ курдуга, үлэ-хамнас күөстүү оргуйара, инники сыалыҥ-соругуҥ барыта биллэрэ, мунньахтарга туох да кэтэх санаата суох кырдьыгы уот харахха этиилэр буолаллара. Кэмэ да, ирдэбилэ да оннук буоллаҕа.

Аны сааһыран иһэн пенсияҕа сынньалаҥҥа да олордорбун 2015 сылтан нэһилиэгим депутатынан талыллан үлэлиибин. Нэһилиэкпит баһылыга С.В.Борисова сорохторбутун актыыбынай үлэлээхтэр диэн сыаналыыр. Кэлиҥҥи көлүөнэ депутаттарыттан саамай ситиһиилээх үлэлээҕинэн, үөрэҕи ылбатах эрээри, сааһын тухары харытынан үлэлээн кэлбит 1-кы группалаах инбэлиит А.И.Сергеевы ааттыахха сөп. Ил дархан дуоһунаһыгар үлэлээн олорбут Е.А.Борисов Афанасий Иннокентьевиһы иилээн-саҕалаан, кыайыылаахтык кэпсэтиһэр дьоҕурдааҕын учуоттаан буоллаҕа, республикаттан соҕотох кинини эрэ талан Дойду президенин В.В.Путины кытары быһаччы сибээстэһэр итэҕэллээх киһи оҥорбута. Ол түмүгэр 20-чэ сыл устата ситиһиллибэтэх икки этээстээх таас оскуолабыт тутуута 2017 сылтан саҕаланарын ситистэ. Үбүн-харчытын дьыалата, өбүгэлэрбит эппиттэринии «былдьаһыктаах бырта сыата» буолан, халбас харытыныы куруук, киһи эрэ илистэр эккирэтиһиилээх түбүккэ, нэһилиэк эрэ депутата да буоллар Ил Түмэн депутатынааҕар таһыччы ситиһиилэрдээҕэ үөрдэр, сөхтөрөр. Киһи үөйбэтэх өрүттэрдээх, үгүс уустуктардаах үйэбитигэр тутуу, үрдүк күүрүүлээх уот, гаас, суол курдук тыын боппуруостары быһаарарга, дьиҥнээх норуокка бэриниилээх депутаттары таларбыт кэм ирдэбилинэн буолбутун көрөбүт.

Биллиилээх суруйааччы Иван Гоголев-Кындыл этэринии: «Билиҥҥи үйэҕэ саха норуотун сайдыытын таҥнары тардар өрүттэринэн – былааһы былдьаһыы, харчыга хараҥарыы уонна ордугурҕааһын» буолалларын чопчулаабыта. Итилэри тумнан уонна кэккэ нэһилиэктэр уопуттарыгар олоҕуран, депутаттарынан сатаан аһаҕастык кырдьыгынан кэпсэтэр-ипсэтэр тыллаах-өстөөх, дьонугар бэриниилээх уонна салайар дуоһунаһа да суох киһини талар көдьүүстээҕин олох көрдөрөр.

Бачча тухары нэһилиэккэ, улууска наар дуоһунастаах дьону депутатынан талан аҕай кэллибит эрээри, туруорсар боппуруостарбыт өссө элбээн иһэр курдуктар. Дуоһунастаах киһи депутат да буолбатар наадалаах боппуруоһугар депутатскай сессияларга сокуон быһыытынан, хайдах баҕарар кыттар бырааптааҕын билэн, көрөн-истэн кэллибит. Хомойуох иһин дуоһунастаах дьоммут сессияҕа аҕыйахтык сылдьаллар, ол туһунан кэнники мунньахха ким төһөтө сылдьыбатаҕын этэн турабын. Баҕар өһүргэнэллэрэ буолуо эрээри, кириитикэтэ, кырдьыгы сирэйгэ этиитэ суох сайдыбаппыт буолуо.

Билигин үлэһит дьон кырдьыгы этэртэн үгүстэрэ тоҕо эрэ туттуналлар. Эр дьон мунньахтарга кытта да сатаабат. Биричиинэтэ – дуоһунастаах дьонтон хамнастара тутулуктаах. Ол иһин дьиэ кэргэттэрин уйгутун туһугар ордук-хоһу тыллаһыахтарын баҕарбаттар.

Үгүс сылларга дуоһунастаах дьону депутатынан таллахпыт аҕай дии, олору барыларын ситиһиилээхтик үлэлээбэтилэр диэбэппин. Билигин Ил Түмэн, улуус, нэһилиэк депутаттара уопсай тылы булан бииргэ үлэлээбэттэрэ көстөр. Сүбэлэһэн, программа оҥостон үлэлиирбит буоллар күүстээх үгүһү кыайар-хотор хамаанда буоларбыт чуолкай.

Кэнники нүөмэргэ ытык кырдьаҕас Максим Николаевич Сибиряков ыҥырыытын биһирээн туран, кыларыйан турар кырдьыгы малтаччы суруйар, тыа дьоно таптаан ааҕар «Туймаада» хаһыаппыт кылаабынай редактора Яковлев Александр Петрович Ил Түмэн депутатынан быыбарданарын өйүөҕүҥ уонна тыабыт хаһаайыстыбата сайдарын туһугар хаһыаппыт нөҥүө туруулаһа туруоҕуҥ диэн тыа сирин үлэһит дьонун ыҥырабын.

 

А.М. НЕСТЕРЕВ-Добун Өлөксөй,

пенсионер депутат.

Амма, Бөтүҥ.

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
8 + 11 =
Solve this simple math problem and enter the result. E.g. for 1+3, enter 4.