Доллар58.9 Евро69.43
-37 °С

Баһылыктан тутулуктаах

17:03 в 23.03.20170 26

2017 сыл республика иһигэр муниципальнай тэрээһиннэргэ улуустарга уонна нэһилиэктэргэ баһылыктар, депутаттар быыбардара буолара биллэр.

Ааспыт кэмҥэ республика бэчээтигэр ил дархан Борисов Е.А. уонна кадрдары дьаһайааччы Андрей Мартынов улуустар уонна нэһилиэктэр баһылыктарын туһунан быһаарыы таһаарбыттара. Онно этиллэринэн: улуус баһылыга уонна нэһилиэк баһылыга аймахтыы буолуо суохтаахтар, баһылыктар бэйэлэрэ үлэлиир администрацияларыгар аймахтарын үлэҕэ ылыа суохтаахтар диэн эмиэ баар. Бу олус сөптөөх дьаһал тахсыбыта. Ол гынан баран билигин да сорох сирдэргэ ити тутуһуллубат. Ол инниттэн кэлэр быыбардарга баһылыктарга кандидаттары туруорууга үчүгэйдик бэрэбиэркэлээн эрэ баран, быыбарга кандидаттары киллэриэххэ.

Нэһилиэк баһылыга быыбарданан үлэтигэр таҕыстаҕына биир сыл устата үлэтигэр мөлтөх да буоллаҕына, үлэтиттэн тохтотуллуо суохтаах диэн эмиэ этиллэр. Бу отой сыыһа. Ханнык баҕарар баһылыкка кандидат тус бэйэтин билиитигэр, көрүүтүгэр, үлэлээбит уопутугар тирэҕирэн туруорунар буоллаҕа.

Нэһилиэк баһылыктара баһылык үлэтигэр үөрэнэ кэлбэттэр. «Нэһилиэк олоҕун, үлэтин, дьонун-сэргэтин сайыннарыам»  диэн программалаах үлэлии кэлэр. Үлэҕэ киириэҕиттэн эбээһинэс, эппиэтинэс үлэлиир баһылыктан күн аайы ирдэниэхтээх. Нэһилиэк бэйэни салайыныыга киирбитинэн, нэһилиэк сайдыытын туругун, ол иһигэр араас олоххо тахсар итэҕэстэри туоратыыны бэйэлэрэ дьаһайар, хонтуруоллуур буолуохтарын наада. Оччоҕуна эрэ дьон өйө-санаата уһуктуо, бэйэҕэ эппиэтинэс күүһүрүө, совхоз саҕанааҕы курдук үөһээттэн кэлэр бирикээстэринэн салаллан, ону кэтээн олоруу тохтуо этэ.

Уопсай дьыала туһугар дьону түмэргэ, үлэни саҥалыы ирдэбилгэ киллэрэргэ, производствоны сайыннарыыга, араас көрүҥнээх, хайысхалаах үлэ миэстэтин тэрийиигэ, дьон өйө-санаата уһуктарыгар төһүү күүс буолуон сөптөөх биир дьаһалынан: нэһилиэккэ ревизионнай комиссияны тэрийии буолуо этэ. Ревизионнай комиссияны нэһилиэк уставыгар киллэрэн туран, уопсай мунньаҕынан бигэргэтиэххэ. Ревкомиссия нэһилиэк иһигэр, нэһилиэк уопсай мунньаҕар эрэ бас бэриниэхтээх. Кини ханнык үлэни ыытарын, нэһилиэккэ сокуонунан олохтоммут боломуочуйалар ирдэбиллэригэр олоҕуран ыытыллыахтаах. Уопсай мунньах, ревкомиссия председателин босхоломмут үлэһит оҥорорун, эбэтэр оҥорботун, ону кытта атын чилиэннэрин хас киһи буоларын, кимнээҕи таларын уопсай мунньах бэйэтэ быһаарыахтаах.

Нэһилиэк иһигэр, ситэ туһаныллыбат ис кыахтары: нэһилиэккэ уонна нэһилиэнньэ туһатыгар таһаарыыга ревкомиссия кыттыһыан наада. Холобура, сорох улуус нэһилиэктэригэр республикаттан «Беларусь» тыраахтар, ону кытта оту рулоннуур пресс подборщик бэриллэн турар. Бу кэлбит техникалар 1-2 сайын кылгас кэмҥэ үлэлээн баран тохтообуттара. Билигин ким бас билиитэ буолара биллибэт. Ревкомиссия маннык техникалары ирдэһэн, нэһилиэккэ үлэлиирин ситиһиэхтээх.

Нэһилиэккэ ходуһа сирин олохтоохторго түҥэппит кэннэ, ордубут ходуһа сирдэрин, урукку быраҕыллыбыт бааһыналары, нэһилиэк салалтата оттуур звено тэрийэн, ол билигин кимиэхэ баара биллибэт техникалары булан, оттооһуну тэрийиэн наада. Оттообут отторун нэһилиэк иһигэр да, таска да атыылаан харчы киллэринэн, нэһилиэк үлэтэ суох дьонугар үлэ миэстэтин таһаарыыга көмөлөөх буолуо. Техникалаах буоллахха араас үлэлэри тэрийэн, дьону үлэнэн хааччыйыахха сөп.

 

МОХСОҔОЛ. 

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
2 + 1 =
Solve this simple math problem and enter the result. E.g. for 1+3, enter 4.