Доллар58.9 Евро69.43
-35 °С

Баай уонна дьадаҥы арда атар

16:45 в 23.03.20170 4

Салалта сыллааҕы дохуота уонна алын сүһүөх үлэһит хамнаһа билигини сирдээх-халлаан. Холобур, «Роснефть», «Газпром» о.д.а. судаарыстыбаннай тэрилтэлэр салайааччыларын хамнастара киһи кулгааҕар баппат үрдүктэр. Холобур, Сечин («Роснефть») күннээҕи хамнаһа 6 мөл.солк., оттон Миллер («Газпром») хамнаһа 3 мөл.солк. Кинилэр эппиэтинэстэрэ үрдүгэ өйдөнөр эрээри күҥҥэ 8 чаас үлэлииллэр, көмөҕө улахан аппараат мөхсөр.

Госдума депутатын ыйдааҕы хамнаһа 500 тыһ.солк. кэриҥэ. Биһиги да Ил Түмэммит депутаттара үгүөрү хамнастаахтар эбээт.Алын сүһүөх үлэһиттэр хамнастара хас да уонунан төгүл намыһаҕын түмүгэр, дойду нэһилиэнньэтин 20-чэ бырыһыана дьадаҥы араҥаҕа киирэр диэн суруйаллар.

Сайдыылаах дойдуларга, үрдүк дохуоттаахтарга үүнэн иһэр нолуогу олохтууллар. Бу уопуту туһанарга диэн боппуруос Госдумаҕа киирбитин ааспыт састаап көрбөтөҕө. Саҥа састаап көрүөхтээҕин В.Путин боппуруоһу отой да устан кэбиспитэ. Бу бэрээдэк олохтоммута буоллар киириэхтээх үп-хамнас уонна пенсия боппуруоһун быһаарар кыахтааҕа. Ол оннугар баайдарыттан (дьиэ-уот, массыына, киэргэл о.д.а.) нолуок олохтоммута. Ол сөп буолуо диэн буолла. Дьиҥэр ити кыаллыбат өрүт. Бу дьонуҥ баайдарын кэргэннэригэр, урууларыгар суруттарар идэлэммиттэрэ ыраатта. Түмүгэр муоста сууйааччылыын 13% подоходнай нолуогу тэҥҥэ төлүүллэр.

Дойдуга тастан куттал уҕараабатын түмүгэр байыаннай салааҕа бюджеттан 42% тиийэ ороскуоттуубут. Көмүскэнэргэ аналлаах сэрии сэбин оҥорууну ким утарыай. Ону баара эйэ иһин охсуһар ааттаах эрээри атыыга анаан сэрии сэбин оҥоруу хайдах эрэ өйдөммөт. Ол оннугар араас сирбит баайын сиикэйдии атыылыыбыт. Тиһэх бородуукта, табаар гынан атыылыыр кыаллыбат.

Космоһы баһылааһыҥҥа, спорду сайыннарыыга ороскуоппут кыахпыт таһынан. Холобур, 2018 с. буолуохтаах футболга аан дойду күрэхтэһиитигэр 11 куоракка аарыма саҥа стадионнар, эргэлэри тупсаран оҥоруу үлэтэ бара турар. Хомойуох иһин бу көрүҥҥэ миэстэлэспэппит даҕаны. Дьэ көнөрбүт дуу?

Киһиэхэ тыыннаах буоларыгар аан бастаан аһа эрээри, тыа хаһаайыстыбатын сайыннарыыга бюджеттэн 1 эрэ бырыһыана бэриллэн кэллэ. Эбиитин бюджет үбүн уоруу, коррупция үгэннээн аҕай турар. Бюджекка эбии харчы киллэрэр туһунан дойду баайын атыылааһын салгыы барар. Быйыл «Роснефть» акциялара 19,5% тас дойду баайдарыгар атыыланна. Барыыстан дивиденд бөҕөнү үгүс сылларга ыла олордохторо. Баларын атыылаһар үптэрин киһи сүөргүлүөх, биһиги бааннарбытыттан ылбыттар. Өрөспүүбүлүкэбит салалтата 2014 с. «Алросаҕа» кыттыгас 7% акциябытын 50% тас дойдулар баайдара атыылаһан дивиденд бөҕөтүн сыл аайы ыла олороллор. Билигин салалта «Алроса-Ньурбаҕа» анаммыт 10% акциятын атыылыыр туһунан өйдөрүн сынньаллар. Дьэ маннык дьаһаныы түмүгэр баай уонна дьадаҥы икки арда аттар атар.

Былаас партията «Единэй Россия» эрэннэрэн кэлбит байылыат олоҕо кэлэрэ саарбах быһыылаах. Балаһыанньаны норуот сөптөөх, чиэһинэй быыбардарга бүттүүн кыттан эрэ көннөрөр кыахтанна.

 

С. ЕВСЕЕВ, тыыл, үлэ бэтэрээнэ.

Сунтаар.

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
1 + 4 =
Solve this simple math problem and enter the result. E.g. for 1+3, enter 4.