Доллар61.26 Евро72.24
+8 °С

"Тэтим" араадьыйа үлэтин тупсарыыга сүбэлэр

14:00 в 11.04.20180 39

Мин курдук сарсыарда араадьыйа холбонон истэр дьон, үгүстэрэ эрдэ турар сааһырбыт дьон, ыал ийэлэрэ эҥин «Тэтим» араадьыйа саҥа НВК салалтата үлэҕэ киириэҕиттэн ыла үлэтэ тубуста диэн санаалаахпын. «Эрдэһиттэр» диэн шоу-программаны диктордар, а.э. ыытааччылар сэргэхтик ыытар буолбуттара үчүгэй, сэргэх.

Араадьыйабыт үлэтэ өссө тупсара буоллун диэн мин маннык этиилэри киллэриэхпин баҕарабын.

Бастакыта. Биһиги тыа дьоно, уруккубутунан, араадьыйабыт холбоноотун кытта күн-дьыл туһунан истиэхпитин, хайдах күн буолуохтааҕын билэн баран күннээҕи үлэбитин былаанныырбытын, кыһын тымныыга туох таҥаһы таҥна сылдьыахпытын, сайын самыыр түһүөхтээҕин эрдэ билэн дьаһынарбытын сөбүлүүбүт. Ол иһин күн-дьыл, халлаан туругун эрдэ этэллэрэ наада. Бүлүү бөлөх улуустарын арҕааттан илиҥҥэ диэри ааттанар бэрээдэктэринэн кэһии баар. Холобура, «Сунтаарга, Ньурбаҕа, Бүлүүгэ, Үөһээ Бүлүүгэ» дииллэрэ хайдах эрэ географияны билбэт курдук иһиллэр. Ол да иһин Үөһээ Бүлүүлэр мөҕүттэн хаһыакка суруйа сылдьыбыттара да, ити алҕас көммөтүн курдук көммөт. Дьиҥинэн, «Бүлүү бөлөх улуустарыгар бүгүн Бүлүүгэ, Үөһээ Бүлүүгэ, Ньурбаҕа, Сунтаарга» диэн температура туругун бэрээдэгинэн иһитиннэриэххэ баар этэ, халлаан илинтэн сырдыырын быһыытынан. Уонна кыраадыһы хас улуус аайытын, тус-туспа этэллэрэ буоллар ордук этэ.

Иккиһинэн. Араадьыйа аһыллан, гимнэр тыаһаабыттарын кэннэ, саатар, нэдиэлэ саҕаланыыта Иван Степанов эбэтэр Саарын толоруутугар «Сахам сирэ барахсан» диэн И.Гоголев тылларыгар ырыаны холбоон иһитиннэрэллэрэ буоллар хайдахтаах курдук саҥа турбут үөрэн-көтөн, көтөҕүллэн чэбдик сарсыарданы үчүгэй настарайыанньалаах көрсүөх, нэдиэлэ устата саха буоларынан киэн тутта сылдьыах этэй. Кыаллар буоллаҕына, нэдиэлэ бүтэһигэр субуотаҕа эмиэ бу ырыаны иһитиннэрэллэрэ өссө ордук буолуох этэ.

Үсүһүнэн. «Геван» диэн биэриини аҕыйатыахха, күн аайы буолбакка, нэдиэлэҕэ иккитэ таһаарыахха. Урут даҕаны олус чаастатык биэрээччилэрэ суох этэ. Ити оннугар «Эргимтэ» диэн В.Т.Иванов лекциятын (бэсиэдэтин) нэдиэлэҕэ иккитэ, уһуна 20-лии мүн. итэҕэһэ суох көҥүллүөххэ. Урут Сэбиэскэй кэм саҕана Аан дойду балаһыанньатын ааҕар лектор элбэх буолара. Кинилэр үгүстүк тыа сирдэригэр сылдьан аан дойдуга туох буола турарын ырытан, дьон ыйытыыларыгар сиһилии эппиэттээн кэпсииллэрэ дьоҥҥо улахан сэргэхсийиини таһаарааччы. Билигин кинилэр суохтар. Сатаатар хаһыаттарга, дьон таптаан ааҕар бэчээттэригэр Аан дойду балаһыанньатын ырытыы суох. Ол иһин В.Т.Иванов биэрэр «Эргимтэтин» эбиэххэ уонна бириэмэтин уһатан биэриэххэ. Итиччэтигэр араадьыйаны сэргээччи, лекцияны истээччи лаппа эбилллиэ этэ.

Төрдүһүнэн. Саха араадьыйатыгар «Хайдах олороҕун, бэтэрээн» диэн саҥа рубриката аһыахха. Билигин Саха Республикатын үтүөлээх артыыһа Кирилл Семёнов нэдиэлэҕэ биирдэ «Ахтан-санаан ааһыахха» диэн ыытар биэриитэ хайдах эрэ аҕыйах курдук. Итини учуоттаан улуустар, нэһилиэктэр бэтэрээннэрин Сэбиэттэрин үлэлэрин сырдатар, бастыҥ уопуттарын пропагандалааһын быһыытынан олус туһалаах буолуоҕа. Бу биэриини, бастаан, нэдиэлэҕэ биирдэ таһааран боруобалыахха сөп этэ. Итини республика бэтэрээннэрин Сэбиэтин салалтатын кытта сүбэлэһэн бииргэ тэрийиэххэ.

Бэсиһинэн. Нэдиэлэҕэ хаста да эҕэрдэ ханаала үлэлиирэ үчүгэй, туһалаах. Бу биэриигэ кыттаары дьон бөҕө телефонунан эрийэ сатыыра буолуо да, уочарат элбэҕэ бэрт буолан кытыы, ыраах улуустар бытааран кыайан тиийбэт быһыылаахтар. Саатар, бириэмэтэ да кылгаһа бэрт. Бу биэриигэ субу-субу куораттан чугас баар дьон хас биэрии аайы эрийэн, билэр-билбэт дьоннорун эҕэрдэлииллэр, хайдах эрэ солуута суох курдук иһиллэр. Бу дьон сороҕор арыый туттунан, сыры аайы буолбакка, актыыбынастарын кыччаталлара буоллар, атыттарга тииһимньилээх буолуо этэ.

Алтыһынан. «Тускул билгэтин» күнүс эбиэт бириэмэтигэр эмиэ хатылаан биэриэххэ. Киһи эрэ барыта сарсыарда  6.30 ч. туран истибэт. Дьиҥинэн, Тускул билгэтин элбэх киһи истиэн баҕарара буолуо.

Этэрим элбэх этэ да, хаһыат страницата кэмчи. НВК үлэһиттэрэ бу мин этиилэрбин ааҕан, сыаналаан, ырыҥалаан баран, биирин эбит ылыныахтара диэн эрэнэбин.

 

Г. СОЛТУЕВ,

араадьыйа эрэллээх истээччитэ.

Бүлүү к.

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
2 + 0 =
Solve this simple math problem and enter the result. E.g. for 1+3, enter 4.