Доллар61.26 Евро72.24
+8 °С

Сэрии оҕолорун туһунан сокуон ылылынна

17:00 в 02.11.20180 15

Сэрии кэмин оҕолоро уһун кэмнээх туруорсуулара өйөнөн «Аҕа дойду улуу сэриитин оҕолорун 1945 с. балаҕан ыйын 3 күнүгэр сокуоннай саастарын ситэ илик гражданнары, социальнай өйөбүлү оҥоруу туһунан» сокуону Ил Түмэн VI ыҥырыылаах мунньаҕар бу дьыл балаҕан ыйын 26 күнүгэр ылыллан үөрүүбүт үлүгэр.

Сокуон сүрүн суолтата сэрии кэмин оҕолорун статустарын билинии буолар. Онон сэрии кэмин оҕолоро диэн саҥа бэтэрээннэр баар буоллулар.

Сокуону быһаарыы телевизорынан, араадьыйанан, хаһыаттарынан бэрт элбэхтик барда да, ким итэҕэйбэккэ, ким чопчулаары ыйытыктара элбэх.

Бастатан туран, сэрии оҕолоро диэн 1928-1945 с. балаҕан ыйын 3 күнүгэр диэри саастаах бэтэрээннэр буолаллар. Сэрии оҕолорун сокуона 2019 с. тохсунньу 1 күнүттэн киирдэҕинэ анал дастабырыанньа биэрэн туоһулуохтаахтар. Коммунист-депутаттар Ил Түмэҥҥэ бырайыак киллэрэллэригэр 1945 с. сыл бүтүөр диэри киллэрбиттэрэ да, ааспатаҕа. Онон Кыайыы 70 сылын көрсө «Сэрии оҕото» диэн мэтээли ылбыт уонна биһиги обществобытыгар киирбит бэтэрээннэр, биһиги тэрилтэбитигэр сылдьыахтарын сөп. Мин Россияҕа съезкэ эмиэ саллааттар сэрииттэн тута кэлбэтэхтэрэ, сүнньүнэн 1946 с. төннүбүттэринэн, 1945 сылы толору ыларга диэн этэн көрбүтүм да, ылыныллыбатаҕа.

Бэтэрээннэр сүрүн ыйытыылара социальнай өйөбүлү ким ыларый диэн. Биһиги көлүөнэ үксүбүт 30-40 с. үлэ ыстаастаах тыыл, үлэ бэтэрээннэрин сокуонунан льготалаахпыт. Олор сэрии оҕолоругар көрүллэр чэпчэтиилэр курдуктар. Онон Россия «Бэтэрээннэр тустарынан» сокуонугар олоҕуран, биир эрэ сокуон өҥөтүнэн туһаныахтаахпыт. Онон талар быраап бэриллэр.

Оттон ити ханнык да льготанан туһаммат 2600 бэтэрээн кимнээҕин депутаттарга улахан үлэ буолбатах. Ол эрээри үлэ бэтэрээнэ үлэ стаһа суох буолан ылбатах буоллахтара эбэтэр инбэлиит буолуохтара. Россия сокуоннарыгар сууттана сылдьыбатах эҥин диэн ыйыы баар буолааччы. Биһиэхэ оннук тоҕо ыйыллыбат? Социальнай пенсияны ылааччылар пенсиялара индексацияланан биһигини кытта тэҥ, ону аһара да элбэҕи ылаллар.

Дойду да, республика салалтата социальнай өйөбүл аадырыстаах буолуохтаах диэн ыйаллар. Ол эрээри оннук буолуо суох курдук.

Биһиги сэрии кэмин оҕолоро урукку сэбиэскэй хамнаһынан пенсияҕа тахсан үлэлээбэккэ пенсияҕа олоробут. Билигин пенсияҕа тахсан баран үлэлиир дьон 50-100 тыһ.солк. үрдүк хамнас ылаллар да, биһигини кытта тэҥ льготанан туһаналлар, тэҥ нолуогу төлүүллэр. Ол да иһин биһиэхэ тастан киирэр көмө, чэпчэтии олус күүтүүлээх. Онон Ил Түмэн бастайааннай комитетын бэрэссэдээтэллэрэ В.Чичигинаров телевизорга, араадьыйаҕа сэрии оҕолоро ый аайы 1000 солк. ылыахтара диэн этиитин үөрэ истэн, ону чуолкайдаһаллар.

Сэрии оҕолорун хаһыаттарга сокуону быһаарар нормативнай акталар тахсалларын көрүҥ. Оһуоба «Коммунист», «Забота-Арчы» хаһыаттары кэтэһиҥ. Биһиги сэрии сылын оҕолорун тэрилтэтэ сокуон олоххо киириитигэр үлэлэһиэхпит, салгыы туруорсуохпут.

Кыайыы 75 сылын үбүлүөйэ чугаһаата, онон республика саҥа бырабыыталыстыбата үбүлүөйү тэрийэр комиссия үлэтин сөргүтэрэ буолуо диэн куорат сэрии оҕолорун сүбэтэ бэйэтин көрүүлэрин дьүүллэһэн, бигэргэтэн тустаах тэрилтэлэргэ, республикатааҕы бэтэрээннэр сэбиэттэригэр, куорат баһылыга С.Авксентьева көрсүһүүтүгэр туттаран турабыт. Республикатааҕы комиссия бэрэссэдээтэлэ бигэргэттэҕинэ онно эмиэ ыытыахпыт.

Сэрии кэмин оҕолорун социальнай өйөбүллээх буолууларын болҕомто киинигэр тутуохпут.

Сэрии оҕолоро анал статустаммыппытынан миэстэҕэ хас биирдиибит үлэлиэҕин, биһиги аҕа көлүөнэ олорон ааспыт олоҕун эдэрдэргэ өйдөтүү, бэйэбит тус олохпутунан, үлэбитинэн холобур буола туруоҕуҥ.

 

Зинаида ВИНОКУРОВА,

Дьокуускай куорат

сэрии сылын оҕолорун

сүбэтин бэрэссэдээтэлэ.

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
2 + 11 =
Solve this simple math problem and enter the result. E.g. for 1+3, enter 4.