Доллар61.26 Евро72.24
+8 °С

Сайдабыт дэһэбит

09:37 в 29.10.20180 28

Саргылардаах сахаларбыт дэһэбит. Сайдабыт дэһэбит. “Сафронов аатынан” уулуссаҕа саха балаҕана иччитин сүтэрбит, санаарҕаабыт көрүҥнээх самналлан тураахтыыр...

Бу Алампа аатынан уулусса “Улица имени Софронова”  буолуохтааҕа да тоҕо эрэ “Сафронов”  буолан хаалбыт. Оттон балаҕаны Лааһар Афанасьев-Тэрис бокуонньук харытын күүһүнэн, эт илиитинэн туппутун билэбит. Кини Айыы Үөрэҕин киллэрэн сахалар да итэҕэллээхпит, былыргы дьыллартан баар төрүт култууралаахпыт, хайа да омуктан итэҕэспит суох, инники кэскиллээхпит диэри, дьону түмээри, туспа буруо таһаараары туппут балаҕана этэ. Дьон кэрэхсиир, сылдьар этэ, балаҕан көмүлүөгэ оттуллара, ураатыттан күөх буруо унаарара.

...Тэрис билигин суох, балаҕан аана аны аһыллыбат, ким да боруогу атыллаабат. Балаҕаны күрдьэр үһүлэр диэн буолла, көмүскэһэн көрөр баара биллибэт. Наар аанньа буоллубут – аны Арчы дьиэтэ умайда. Дьон бэккэ сылдьара, оһуохайдаан, оонньоон аралдьыйара, араас тэрээһиннэр быыстала суох ыытыллаллара. Ол эмиэ аны суох.

Оттон Дьокуускайбытыгар таҥара дьиэлэрэ күнү-ыйы бүөлүөхтүү, көмүс солотуу куупалларын мэҥэ халлааҥҥа өрө анньан ахан тураллар. Ким үбүнэн, хантан харчыланан тутуллубуттарай, үлэлии туралларый? Ис көстүүлэрэ силигин ситэ сиэдэрэй, көмүс солотуу, харах халтарыйар. Арай онно үлэлиир таҥара үлэһиттэрин майгылара наһаа “көмүс солотуута” суох быһыылаах: кыра оҕолору “дьээбэлээбитин” иһин биир тутаах үлэһиттэрэ сууттана сылдьар. Биһиги Кондаковпут, Тэриспит итинник буолбатах, ыраас өйдөөх-санаалаах дьон этилэрэ.

Ону ол диэбэккэ, улахан тойотторбут таҥара дьиэтигэр киирэн таҥараҕа үҥэллэрин телевизорга көрдөрөллөр, кинилэр Тэрис самнархай сахатын балаҕаныгар киириэхтэрэ дуо, сиргэнэн эрдэхтэрэ. Итинтэн да көстүбэт дуо тойон норуотун аанньа ахтыбата, сэниирэ? Ити майгы атын омуктарга бэриллэн эрдэҕэ, атаҕастабыл, туохха да холообот буолуу, сэнээһин итинтэн тахсыбат дуо?

Саха итэҕэлин тилиннэрэ сатыыр дьоммутун өйдөөн иһиттэххэ бары биири кэпсииллэр, норуоттарыгар үтүөнү баҕараллар, сомоҕолуу сатыыллар да, туох эрэ биллибэт күүс кинилэри чопчу биир санааҕа аҕалбат курдук. Таҥара үлэһиттэрин курдук кинилэргэ көмүс солотуулаах киэҥ, үрдүк уораҕай суох – кыра балаҕан баҕалаах. Маныаха суолта биэрэр, өйдүүр, сирдиир, норуотун быыһыыр киһи биһиэхэ көстүө дуо?

 

Иван БУРЦЕВ.

 

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
6 + 8 =
Solve this simple math problem and enter the result. E.g. for 1+3, enter 4.