Доллар61.26 Евро72.24
+8 °С

Санаабытын аһаҕастык этиэххэ!

16:15 в 12.11.20180 14

Россия дьонун аны бу кэмтэн ыла биэнсийэҕэ тахсар саастарын уһатан биэрдилэр. Бу дьаһалы Госдума дьокутааттара, үөһээҥи тойоттор өйөөтүлэр. Путин да туора турбата, сыыйа киллэрэргэ диэн сымнатан эттэ.

Ол курдук дьахталлар 63, эр дьон 65 саастарыгар биэнсийэҕэ тахсар буоллулар. Ол аата дьахталлар урут 50-гар тахсар буоллахтарына 13 сыл эбиллэн биэрдэ, эр дьоҥҥо 10 сылы эбэн биэрдилэр. Россия кыра-хара дьонугар улахан охсуулаах дьаһал ылылынна. Ордук биһиэхэ, тыйыс айылҕалаах Сахабыт сирин дьонугар букатын сөбө суох уураах буолла. Саха эр дьонун орто сааһа 67 эрэ, дьахталларбыт да онтон эрэ үрдүк. Оччотугар биэнсийэҕэ да тахсан дуоннааҕы абыраммат дьон буоллубут буолбатах дуо?

Бу дьаһалы утаран этии-тыыныы бөҕө, уулуссаҕа да тахсыталаабыттарын биллэрэллэр. Бу дьаһалы утарарбыт сөптөөх, уостан хаалбакка дьаныардаахтык утарсарбыт сөп этэ. Сахабыт дьоно күргүөмнээн, тойоммун-артыыспын диэн туора турбакка, болуоссаттарга тахсарбыт булгуччулаах курдук буолла. 5-6 сыллааҕыта “биһиги, Россия олохтоохторо, былаас сорох сыыһа дьаһалларын утаран уулуссаҕа күргүөмнээн тахсан бэйэбит санаабытын тоҕо этиэ суохтаахпытый?” диэн атын судаарыстыба дьоно араас сыыһа дьаһалы утаран, уулуссаҕа күргүөмнээн тахсан президеннэрин уураталларын туһунан суруйбутум.

Онтон ыла дьон өйдөөн, уулуссаҕа тахсар буолан эрэриттэн үөрэбин. Хаҥаласка химсобуоту тутаары тииспиттэригэр күргүөмнээн уулуссаҕа тахсан, ити бар дьоҥҥо иэдээннээх буолуон сөптөөх тутууну тохтоппуккут. Бу норуот улахан кыайыыта буолар.

Россия үрдүкү салалтата, Госдума дьокутааттара биэнсийэҕэ тахсар сааһы тоҕо уһатар дьаһалы ылыннылар? Ким буруйунан ылыннылар? Онно буруйдаах, мин санаабар, бу ааһан эрэр саастаах көлүөнэ тойотторо-хотуттара, дьокутааттара, араас бюджетнай тэрилтэ үлэһиттэрэ – быһата  государство үбүттэн хамнастанан олорор дьон буолаллар. Моорук буолуохтарыгар диэри олорбуттара, олороллор даҕаны. Үлэлээн хамнас ылаҕыт, ону таһынан биэнсийэ ыла олороҕут. Ол буруйгутугар боростуой ыал ыччата үлэтэ суох, төрөппүттэрин биэнсийэтинэн эбинэн олороохтууллар. Ону үөһэ дьаһалта таба көрөн, өйдөөн маннык хомолтолоох дьаһалы ылыннылар.

Бу туһунан суруйбутум үһүс сылын ааста. Кырдьаҕастар үлэлээн бүтүҥ, ыччакка үлэ миэстэтин таһаарыҥ диэн. Суох, ону өйдүүр дьон суох. Ити мээнэ тыллар буолбатахтар, барыта бэйэбититтэн тутулуктанар дьаһаллар тахсаллар. Брежнев курдук сатаан да саҥарбат, салҕалыы сылдьар буолуохтарыгар диэри дьүккүй да дьүккүй. Эбиитин биэнсийэ ыла олороҕут. Кэнэҕэски дьону кыһалҕаҕа тэппит эһиги буолаҕыт.

Онон бу биэнсийэҕэ тахсар сааһы үрдэтии кыра-хара киһи олоҕор улахан охсуулаах дьаһал буолла. Маны тохтотор биир эрэ суол баар: кыра-хара дьон бары биир киһи курдук уулуссаҕа күргүөмнээн тахсан, үрдүкү салалтаҕа санаабытын этиэхпитин наада.

 

Охчут ТАЛЫМАН.

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
3 + 7 =
Solve this simple math problem and enter the result. E.g. for 1+3, enter 4.