Доллар66 Евро73.22
+15 °С

Помостка – саха кэрэ куолара

09:33 в 30.05.20190 208

Ыам ыйын 3-4 күннэригэр Дьокуускай куорат 25-с нүөмэрдээх оскуолатыгар уус-уран гимнастикаҕа "Арктика эдэр талааннара" диэн Саха сирин уус-уран гимнастикаҕа федерациятын (президент Л.В.Николаева) тэрээһининэн бастакы чемпионат ыытылынна.

Мирнэйтэн, Нерюнгриттан тиийэ кэлэн үчүгэй талааннаах кыргыттар кытыннылар. Москваттан Ирина Винер-Усманова уус-уран гимнастикаҕа академиятыгар эрчиллэр Виолетта Никифорова-Иванова иитиллээччитэ Зарина Борисова кыттыыта спортсменнары уонна спорт бу көрүҥэр ыалдьар фанаттары улаханнык сэргэхситтэ.

Аан дойду бары күүстээх судаарыстыбалара бары кэриэтэ спорт бу көрүҥүн олус күүскэ биһирээн, ыччаты иитэр-үөрэтэр үлэҕэ күүскэ туһанан эрэллэр. Ирина Винер оскуолатын бүтэрбит кыргыттар Арассыыйа араас куораттарыгар спортивнай кулууптары арыйаннар, Арассыыйаҕа спорт бу көрүҥэ ордук бу кэлиҥҥи сылларга аһара популярнай буолла. Онон хаһааҥытааҕар да өссө күүстээх конкуренция үөскээтэ.

Биһиги Дьокуускайбытыгар үс-түөрт сыллааҕы таһымтан уус-уран гимнастика ураты үрдүк таһымҥа таҕыста. Дьокуускайга кэрэ куолар быһыыларын-таһааларын, кэрэ мөссүөннэрин, өйдөрүн-санааларын, ис-тас култуураларын сайыннарыыга, тупсарыыга хайы-үйэ үс-түөрт спортивнай кулууп үлэлиир. Бу спортивнай кулууптар доруобай спортивнай конкуренцияҕа олоҕуран күрэстэһиилэриттэн уус-уран гимнастика биһиэхэ Арассыыйаҕа ханнык баҕарар күрэхтэһиигэ кыбыстыбакка киирсиэххэ сөп таһымҥа хайы-үйэ  таҕыста.

Тренердэр: Виолетта Никифорова-Иванова, Любовь Бормонтова, Татьяна Шишигина, Анна Бронских, А,Аргунова, О.Яковлева үлэлэрин киһи сөҕө-махтайа, дуоһуйа көрөр. Хаһан эрэ саха кыыһа кэрэтинэн, имигэһинэн, быһыытынан-таһаатынан улуу судаарыстыбалар кэрэ куоларынаан тэҥҥэ киирсиэ диэн өйдөбүл биһиэхэ баара дуо? Ону бу уус-уран  гимнастика саалатыгар сылдьыбыттар, арааһа, спорт бу көрүҥэ күүскэ сайдан эрэрин үөрэ көрүүһүлэр. Оннооҕор биэс сааһыгар диэри улаханнык ыалдьар буолан медцентртан тахсыбатах Туйаара Кардашевская уус-уран гимнастиканан дьарыктанан үрдүк кылаастаах спортсменка, үөрэх бастыҥа, кэрэ куо кылааннааҕа буолан тахсыбыта. Итинник спорт бу көрүҥэ кыыс оҕоҕо туһатын Дьокуускайга дьарыктанар оҕолор историяларыттан бэрт элбэҕи кэпсиэххэ сөп.

Сахалар хайаан да олимпиеһы да ииппэтэхпитинэ, син биир уус-уран гимнастикаттан ийэ буолан ыччаппытын тэнитэр-ууһуур аналлаах кыыс оҕо доруобуйатын, кэрэ көстүүтүн тупсарыыга барыстанарбыт быдан элбэх буолсу диэн суоттаатым. Ол эрээри билигин хайы-үйэ Виолетта Никифорова-Иванова кыргыттара кэлиҥҥи сэттэ олимпийскай оонньуулар кыайыылаахтара Арассыыйа Олимпийскай эрэллэрэ оскуолатыгар хас эмэ тыһыынчанан кыргыттар ортолоругар сиидэлээһини ааһан, Настя Яковлева Россия үтүөлээх тренерэ Надежда Шаталинаҕа, Кристина Ксенофонтова групповой үҥкүүгэ Россия үтүөлээх тренерэ Елена Нефедоваҕа, Зарина Борисова олимпийскай чемпионка Ксения Дуткинаҕа Ирина Винер бэйэтин академиятыгар эрчиллэ, үөрэнэ сылдьаллар. Бэйэлэрин группаларыгар өрүү үс иһигэр киирэллэр. Араас улахан күрэхтэһиилэргэ хайы-үйэ миэстэлэһэллэр. Онон буолаары турар олимпийскай оонньуулар кэннилэриттэн кэлэр олимпийскай циклга уус-уран гимнастиканы сөбүлээччилэр саха кыыһын олимпийскай оонньууга кытыннараары иннэ, бүргэс үрдүгэр олорор күммүт эмиэ кэлиэн сөп.

Маннык дьахтар спордугар Виолетта Иванова үктээбит кыһыл көмүс ыллыгын салгыы тэрийиигэ анаан, аҕыйах сыллааҕыта правительство бэрэссэдээтэлин солбуйааччы Феодосия Габышева көмөлөһөөччүтүнээн кэпсэтэн турабын. Кини манныгы кэпсээбитэ: Үөрэх министринэн олорон бастаан Евгения Исаевна Михайлова саҕалаабыт "Талааннаах оҕолор" программатын Феодосия Габышева салҕаабыта. Онно билиҥҥи спорт министрэ Иннокентий Юрьевич Григорьев, Владимир Николаевич Фролов, Афанасий Семенович Владимиров туруорсууларынан спортка талааннаах оҕолору эмиэ үөрэххэ ыыталаабыппыт. Ол иһигэр Виолетта Иванова эмиэ хабыллыбыта. Оччолорго кырачаан Виолеттаны Иннокентий Юрьевич: "Олимпиец буолбатаҕына спорт бу кэрэ көрүҥүн Сахабыт сиригэр тренер быһыытынан үлэлээн көмөлөстөҕүнэ да саха кэрэчээнэ куоларын иитиигэ улахан дьыаланы оҥоруо", – диэбитин күн бүгүҥҥү балаһыанньаны министр уот харахха эппит эбит диэн дьон кэпсэтэр буоллулар. Өссө кини министр буолуута уус-уран гимнастика базатын хаҥатан анал спортзаллары тутууга үтүө өттүктэниэ, диэн төрөппүттэр уонна бу спорт фанаттара күлүктэригэр имнэнэллэр.

Спортсменнар үөрэнэр ороскуоттарын аҥаарын оччолорго бүтсүөт уйуммута. Уус-уран гимнастикаҕа Виолетта Иванованы оччолорго уус-уран гимнастика федерациятын Саха сиригэр бастаан төрүттээбит президенэ, "Алмазы Анабара" ОАО тэрилтэ генеральнай директора Матвей Николаевич Евсеев уйуммута. Оччолорго уус-уран гимнастика федерациятын М.Н.Евсеев таһаарыылаахтык салайара. Билигин киниттэн ити дуоһунаһы уруккута Саха Республикатыгар спортивнай үҥкүү чемпионката Людмила Валерьевна Николаева ылан, үлэни-хамнаһы бэркэ күөдьүтэн эрэрин туһунан кэпсээтим.

Күндү ааҕааччыам, бука баһаалыста бырастыы гын, үлүһүйэн кыратык күрэхтэһиибититтэн халыйан хааллыбыт.

"Арктика эдэр талааннара" күрэхтэһиигэ Нерюнгриттан В.Кузнецова, А.Онищенко, Мирнэйтэн Н.Пахомова, К.Якуббо күүстээх спортсменнары аҕаланнар күрэхтэһии күүрээнин өссө күүһүртүлэр. Групповой үҥкүүгэ биэс бөлөххө күрэхтэстилэр. Онтон үһүгэр Виолетта СК кыргыттара бастаан, кыһыл көмүс мэтээлинэн наҕараадаланнылар. Иккитигэр Нерюнгри, тренер Онищенко уонна Дьокуускайтан  Татьяна Шишигина кыргыттара биирдии бөлөххө кыайдылар.

Биирдиилээн сааһынан уонна эрэсирээтинэн күрэхтэһиигэ уон бөлөхтөн сэттэ кыһыл көмүс мэтээли Виолетта СК,  Нерюнгри тренер Онищенко уонна Дьокуускайтан тренер Татьяна Шишигина, Мирнэйтэн тренер Пахомова биирдии кыһыл көмүс мэтээлгэ тигистилэр. Бу аан бастаан ыытыллар "Арктика эдэр талааннара" диэн күрэхтэһиигэ саамай элбэх баалы иккис миэстэлээх спортсментан тоҕус баалынан атан 53 баалы ылбыт москвичка Зарина Борисова хомуйда.

Ааҕааччыбар анаан эттэххэ: спорт бу олус кырасыабай, кэрэ, умсугутуулаах көрүҥэр күрэхтэһиилэри көтүппэккэ кэлэн көрөргөр уонна кырачаан кыыс оҕолоох буоллаххына эрчиллэргитигэр ыҥырабыт.

 

Арамаан ДЬӨГҮӨРЭП.

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
2 + 0 =
Solve this simple math problem and enter the result. E.g. for 1+3, enter 4.