Доллар61.26 Евро72.24
+8 °С

Муударай эмээхсин

14:56 в 30.10.20180 16

Биһиэхэ, Кытаанах нэһилиэгэр, Сөдүөт уонна Өлөөнө Махсыымаптар диэн 4 уоллаах, ытыктанар кырдьаҕас ыал бааллара. Сөдүөт бэрт аҕыйах саҥалаах, сөбүлээтэҕинэ күлэн мүчүйэн кэбиһэр, көрсүө-сэмэй майгылаах, ааттаах уус, үлэһит оҕонньор этэ. Ол оннугар ойоҕо Өлөөнө олус сытыы-хотуу, быыһыгар көрдөөх, уус-уран тыллаах-өстөөх, аламаҕай бөҕө, дьаһаллаах эмээхсин этэ. Кинини судургутук Махсыымап Өлөөнө эбэтэр Сөдүөт Өлөөнөтө диэн ааттыырбыт.

Арай биирдэ биир урууга киниэхэ эдэрдэргэ эҕэрдэ баҕа санаатын этэригэр тыл биэрдилэр. Өлөөнө уоһун-тииһин оҥоһунна уонна үгэс курдук бары үчүгэйи баҕарда. Онтон аныгы дьахталларга туһаайан сэмэлиир-сүбэлиир икки ардынан кутан симэн барда.

– Дьэ, бу аныгы дьахталлар сатаналар эрдэрин төрүт аанньа ахтыбат буолан иһэллэр. Тэҥ бырааптаахпыт дии-дии наһаалыыр буоллулар. Эрдэрэ биирдэ эмит холуочук, итирик кэллэҕинэ сорохтор букатын өлөн эрэрдии кэбинэллэр. Мөҕөн-этэн, этиһэн, хаһыытаан-ыһыытаан бараллар. Сороҕор төрүт даҕаны дьиэҕэ киллэрбэттэр. Ол иһин эрдэрэ дьиэлэригэр кэлбэккэ онно-манна, хочуолунайга, атын ыалларга эҥин хоноллор, атын дьахталларга да бараллар. Оннукка хайа киһи кыыһырбат буолуой? Ол итирбит, холуочук киһини кытары тыл аахсан, кыыһырсан, өйдөтө сатаан туох туһата кэлиэй?

Көрүҥ эрэ, мин оҕонньорум Сөдүөт эдэригэр сороҕор ыалга эҥин үлэлээн баран хойутаан, холуочук, улаханнык мөлтөөн кэлитэлиир буолара. Онуоха мин төрүт кыыһырааччым суоҕа. Киирээтин кытары "оо, дьэ, Сөдүөт, сыччыый, олус даҕаны мөлтөөбүккүн. Хата бэйэҥ кэлээхтээбиккин" дии-дии таҥаһын устан ыйыы охсоот, бокуойа суох хоһугар дьөгдьөрүтэн киллэрэрим. Ол кэннэ таҥаһын устан бэлэм ороҥҥо тиэрэ баттаан сыһыарбытынан барарым уонна бэйэм эмиэ сыгынньахтана охсоот хоонньоһо сытынан кэбиһэрим (дьон күлсэ түһэллэр). Сатаналар, итиннэ киһи күлэрэ туох баарый?! Айылҕа буоллаҕа дии. Чэгиэн, эдэр киһи төһө даҕаны холуочук, итирик буоллаҕына таптыыр дьахтара кууһан, сыстан, сыллаан бардаҕына, сыыйа уоскуйар арыый өйдөнөр уонна салгыы утуйан буккураан хаалаахтыыр буоллаҕа дии (дьон өссө күлсэн ньиргиһэллэр). Ар-дьаалы! Бэйэ сокуоннай эрин кытта хоонньоспукка туох кыбыстыы баарый? Эһиги, бэрт дьахталлар, эргитин кытта бииргэ сыппаккыт, таптаспаккыт буолуо да? Оннук гынаммын кыыһырбакка эрэ өйдөтөн, сүбэлээн, Сөдүөтүм арыгыһыт буолбатаҕа. Онон оҕо-уруу төрөтөн, көрөн истэн, ыал-дьон оҥортоон баччааҥҥа диэри эйэ дэмнээхтик олорон кэллэхпит дии. Арай онно сытыарбакка, көрбөккө-истибэккэ, кыыһыран-абаран, хааһыытаан көрсөрүм буоллар, баҕар, икки ардыбыт атан, киһим иһэн-аһаан да барбыт буолуон сөп этэ.

Хотуой (кийиит аатын этэр), эн эриҥ биирдэ эмэ "аһаан" кэллэҕинэ тулуйар, мээнэ тута мөхпөт буол. Дьоллоох соргулаах ыал буолуҥ, – диэн Сөдүөт Өлөөнөтө уһун синньигэс, көрдөөх, үөрэтиилээх-такайыылаах этиитин түмүктүүр.

 

Социальнай ситимтэн.

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
5 + 9 =
Solve this simple math problem and enter the result. E.g. for 1+3, enter 4.