Доллар61.32 Евро75.65
-1 °С

Кутталлаах өттүнэн дьайыы

15:31 в 11.04.20180 72

“Кыым” хаһыат бу сыл олунньутун 1 күнүгэр тахсыбыт “Матриархат” уонна эр дьон алгыһа” диэн Сур суоллаһан таһаарбыт ыстатыйатыгар тус көрүүлэрбин ааҕааччы болҕомтотугар таһаарабын.

Дьахтар биһиэхэ баһылыыр-көһүлүүр оруолу ылбыта быданнаата. Ити, биллэн турар, улахан кэхтии бэлиэтэ буоларын туһунан мэлдьи суруйааччыбын. Инньэ гынан элбэх дьахтартан туора көрүллэбин.

Сур бэлиэтээбитин курдук кыыс оҕо уол оҕотооҕор эрдэ ситэр, эрдэ өйүн тутар, кыра эрдэҕинэ уоллааҕар ордук көссүө, сэмэй, истигэн. Инньэ гынан үөрэҕэр ордук ситиһиилээх, үөрэҕи уолаттардааҕар ордук ылынар. Билиҥҥи үөрэх кыыска эрэ аналлаах курдук буолан тахсар. Кэлиҥҥи кэмҥэ үрдүк үөрэхтээх уол ыччаппыт биллэ аҕыйаата. Ити норуот дьылҕатыгар куһаҕан, кутталлаах өттүнэн дьайыыта олус улахан диэн сыаналыыбын.

Дьахтар баһылыыр-көһүлүүр  оруолу ылбыт сүрүн биричиинэлэринэн мин манныктары ааҕабын:

1. Зигмунд Фрейд психоаналиһын сүрүн тосхоллоро этэллэринэн, туох-баар дьон икки ардыгар баар сыһыаннаһыылар сүрүн хамсатар күүстэрэ дьон сексуальностарынан быһаарыллар эбит.

Ол курдук аныгы ыччат сүрэҕэ суоҕа уонна билиитэ-көрүүтэ татыма бэрт буолан дьахтарын (ойоҕун) сиэкис өттүнэн астыннарбат. Билиҥҥи ыччат культурата намыһаҕыттан даҕаны уонна ити үөһэ этэн аһарбытым курдук сүрэҕэлдьээн даҕаны дьахтарын өр соҕус имэрийэн-томоруйан, сыллаан-уураан баҕатын уһугуннарар өйө суох. Ыксалынан укта да түһэрэ охсон кэбиһэр уонна улаҕа хайыһан баран эбээһинэһин толорбут киһи быһыытынан үөрэ-көтө утуйан буккураан хаалар. Оттон ойоҕо эрэйдээх тугу да өйдөөбөккө хаалар, устунан били күнү быһа астыныыны көһүтэ сылдьыбыта туоҕа да суох хаалбытыттан хаана алдьанар, киҥ-наар буолар, сарсыныгар туран киһитин сыппах быһаҕынан аалар.

Киһитэ буоллаҕына атыннык сатаабат, инньэ гынан мэлдьи буруйдаах курдук умса көрө сылдьар, устунан арыгылаан барар. Тоҕо диэтэххэ кыра соҕус холуочук кэмигэр били “үлэтэ” син санаатыгар уһуур курдук, дьахтара син барбах да буоллар хаһан эмит син астыммыт курдук буолар. Ол эрээри арыгы барахсан биһигинньик сордоохтору өр гыныа дуо – начаас арыгыһыт буолан хаалабыт, устунан ойохпутуттан арахсан муор-туор дьон ахсааныгар киирэбит. Кэнники сылларга арахсыы элбээбитин статистикаттан көрөн киһи барыта билэр курдук.

2. Дьахтар аймах үксэ үөрэхтэннэ. Тоҕо үөрэҕи кини түргэнник ылынарын үөһэ быһаарбытым. Уол мэнигэ бэрт буолан үөрэҕи ылыммата, онуоха эбии кэнники сылларга учуутал үксэ кыыс оҕо, ол кыыс оҕону уол аптарытыаттаабат, тылын истибэт, инньэ гынан үөрэҕэр мэлдьи мөлтөх аатырар. Үөрэҕэ суох буолан уолаттарбыт муҥутаан хара үлэ диэҥҥэ сылдьа сатыыллар, онтулара да билиҥҥи эстии-быстыы кэмигэр букатын суох буолла. Бэйэ дьыалатын аһан, эбэтэр сүөһү-ас тутан үлэлиэҕин ыччаппыт сүрэҕэ суоҕа бэрдэ баһыйар, инньэ гынан үлэ суох диэн баран саамай сатыыр үөрүйэҕинэн утуйан хаалар. Үөрэхтээх дьахтар син үлэ булан үлэлиир буоллаҕына эрэ үлэ суох диэн таах сылдьар, айах адаҕата буолар.

Дьиэ кэргэҥҥэ аҕа аптарытыата ол иһин букатын түспүтэ ыраатта. Уонна өтөрүнэн итинник быһыы-майгы билиҥҥи былаас баарын тухары уларыйбата буолуо.

 

Ю.В. Мекумянов, үлэ бэтэрээнэ, Россия үөрэҕириитин туйгуна,

Сунтаар нэһилиэгин ытык олохтооҕо.

Выбор читателей

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
1 + 0 =
Solve this simple math problem and enter the result. E.g. for 1+3, enter 4.