Доллар61.26 Евро72.24
+18 °С

Киһини кыынньыыр түгэннэр

10:45 в 11.04.20180 16

Бөтүүк сыла биһиги олохпутугар ыараханнык үктэнэн ааста. Онно эбии сыл бүтэһигэр олох бытархайдарынан биһиги маннык итэҕэстээхпит-быһаҕастаахпыт диэн туохха суҥхарыахха сөбүй? Оттон олох бытархайдартан турарын бары даҕаны удумаҕалаан эрдэхпит дии.

Соҕотох киһи олох очурун-чочурун көннөрбөтүн биллэрбин даҕаны, мин көннөрү дьиибэргээбит суолбун этэбин. Наар кыынньа, кыйахана сылдьар киһи дии санаамаҥ.

Сыл бүтэһигэр дьону таһар автобустар үлэлэрин көрөн-истэн дьүүллээн баран, кыайыылаах быһыытынан (киһи даҕаны сонньуйар) 35-с нүөмэрдээх маршруту бириэмийэлээтилэр. Былырыын 17-с нүөмэрдээх ылбыт үһү. Мин  автобуһунан күннэтэ сылдьар киһи көрүүбэр бу маршрут кэнниттэн 1 миэстэни ылыахтаах этэ. Тоҕотун «Кыым» хаһыат 27.11.14 с. нүөмэригэр «Дьону эрэйдиир автобустар» диэн төбөлөөх иһитиннэриини сэргээччи булан аахтын. Дьиҥэр бириэмийэни уочараттаһыы бэрээдэгинэн буолбакка, онно олорон айанныыр дьонтон ыйытык оҥорон эрэ баран бэриллиитэ сөптөөх буолуо этэ.

Киһини кыынньыыр сахалыы биллэрии (автобуска) тахсыбыта хаһыс да сыла буолла. Бу ааспыт сылга онуоха эбии иккис биллэрии таҕыста. Уоруйахтартан, түөкүттэртэн сэрэтэр биллэрии тахсарын эҕэрдэлиэххэ эрэ сөп эрээри, моһуога диэн эмиэ саха төрүт-уус дорҕооннор баалларын сааһыгар истибэтэх, киһиэхэ аахтараллара истэргэ эчи толооһун баҕаһын! Бу туһунан төһөлөөх этилиннэ, сурулунна этэй? Ол эбэтэр – “ҥ” дорҕоон сахалыы алпаабыттан туллан түһэн хаалбыта эбитэ дуу?

Урут, билигин үөҕэр сэбиэскэй кэммититигэр, күн-дьыл билгэтин биир сиртэн ыларбыт уонна ол информацияттан халбаҥнаабат буоларбыт. Араадьыйаҕа сарсыарда 6 ч. оройуоннары барыларын ааттаталаан туран биэрэллэрэ. Билигин: араадьыйаҕа өрөспүүбүлүкэ Хотугу, Соҕуруу, Арҕаа, Илин эҥэрдэргэ сарсыарда уонна күнүс диэн арааран биэрэллэр. Онуоха күнүһүн аһара сылытан кэбиһэллэрэ баар. Холобур, быйыл Дьааҥыга сарсыарда -51, күнүс -37 буолар диэтилэр. Дьокуускайга күнүс -42 буолан турдаҕына -37 буолар диэтилэр. «Кыым» хаһыат билгэлээһинин таһаарымыахха да баара. Ити курдук хаһыат, араадьыйа, тэлэбидиэнньэ, интернет, уулуссаҕа ыйаммыт электр. термометрдар талбыттарынан арааһы туойа олороллор.

 

Оҥку.

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
4 + 3 =
Solve this simple math problem and enter the result. E.g. for 1+3, enter 4.