Доллар64.07 Евро72.24
-8 °С

Ил Түмэн депутаттара, суобаскыт оонньообот дуо?

09:02 в 26.03.20190 285

Ил Түмэн кэтэһиннэрэн-кэтэһиннэрэн, “ытатан-соҥотон” баран дьэ сэрии сылын оҕолорун туһунан сокуону ылынан олоххо киллэрэн эрэр. Сэрии кэмигэр оонньооботох оҕо сааспыт сыаналамматыгар бары үтүө эбиппит, умнууга хаалларбатылар диэн махтал тылларын этиэ этибит.

Ол гынан баран, бу сокуонтан сорох дьон хомойуох курдук балаһыанньалаахтар. Ол туохтан диэтэххэ сокуоҥҥа сэрии сылын оҕолорунан 1945 сыл балаҕан ыйын 3 күнүгэр диэри сокуоннай саастарын сиппэтэх дьон ааҕыллаллар диэн суруйбуттар. Балаҕан ыйын 4 күнүгэр сокуоннай сааһын сиппит киһи сэрии сылларын оҕотунан ааҕыллыбат, били 1941 сыл бэс ыйын 2 күнүттэн 1945 сыл балаҕан ыйын 3 күнүгэр диэри эрэйи эҥээринэн тыырбыта, аччыктаабыта, тоҥмута, барыта сотуллан хаалар.

Аны сэрииттэн саллааттар сэрии бүтэрин кытта субуруһан дойдуларыгар тиийэн кэлбэтэхтэрэ, биир эмэ киһи 1945 сыл бүтүүтэ дойдутугар эргиллибит да буоллаҕына илиитэ-атаҕа суох, онон-манан буулдьа тэһитэ сүүрбүт инвалид дьон кэлбиттэрэ. Ол дьон кэлэн дьонун олохторун тупсара охсубуттара буолуо дуо, саарбах, сороҕор кыһалҕаларын дьөссө дириҥэттилэр ини.

Сэриигэ кыттыбыт дьон маассабайдык 1946 сыллаахтан дойдуларыгар төннүбүттэрэ. Ол саҕана сорох дойдуларга Советскай Союз сэриигэ улаханнык алдьанна-кээһэннэ, мөлтөөтө, оттон Гитлер сэриитэ үлтүрүтүлүннэ, онон тутуу былдьаһан Советскай Союһу эһэн кэбиһиэххэ диир политиктар баалларынан Советскай Союз салалтата сэрэхэдийэн армиятын сэрии бүтэрин кытта ыһан кэбиспэтэҕэ.

“1945 сыл балаҕан ыйын 3 күнүттэн 1946 сыл тохсунньу 1 күнүгэр диэри сокуоннай саастарын сиппит төһө киһи билигин тыыннаах сылдьарын ааҕан көрдүгүт дуо?” – диэн Ил Түмэн депутаттарыттан ыйытыаҕы баҕарыллар. Бука республика бюджетыгар улахан ороскуоту аҕалар үгүс ахсааннаах дьон хаалбатахтара буолуо дии саныыбын. 1927 сыллаахха төрөөбүттэр билигин 92 саастаах дьон буоллахтара дии.

Дьиҥэр ити дьон бары тыыл ветерана буолан ЕДВ ыла сылдьар буолуохтаахтар, онон бу сокуон олоххо киирэр условиетын быһыытынан төрүт да бюджетка ороскуоту оҥорбот буоллахтара. Ааттара эрэ ааттаныа этэ, кырдьаҕастарга кыра да наада, бэйэм балайда кырдьыбыт киһи ону билэбин дии саныыбын.

Аны бу сокуон олоххо киирэр условиетын үөһэ ахтан аһардым уонна бу условие туһунан бэйэм санаабын этэргэ сананным.

Сэрии сылларын оҕото аатыран ыйга 1000 солкуобайы ылыахтаах этибит. Онтубутун тыыл ветераннара ылбат үһүбүт.

Мин 87 сааспын, кэргэним 85 сааһын туоллубут, онон иккиэн тыыл ветераннара буолан электричествобыт, газпыт төлөбүрүгэр льготалаахпыт, ЕДВ ылабыт. Онон абыранабыт. Россияҕа тыыл ветераныгар 1931 сыллаахха диэри төрөөбүттэри киллэрэллэр дииллэр, биһиги республикабытыгар 1935 сыллаахтары хабан туран киллэрэллэр, ити бастакы президеммит М.Е.Николаев өҥөтө, үтүөтэ. Сорохтор баҕар иҥсэлээх оҕонньор быһыылаах диэххит да буоллар бу төлөбүрдэр тустарынан мөккүһээри гынабын.

ЕДВ диэн өҥөнү сэрии сылларын бириэмэтигэр оҕо сылдьан колхозка араас үлэлэри үлэлээбитим иһин ылабын. Ол курдук от мунньарым, кэбиһиигэ оҕуһунан бугуллары таһарым, сонуок сирин булуугунан тиэриигэ оҕус сиэтэрим, бурдук хомууругар үлэлиирим, моҕотойдоон, маттаҕалаан тириилэрин государствоҕа туттарарым уо.д.а.

Оттон билигин сэрии сылын оҕото аатыран ыйга 1000 солкуобай сэрии сылларыгар аччыктаабытым, ынах тириитэ аан бүрүөһүнүн уокка үтэн сиэбитим, нэһиилэ Америка бурдугун куулун булан ыстааннана, ырбаахылана сылдьыбытым иһин ылыахтаах этим. Ону биэрбэт эбиккит. Кыратык суобаскыт оонньообот дуо?

Тимофей АДАРОВ,

тыыл, үлэ ветерана.

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
3 + 3 =
Solve this simple math problem and enter the result. E.g. for 1+3, enter 4.