Доллар61.26 Евро72.24
+8 °С

Эппиэккитин күүтэбин

09:10 в 12.11.20180 29

Ленинскэй комсомол 100 сыллаах үбүлүөйдээх сылыгар республика олохтоохторо ил дарханы уонна Ил Түмэн VI ыҥырыылаах болдьоҕор үлэлиэхтээх депутаттарбытын таллыбыт. Маны сэргэ республика интэриэһин Федерация Советыгар көмүскэтэ Ил Түмэттэн Александр Константинович Акимовы, ил дархан уонна правительство аатыттан Егор Афанасьевич Борисовы бастайааннай төрүккэ Москва куоракка олорон үлэлииргэ кыах биэрдилэр.

Быыбардааччылар эдэр ил дархан А.С.Николаевтан уонна нэһилиэнньэ бары араҥатын көмүскүөх буолан итэҕэтэн мандат ылбыт депутаттарбытыттан Штыров Борисов курдук республика баайын уҥа-хаҥас атыылаан ыспакка хаалбыт баайбытын, сирбитин-уоппутун харах харатын курдук харыстыахтара, туох баар ылынар дьаһаллара норуоттарын харыстааһыҥҥа туһуланыаҕа диэн эрэнэ күүтэллэр.

 

Быыбардааччылар эрэллэрэ туолуо дуо?

 

Егор Борисов Федерация Советыгар үлэтин бастакы күнүн туһунан: «Федерация Советын салалтата олус итиитик көрүстүлэр. Үгүс истиҥ-иһирэх тыллардаах эҕэрдэлэр этилиннилэр. Федерация Советын салалтата миэхэ агропромышленнай комплекс, экология уонна айылҕа харыстабылын, балык промышленноһын боппуруостарынан дьарыгырарбар сорудах биэрдилэр. Онон саҥа үлэм эйгэтин бу иннинэ үлэлээн кэлбит үлэм салгыытын курдук көрөн туран, төрөөбүт республикам дьонун-сэргэтин интэриэстэрин көмүскээһиҥҥэ, олохторун таһымын үодэтиигэ туох баар күүспүн, билиибин ууран үлэлиэҕим», – диэн эрэннэриилээх тыллары ватсап нөҥүө тарҕатан үөртэ.

Саха норуотун, ол иһигэр Бүлүү бөлөх улуустар бары кыһалҕаларын үрдүкү былааска быһаартарыах буолан эрэннэрэн А.К.Акимов иккистээн Ил Түмэҥҥэ депутатынан талыллаат, куолутунан депутат мандатын атын киһиэхэ туран биэрэн баран, Федерация Советыгар иккис төгүлүн сахалар ааттарыттан көтө турбута.

Республика ил дархана А.С.Николаев хас биирдии киһи олоҕор, доруобуйатыгар быһаччы дьайар экология боппуруоһун таба тайанан, киэҥ ис хоһоонноох Ыйаахха илии баттаата. Манан сибээстээн Ил Түмэн депутаттара сир баайын хостуур тэрилтэлэр улаханыттан кыратыттан, бас билии форматыттан тутулуга суох республика үрдүкү салалтатын дьаһалларын билинэр, нэһилиэнньэ иннигэр эппиэтинэстэрин үрдэтэр сокуоннары ылынан, Ыйаах олоххо киириитин хааччыйар инниттэн былаас бары салааларын түмэн, өйү-санааны холбоон үлэлиэхтэрэ, депутаттар ылыммыт сокуоннара туолуутугар принципиальнай сыһыаны көрдөрүөхтэрэ дии саныыбыт. Ону таһынан Годумаҕа депутатынан урукку правительствобыт председателэ Галина Иннокентьевна Данчикова, Федерация Советыгар талыллыбыт депутаттар Вячеслав Штыров саҕана вице-президент курдук улахан дуоһунаһы сүкпүт Александр Константинович Акимов, республика президенинэн, кэлин ил дархан дуоһунастарыгар үлэлээбит Егор Афанасьевич Борисов аан бастаан талан ыытыы республика быыбардааччыларын иннилэригэр сирэй эппиэтинэһи сүгэллэрин ирдиир бэрээдэк олохтонуохтаах дии саныыбын.

Хомойуох иһин кэлиҥҥи кэмҥэ Госдума Федерациятын Советыгар талан ыыппыт депутаттарбыт норуоттарыттан тэйэн, былаас партиятын ыйыытын толорооччуларга кубулуйбуттара кистэл буолбатах. Маннык быһыы тохтотуллуох кэриҥнээх.

Кырдьык даҕаны Е.А.Борисов, А.К.Акимов курдук улахан таһымнаах дьону Россия салалтатыгар ыытан дьэ табыллар дьон буоллубут диэн күлүкпүтүгэр имнэнэн эрдэхпитинэ… Үрдүкү сололоох сенатордарбыт норуоттарын иннигэр андаҕар курдук эппит тылларын дорҕооно сүтэ илигинэ Россия норуота, ол иһигэр Саха сирин олохтоохторо, Путин-Медведев пенсияҕа тахсыы сааһын уһатан биэрэр туһунан сокуоннарын тула айдаан сири-сибиири ылан кэбиспитэ. Боростуой норуот пенсия сааһын уһатыыны утаран талбыт депутаттарыттан, сенатордарыттан көмө көрдөөн, былаас омсолоох дьаһалын утаран уулуссаҕа тахсан утарар куолаһын иһитиннэрэ сатаан маассабай хамсааһыны ыытарга күһэллибиттэрэ.

Маннык усулуобуйаҕа Федерация Совета Путин-Медведев сокуонун дьүүллэһиитигэр Орловскай, Ивановскай, Ульяновскай уобаластартан, Забайкальскай кыраайтан барыта 5 сенатор норуот туруорсуутун өйөөн, сокуону утары тыл эппиттэрин уонна куоластаабыттарын интернети туһанааччылар толору бигэргэтиэхтэрэ. Итинник дьиҥ чахчы норуоттарын көмүскээбит геройдарга тэҥнээтэххэ, дойдуларыгар салгыны күүскэ хамсатан тылларыгар туруох буолбут биһиги дьоммут биир-биэс тыла суох Путин-Медведев сокуонун икки илиилэринэн куоластаан, билиҥҥи былаас эрэллээх хорохоотторо буолалларын өссө төгүл дакаастаатылар, дьиҥнээх сирэйдэрин арыйан көрдөрдүлэр. Дьэ, ол кэннэ бу дьоммутун өрө тута сылдьыаҕыҥ. Манан сибээстээн өйдөммөт боппуруостар үөскээн тахсаллар.

Бастатан туран, ил дархан А.С.Николаев Е.А.Борисовы Федерация Советыгар атаарарыгар былаас киллэрбит сокуонун өйөө диэн сорудахтаан ыыппыта дуу, эбэтэр Е.А.Борисов ил дархантан ыйыта, сүбэлэһэ барбакка бэйэтин эппиэтинэһигэр ылынан норуотун санаатын, туруорсуутун сиргэ-буорга тэпсэн туран былаас киллэрбит сокуонун өйөөтө дуу?

Иккиһинэн, Ил Түмэн аатыттан, ол эбэтэр норуот талан ыыппыт депутаттарыттан сөбүлэҥ ылан туран А.К.Акимов пенсия сааһын үрдэтиини сөбүлээн норуотун утары куоластаата дуу?

Онон ил дархан А.С.Николаев, Ил Түмэн председателэ П.В.Гоголев саҥа ананан тиийбит сенатордарбытын кытары сөбүлэһэн, итинник сааттаах, норуоту таҥнарыы туһунан сокуону Саха сирэ өйөөбүтүн быһааран биэрдэххитинэ табыллар буолла дии саныыбын. Эбэтэр Россияны салайсар быраап биэрбит дьоммут кими да кытары сүбэлэспэккэ хара маҥнайгыттан талбыттарынан барбыт буоллахтарына ил дархан бэйэтин Ыйааҕынан, Ил Түмэн сессия уурааҕынан Борисовтаах Акимов болумуочуйаларын тохтотор бырааптаахтарын туһанаргытын эһигини талбыт быыбардааччыларгыт күүтэллэр.

Кылгас ыстатыйабын сокуонунан көрүллэр ыйытык курдук ылынан, эппиэтин хаһыат нөҥүө күүтэбин. Эппиэт кэлбэт түбэлтэтигэр республика саҥа салалтата Борисовтаах Акимовтыын бииргэлэр эбит, үлэҕит бастакы күнүттэн норуоту утарар, Москва эрэ этиитинэн салайтаран, норуоккутун көмүскүүр санаата, баҕата суох, тугу даҕаны уларытар кыаҕа суох салалта эбиккит дии саныахпыт.

 

Георгий АРТЕМЬЕВ,

Саха АССР Үрдүкү Сэбиэтин XII,

Ил Түмэн I, II, IV ыҥырыылаах

норуот депутата,

Саха АССР норуотун

хаһаайыстыбатын үтүөлээх үлэһитэ,

Таатта, Мэҥэ-Хаҥалас улуустарын

Бочуоттаах олохтооҕо,

1966 сылтан ССКП-РФКП чилиэнэ.

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
18 + 0 =
Solve this simple math problem and enter the result. E.g. for 1+3, enter 4.