Доллар61.26 Евро72.24
+8 °С

Чуолкай быһаарыыны күүтэллэр

14:29 в 12.11.20180 12

"Туймаада" хаһыат 428 нүөмэригэр (11.10.2018 с.) тахсыбыт Максим Николаевич Сибиряков "Бэрт былдьаһыы, сойуолаһыы тохтоотор ханнык" уонна "Балаҕан, алаас саханы эспитэ" диэн ыстатыйаларын куйахам күүрэн ыла-ыла аахтаҕым үһү. Ыарахан суруйуу.

Максим Николаевич хас биирдии салааҕа быһааран суруйталаабыт: бэрт былдьаһыы, сойуолаһыы, иэс ситиһиитэ диэн. Кини бу ыстатыйаҕа кыбытан аһарбыт түгэннэрин истибит, аахпыт эбиппин. История көлүөһэтэ иккистээн-үһүстээн эргийэн кэлиэн сөп дииллэрэ кырдьык эбит. Г.П.Башарин "Три просветителя" үлэтин тула сүрдээх уһун-синньигэс туруулаһыы буолан ааспыта. Быһаарыллыбыт курдук этэ да, “Туймаада” хаһыакка 2017 сылтан ыла Лазарь Рожин диэн эдэр киһи Г.П.Башарины уонна И.Е.Федосеевы хасыһар үс-түөрт ыстатыйалары таһааттарда. Арааһа, дииргэ тиийэбит, урут бу айдаан саҕана хаарыйтарбыт киһи угаайытыгар киирэн бу Лазарь Рожин "саҥаны арыйбыт" курдук туттан, урукку суруллубуту хос суруйа сылдьар эбит, бэйэтэ да билбэтинэн иэс ситиһиитэ, сойуолаһыы диэн ыарахан буруйдааһыҥҥа киирэн биэрбит. Дьэ, билигин тугу суруйан ырааһырар эбитий? Эбэтэр А.Кулаковскайы, А.Софроновы, Н.Неустроевы, Г.Башарины, И.Федосеевы күлэ-күлэ күллэрин таптайар дуу? Саарбахтыыбын!

"Балаҕан, алаас саханы эспитэ" диэн ыстатыйаны Максим Николаевич тус олоҕор, этинэн-хаанынан, дууһатын ис туругунан олус ыарыылаахтык билбитин бэйэтэ этэрин курдук аһаҕастык суруйбут. Ити үлүгэр алдьархайы кыра оҕо сааһыгар өйүгэр-санаатыгар иҥэрэн, үүйэ-хаайа тутан, ыар таһаҕас оҥостон сылдьыбыт өйдөбүлүн тоҕо тардыбыт... Кырдьык бу Сибиряковтар эрэ иэдээннэрэ буолбатаҕа өйдөнөр.

Ол эрээри сахалар алаастарынан арахсан олорбут буоламмыт баччаҕа тиийбит буолуохтаахпыт. Хайа көмүлүөк оһохпут вентиляция оруолун толорон түүннэри-күнүстэри балаҕаммыт иһин супту оборон ыраастыы турар буолан, сэллик курдук уонна да атын ыарыылар урукку эмп-том суоҕар дезинфекция оҥорсон үгүс саханы өлүүттэн быыһаатаҕа.

Сахалар биир балаҕаннарыгар сылы быһа эргиччи олорбот этилэр. Кыһыҥҥы кыстык кэнниттэн, хайаан да сааскы Ньукуолун кэнниттэн сайылыкка көһөн тахсаллара. Онтон күһүҥҥү отордооһуҥҥа көһөллөрө. Тымныы түһүүтэ кыстык сирдэригэр көһөн кэлэллэрэ. Ол аайы олорбут сирдэрин хомуйан, ыраастаан, уоттаан көһөр суруллубатах сокуоннаахтара. Онон урукку өбүгэлэрбит кэлэр көлүөнэлэригэр: хайдах олорон-көрүнэн, бултаан-алтаан, үлэлээн-хамсаан олоруохтаахтарын толору көрдөрөн ааһаахтаабыт эбиттэр. Онон балаҕан, алаас саханы эспитэ диэн боппуруоһу көтөҕөр сатамньыта суох.

 

Варфоломей МИХАЙЛОВ-Баһылай

Амма, Сулҕаччы.

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
3 + 8 =
Solve this simple math problem and enter the result. E.g. for 1+3, enter 4.