Доллар63.77 Евро70.63
-29 °С

Айдааннаах «ЯРКО»

12:27 в 23.03.20170 18

РФ 190 №-дээх кредитнэй кооперация сокуонугар олоҕуран от ыйын 12 күнүгэр 2005 сыллаахха Мярикянов М.М. Саха республиканскай кредитнэй обществота, ЯРКО диэни устааптаан тэрийбитэ. Бу тэрилтэ кэтэх санааттан тэриллибитэ кэлин биллибитэ.

Мярикянов ОАО «Стройагентство» тэрилтэлээҕэ, Малай Мархаҕа МВД хаайыылаахтарын колониятын кирзаводун, эстибиттэрин кэннэ Попов Аполлон Михайлович ылан железобетоннай оҥоһуктары оҥорор завод оҥорон, ону ылан үс тэрилтэлэнэн, генеральнай директор буолан, охраналаах, кабинетыгар кими да киллэрбэт, бухгалтериятыгар сырытыннарбат, приём ыыппат тойон буолбут.

Попов, Мярикянов аймахтыылар, бииргэ үлэлииллэр. Мярикянов пайщиктаахтар орооспотуннар диэн отой сырытыннарбат, бухгалтерияҕа чугаһаппат эбит. Итини управляющай Чебоксарыттан кэлэн Вера Дорофеева хаһыакка суруйбута. Харчы киллэрэн, үс океан нөҥүө баар Америкаттан Мярикяновтаах Попов икки заводу атыылаһан аҕалан Саха сиригэр, Малай Мархаҕа аҕалан тутуохтаахтар. Ол завод үлэлээтэҕинэ улаханнык кыаҕыралларын дьоҥҥо куруук этэллэрэ.

Саха сирин улахан аҥаарын: Чурапчыны, Намы, Мирнэйи, Алданы, Нерюнгрины, Ньурбаны, Өлүөхүмэни, Удачнайы, Айхалы, Бүлүүнү, Үөһээ Бүлүүнү, Хаҥалаһы, Аллараа Бэстээҕи, Горнайы, Сунтаары, Тааттаны, бу 19 улуустар куораттарын эмиэ хабан, Мярикянов ЯРКО-лары кытары норуот муспут харчытын уурдаран ылар гына тэриммиттэрэ. Киэҥ далааһыннаах ымсыырдыы, харчынан агитациялааһын, рекламалааһын саҕаламмыта. Холобура: эн кыра ууруугун 600 000 солкуобайгын 33 %-ҥҥа биһиэхэ уурдаххына 12 ыйга 756 000 солкуобайы ылаҕын. Эбии уурдаххына личнэй уурунуугун элбэтэҕин, ЯРКО-ҕа чилиэнинэн, пайщигынан киир, биһиги олус эрэллээхпит, кыахтаахпыт, чиэһинэйбит диэн угаайылаатылар.

Элбэх киһи ЯРКО кассаларыгар мунньан эрэйдэммит харчыларын олус эрэнэн туран уктулар. Дьон эстэн-быстан, үлэтэ суох дьон, Россия таһыгар ыардык ыалдьаннар операцияҕа бараары сылдьар киһи, сэрии, үлэ ветераннара о.д.а. тиһэх харчыларын укпуттара чахчы. Кыһалҕаҕа сылдьар киһи иэскэ-күүскэ да киирэн, харчыта ылыҥ диэн угуйа турар сиргэ киирэр буоллаҕа.

Дьокуускай, Майа ЯРКО-ттан хайдах охсууну ылбытын суруйуум. Мин пайщик буолбатахпын. ЯРКО тоҕо эрэ урукку аатыгар сельскохозяйственный кооператив диэни эбинэн кэбиспитэ. Онон СКПК ЯРКО буолбута. Улуустары кытары үлэҕэ, харчы хамсаан ЯРКО клиеннарын кытта сууттас да сууттас, онтон эйэлэспит аатыралларын туһунан хаһыакка суруллубутун аахпытым.

Сыллар ааһан испиттэрэ. ЯРКО уурууну төнүннэрэрин умнубута, наар дуогабарга суумалары сурунан испитэ, барыта үчүгэй, харчыгытын төнүннэриэхпит, сууттаһымаҥ, кыайыы сылларыгар харчыны түҥэтиэхпит, барыта үчүгэй, уурунуугутун эбэн иһин эҥин диэн уһатан, тардан испиттэрэ. Марха завода үлэлээтэҕинэ өссө үчүгэй буолуоҕа, онон кэтэһии буолбута. Бу 2014-15 сыллар этилэр.

Сиэдэрэй реклама биэрбиттэрэ, онно саха ырыаһыта Лаврова портрета баара. Кини төбөтүгэр «Нам 10 лет», «Я доверяю ЯРКО!» суруга, бэлиэтэ баара. Бу саха ырыаһыт сулуһунан ЯРКО сирэйин саптыыта дьону уоскутуу, албыннааһын, оннооҕор сулус итэҕэйэр диэн өйдөбүлү биэрбитэ. 2013 сыл алтынньы 7 күнүгэр Россия баана минимизацияны биллэрдэ диэн ЯРКО Солдатова А.В. от ыйын 1 күнүгэр 2014 сыллаахха дуогабарга харчыны биэриигэ лицевой счёкка пайщик баан реквизиттээх эрэ буоллаҕына биэриҥ диэн баран биэрбэккэ сылдьыбыт. Предпринимателлэргэ, юридическай сирэйдэргэ эмиэ бу уураах тарҕаммыт. Сити күн Егорова ууруу харчыбын төнүннэриҥ диэбитин: «Представителлээххит, онон харчыгытын ылыҥ», – диэннэр Майаҕа төттөрү ыыппыттар. Манна харчы суох диэнтэн атын суох буолбут.

Уопсайынан, ЯРКО дьон айдаараары гынна диэн сэрэммиттэр, туох баар күүһү дьону уоскутууга ыыппыттар. Күүтүүлээх Кыайыы 70 сыла кэллэ, ууруу харчыны ЯРКО түҥэтиэхпит диэбитэ мэлийдэ. Норуот ЯРКО головной кассатыгар биир да солкуобай суох үһү, уопсайынан банкроттаабыт үһү диэн кэпсэтии буолбут. Егорова уонна атыттар Дьокуускайга киирэн кэпсэтэн, көрдөһөн көрбүттэрэ ууруу харчыларын биэрбэтэхтэр. Миллиардынан харчыны эргиппит ЯРКО, Мярикянов М.М. норуот отоойкоҕо, эстиигэ тиэрдэн баран күн бүгүнүгэр диэри кумаардаан да көрбөккө олороллор, отой кыһалҕата суох сылдьаллар. Бу дьоҥҥо туох миэрэ ылыллыан сөбүй?

Ылар иэстээх дьон улахан охсууну ыланнар, мэскэйдэнэ сырыттахтарына Муравьёва С.Н. 2015 с. олунньу 5 күнүгэр личнэй сбережениены ылыы-биэрии тохтуурун туһунан уураах таһаарбыт. Баттаһан: Мэҥэ-Хаҥаласка, Чурапчыга, Дьокуускайга, Намҥа, Горнайга, Аммаҕа, Үөһээ Бүлүүгэ, Ньурбаҕа, Өлүөхүмэҕэ, Тааттаҕа, Уус-Алдаҥҥа ЯРКО наблюдательнай сэбиэтэ протокол суруйан 2015 сыл олунньу ый 4 күнүгэр харчыны ылыыны-биэриини олохтоохтук боппут.

Егорова суукка дьыала биэрэн, ЯРКО төлүөхтээх суут быһаарыытын приставтарга биэрэн мөлүйүөннээх сууматтан 1 тыһыынча солкубайы ылбыта, онон бүппүтэ. Кини билигин эргиччи балыыһа киһитэ буолла. Кини эрэ буолуо дуо, дьон үксэ материальнай, моральнай охсууну ылан сылдьаллар.

Васильев Валентин Васильевич, уус, предприниматель киһи улахан ууруутун ылбакка куораттан иһэрэ. ЯРКО-лар харчыбын сиэтилэрдиэн эппитэ, улаханнык ыалдьан иһэрэ. Сотору өлбүт сураҕын истибитим.

Пенсионер Яковлев Павел Никонович «ЯРКО пирамидатыгар алҕас харчыбын угаммын сиэттим» диэн дьоҥҥо кэпсиирин истибитим.

2015 сыл сэтинньи 7 күнүгэр мин ЯРКО мунньахтыырын истэн онно тиийдим. Дьон толору саалатын утары ЯРКО салайааччылара Солдатова С.А., Иванова А.Ф., Муравьёва С.А., биир нуучча киһитэ олордулар. Айдаан ортотугар бары харчы суох буолан тэрилтэ банкроттаабытын, Марха завода үлэлээбэтин, туох да цифровой дааннайа суох отчуоттаттылар. Онно студентка быһыылаах, эдэр кыыс харчыбын аҕалыҥ, ипотекаҕа көрдүүллэр диэн ытыы-ытыы саҥарбытыгар нуучча саба хаһыытаан кэбистэ: «Мярикяновка барыҥ, онтон харчыгытын ылыҥ, тэрилтэни бэйэҕит салайыҥ!».

Айдаан буолаары гыммытыгар харабыллар киирбиттэригэр тарҕастыбыт. Онон СКПК ЯРКО бээтинсэ аайы дьон тугу саҥарарын, туох суолунан баран, срокка сөп түбэһиннэрэн банкроттаан ууттан кураанах тахсаары мөхсөллөрүн көрдүм. ЯРКО Кыайыы 70 сылыгар норуот санаатын алдьатан түөкүннээһини, сиэһини, растратаны таһааран, фиктивнэй эбэтэр соруйан банкроттааһыны таһаара сатааһына тыһыынчанан дьоҥҥо ыар моральнай, материальнай охсууну, дьайыыны таһаарбытыгар эппиэттэх тустаах.

Майаҕа ситэтэ суох дааннайынан 64 пайщиктаах, Дьокуускайга 2000 дуу 2500 дуу пайщиктаах ЯРКО-ттан ууруутун ылбакка сылдьар. Ортотунан ортотунан 1 мөлүйүөн харчынан ыллахха элбэх, улахан суума итиннэ сытар.

Харчыны суһаллык төлүүллэригэр бары туруорсуҥ! Туох баар күүһү-уоҕу түмүҥ!

 

Николай Афанасьевич ПОПОВ,

сэрии ветерана, милиция, ИДьМ ветерана.

Майа с.

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
13 + 2 =
Solve this simple math problem and enter the result. E.g. for 1+3, enter 4.