Доллар62.87 Евро70.79
+9 °С

Аны туох да наадата суох... Быраһаайдарыҥ!

08:17 в 26.04.20190 2619

“Ютуб” каналга ханнык эмэ публикацияны көрөр буоллахпына, мин онуоха комментарийдары эмиэ ааҕааччыбын. Биирдэ маннык комментарийга түбэстим, ону эһиэхэ сахалыы тылбаастаан тиэрдэбин.

Айсан.

Баба Фрося: – Мин сэрии буолуон икки сыл иннинэ төрөөбүтүм. Саас ыраатта. Кэнники кэмҥэ немец фашистарын кыайыы туһунан араастаан тупсаран, киэргэтэн кэпсииллэрин истэ-истэ наһаа кыйаханабын. Аны сэрии туһунан билигин оҥорор киинэлэрин көрүөҥ этэ: бары олус кыраһыабайдар, формалара ып-ыраас, дьахталлара уһун килэбэчигэс баттахтарын ыһа сылдьаллар. Ону көрө-көрө отой хотуолуохпун баҕарабын. Оо, айыым-таҥарам!

Биһигини, тыылга да фроҥҥа да баар дьону, барыбытын быт ыһара: эппитигэр, таҥаспытыгар кыймаҥнас быт үөскүүр буолара. Барыбытыгар! Саллааттар сэрии чуумпуран ылар кэмигэр тыҥырахтарынан быттары ньыһыйар этилэр. Оттон эһиги киинэҕэ ып-ыраас хааман хончоҥноһоҕут, эбиитин өссө тапталлаахтар-баҕастаахтар. Фроҥҥа, тыылга тыыннаах хаалбыт эрэ киһи диэн санаа буолара: кир-хох, быттыйыы, аччыктааһын, хаан-сиин, өлүү-сүтүү...

Биһиги сэрии оҕолоро аччыктаан, хоргуйан нэһиилэ тыыннаах хаалбыппыт. Хайдах? Билбэтим...

Мин “паапа” диэн тылы билэр этим даҕаны, хаһан да туттубатаҕым... Паапам үс убайдара эмиэ сэриигэ өлбүттэрэ, оттон бырааттара Кривко Степан Николаевич Кенигсберг куоракка тиийбитэ, араанньыйбыта. Кыайыы парадыгар кыттыбыта, үһүс эрээккэ хаҥастан үһүс киһинэн кини хаампыта.

Биһиги, сэрии тулаайахтара, дойдубуттан тугу ыллыбыт? Мин тугу да ылбатаҕым. 14 сааспыттан үлэлээбитим. Ыал буолан икки оҕоломмутум, декреккэ иккилии ый сылдьыбытым – оҕолонуом иннигэр уонна кэнниттэн. Туох да пособие, төлөбүр суоҕа. Эгэ үрдүк үөрэххэ үөрэниэм дуо?

Дойдубутун, кырдьык, таптыырбыт. Оттон билигин ол дойдубут ханна баарый? Дойдубутун чаас-чааһынан араартаатылар, атыылаатылар, приватизациялаатылар, суох гыннылар. Ымсыы дьон ааттарын билбэт гына байдылар-тайдылар, оттон биһиги туга да суох хааллыбыт.

Биһиги оҕолорбутун уонна сиэннэрбитин армияҕа ыҥыраллар. Кими көмүскэтээри? Ол оннугар сааттаах умнуллубат полканы тэрийдилэр (бессмертный полк). Хаартыска тута-тута үөрэ-көтө хаамаллар. Оттон биһигини, киэр илгиллибит сэрии оҕолорун, ким да санаабат. Арай КПРФ хас да сылы быһа сэрии оҕолорун туһунан саҥара сатаата да, ахсааҥҥа ылыллыбата. Биһиги прихватизатордарбытыгар харчы суох үһү! Кинилэр суобастара кинилэри кытта төрөөбөтөх, соннук плаценталарыгар хаалан хаалбыт.

Билигин эһигиттэн, суобаһа суохтартан, биһиэхэ туох да наадата суох. Биһиги букатыннаахтык барабыт. БЫРАҺААЙДАРЫҤ!

*  *  *

Аватар пользователя Гость
CAPTCHA
This question is for testing whether or not you are a human visitor and to prevent automated spam submissions.
6 + 11 =
Solve this simple math problem and enter the result. E.g. for 1+3, enter 4.