Сайыҥҥы суруйуубун ааҕыҥ дуу.
…Бу күннэргэ ахтылҕаннаах дойдубар тахса сырыттым. Тыаҕа дьон-сэргэ олоруута кэминэн.
Оттон дьоллоох Дьокуускайбытыгар дьыала хайдаҕый? Сылгы үөрэ киин уулуссаларбыт устун от көрдөөн помуойа дьааһыктарын ыһаллар-тоҕоллор, газоннары кирэллэр, кырыы уулуссаларбыт кур лаҥха отунан, бөҕүнэн-сыыһынан туолбуттар. Көрөргө дьэ сүөргү хартыына. Өртөөһүн сокуонунан бобуллан турар, ыстарааптыыллар. Саатар уопсай дьиэҕэ олорооччулар хомуйа сатаабаттар, ким да уопсай дьиэҕэ умса-төннө түспэт. “Якутскэкосети” дьааһыктарын да хомуйдахтарына сөп буолаллар.
Биир дьыл биһиги Кырдьаҕастар дьиэлэригэр сытан, сүбэлэһэн мотокоса аҕалтаран кур оту охсубуппут, хомуйбуппут. Онтубут сыалай биир КАМАЗ массыына буолбута. Ол курдук тэринэн уопсай үлэлээтэххэ эһиилигэр күөх от үүнүө этэ.
Сквердэргэ, болуоссаттарга, тэрилтэлэр тастарыгар биир күрүс, сыта-сымара суох сибэккилэри олордоллор уонна дьэ көҕөрдүү үлэтин ыыттыбыт диэхтэрэ.
От ыйа ортолоото. Тыа сиригэр олорор хаһаайыстыбалаах дьоҥҥо сылаалаах, ол эрээри тардыаһыктаах от үлэтэ саҕаланар. Былдьаһыктаах, биир күн сылы аһатар диэн мээнэҕэ эппэттэр.
Билигин урукку буолбатах, эҥин араас техника дэлэйдэ, саамай сүрүнэ Кытай тыраахтара абырыыр. Күн-дьыл туран биэрдэҕинэ оту баҕас оттууллар. Ол эрээри талах быыһа, дулҕалаах сир оттоммокко хаалар. Аныгы ыччат хотууру туппат, бэрт сэдэхтик мотокосанан от үүммэтэх дьылыгар оттообута буолаллар.
Оттон куоракка отой да хотууру туппаттар, ол иһин куораппыт кырыы уулуссалара кур лаҥха. Сытыйбыт эрбэһининэн, кур отунан саба бүрүллэн куорат көстүүтүн буортулууллар.
Онон этиилээхпин: волонтёрдар мотокоса ылан уулуссалар кытыыларын, сквердэри оттоотуннар. Ипподрому, история пааркатын эмиэ. Урут радиоузел антенналара турбут сирин Сибээс техникумун оҕолоро илии хотуурунан охсоллоро, ону биир оҕонньор тэлиэгэлээх атынан тийэн ылара, оҕолорго махтанара.
Ити курдук тэрээһиннэри тэрийдэххэ куораппыт ырааһыра түһүө этэ, салгына да тупсуо. Ити олордуу сибэккилэрэ харах эрэ баайыыта, сыттара-сымардара суох. Эбиитин төһөлөөх харчы онно кутуллара буолуой?
Ботаническай сад олбуорун көрүөҕүҥ, дьарыктанар дьон бааллара биллэр – барыта күп-күөх, тупсаҕай.
Аны бөх-сыыс туһунан. Пиибэ атыылыыр сирдэр күлүк өртүлэрэ барыта бөх-сыыс, биир да помуойа дьааһыктара суох. Баар да буоллахтарына бөхтөрүн онно бырахпаттар, этэн көрдөххө өрөһөлөнө түһэллэр, кырбаабатахтарына баһыыба.
Бу барыта куһаҕаны эрэ түөһэр дии санаамаҥ. Куораппыт тупсарын туһугар бары биир санаанан үлэлиэҕиҥ, үүнүөҕүҥ.
Буттуруй,
тыа оҕонньоро.
