Иистэнэр сыах дьахталлара сыах тымныы, хамнас кыра о.д.а. диэн айдаараллар, ким кими да истибэт, бары тэҥҥэ саҥараллар. Сыах маастара киирэн:
– Бу туох айдаанай? Тохтооҥ, саамай кырдьаҕаскыт саҥардын!
Сыах иһэ уу-чуумпу – ким да кырдьаҕас аатырыан баҕарбат.
Үс доҕордуулар кэргэннэринэн киэн тутталлар:
– Мин кэргэним наскыыбын сабыс-саҥа курдук абырахтааччы.
– Оттон миэнэ ыстааммын хайыппыппын отой биллибэт курдук абырахтаабыта.
– Дьэ миэнэ буоллаҕына сууйбут таҥаһа мэлдьи сууллубатах курдук буолааччы.
– Хайа, били үөрэҕин кыайбат уолуҥ сол да оскуолатыгар дуу?
– Оскуолатыгар.
– Хаһыс кылааска?
– Ахсыс, тохсус, онус кылаастарга.
– Ол хайдах, үс кылааска сэргэ үөрэнэр дуо?
– Ити үс кылаастарга устуоруйаны биэрэр.
– Эн тоҕо бачча хойутаан кэргэннэнниҥ?
– Кэргэммин иитиэх үбүм суох этэ.
– Оттон билигин?
– Ый аайы биэнсийэ ылабын.
– Дьэ мин кэргэним настырыанньатын чопчу билээччибин.
– Ол хайдах?
– Тиэстэ тэнитэр мастаах буолла да, бүттэҕиҥ ол.
– Анараа дэриэбинэҕэ диэри төһө ырааҕый?
– Биэс биэрэстэ диир этилэр да, быйыл кэмнээн сэттэ биэрэстэ диэтилэр. Онон сырыы аайы икки биэрэстэни ордук хаамар буоллубут.
Ааны тоҥсуйаллар:
– Петров манна олорор дуо?
– Петров диэн мин.
– Мин оҕом очуостан сууллубутун быыһаабыт эн дуо?
– Ээ, мин быыһаабытым.
– Оҕом шарфигын ханна гынныҥ?..
Эрэ дьиэтигэр сарсыарда биирдэ кэллэ.
– Дьэ, ханна хоннуҥ?!
– Табаарыспар…
Ойоҕо эрин 10 табаарыстарыгар звоноктуур. Алталара чахчы хоммута, оттон түөртэрэ билигин да утуйа сытар дииллэр.
– “Сыбаайбаҕар диэри оһуоҕа” диэбит хирург 70-наах эмээхсиҥҥэ, онто тута хараҕа уоттана түспүт.
– Эн харчы мунньары сатыыгын дуо?
– Сатыыр этим да, ончу харчым суох.
Ыал арахсыытын суута буола турар. Дьахтар судьуйа хаһаайкаттан ыйытар:
– Арахсыыгыт сүрүн биричиинэтэ тугуй?
– Оттон… ити…
– Арыгылыыр дуо эриҥ?
– Суох, испэт.
– Наркоман дуу?
– Суох.
– Хамнаһын барытын биэрэр дуо?
– Биэрэр.
– Атаҕастыыр, кырбыыр дуо?
– Суох, кырбаабат.
– Оҕолоругар кыһаллар дуо?
– Кыһаллар.
– Атын дьахтардаах дуу?
– Бакаа суох этэ.
– Дьиэҕэ көмөлөһөр дуо?
– Көмөлөһөр ахан.
– Оччоҕо арахсар биричиинэҥ тугуй?
– Эрим сирэйэ куһаҕана бэрт. Эн да итинник сирэйдээх киһини кытары олоруо суох этиҥ…
Николай СПИРИДОНОВ
— Дойду Ньукууһун
хомуйууларыттан.
