Саханы якут гынарга соруктаах
Саха куората Якутскай диэн ааттаах.
Тураахтан тураах төрүүр,
Сахаттан якут төрүүр.
Өй өрө сайдаргын салайар,
Өлөртөн быыһанар суолгун ыйар.
Улуу Элиэнэбитин арчылыаҕыҥ,
Уута уолан эрэриттэн быыһыаҕыҥ.
Айыыҥ-хараҥ сыҥсарын ыраастаныаҕыҥ –
Айыы Тойон ыарыыгын ыраастыаҕа.
Кыыра турар ойуун олус сэрэхтээх,
Кыһыл тылынан кыыран тахсар сэттээх.
Күлэртэн-үөрэртэн ордук
Күн сиригэр күүстээх эмп суох.
Уһуннук ыстаан кыраны аһааччы
Уһун үйэлээх доруобай буолааччы.
Аһыы, арыгылыы сиргэ кэлбэтэхпит,
Айа-тута, үөрэ-көтө кэлбиппит.
Эһиэкэйдээн эргитиҥ –
Эдэргитин эргитиҥ.
Сүрэхтэр сөбүлэһэллэрэ уруй!
Сирэйдэр сөрүөстэллэрин умнуҥ.
Ис кута-сүрэ итии истиҥ киһи –
Иһирэх сүрэхтээх ис киирбэх киһи.
Тимир курдук көрөн ылар үгэстээх
Тимир хомустуу этигэн сүрэхтээх.
Ис хаан истиҥ иһирэх сүрэхтээх
Ис киирбэх киһи үөрдэр үгэстээх.
Кэрэ дууһата курдары көстөр кыыска
Кэрэтин киртитэн кээһиэ кырааска.
Сүрэҕэ этэринэн сылдьааччы
Сүрдээх судургу, истиҥ буолааччы.
“Оһуохай” диэн тыл суох, бобуоҕуҥ!
Оһуокай оһуокай ойуоҕуҥ.
“Тойуктуур” диири тохтотуоҕуҥ!
“Туойар” диирбитин тутуһуоҕуҥ!
Саха үгэһин алдьатан ыллыыр
Саҥаны айбыт курдук санаахтыыр.
Кэмчи үптээхтэр
Киһилии киэптээхтэр.
Өлөр солото суох үлэлиир дьол,
Үлэтэ суох тэһийэ сатыыр сор.
Сирэй кырааската кырытыннарар,
Сүрэх сылааһа кырасыабай гынар.
Сирэйи кырааска туос курдук гынар
Сүрэх итиитэ ис киирбэх гынар.
Кыһыл тэтэрбит иэдэскин
Кырааскалаан киэргэппэккин.
Үрдүк түөстээх кыыс хайаан да
Үрдүк үөрүүнү түстүө дуо?
Сүрэҕэлдьиир чуҥкуга бэрт,
Сүргэни баттыырга хобдоҕо бэрт.
Үөрэ-көтө үлэлиир үчүгэй,
Үөхсэн-этиһэн тахсар үлүгэр.
Таарыйыаҕын тарбаҕа тардар
“Таптыыбын” диэҕин тыла тардар.
Дьону үөрдэ-көтүтэ сылдьарыҥ дьол,
Дьоҕургун сайыннаран дьоллоох буол.
Былаас былдьаһыыта олус баламат.
Бырааты да, атаһы да аһыммат.
Уус-уран тыл ууну да сомоҕолуур
Урааҥхай саханы да сомоҕолуо.
Николай САФОНОВ-Дьырылы.
