Дойдубутугар быһыы-майгы тыҥаан иһэр чинчилээх. Кэлиҥҥи сүрүн түгэннэргэ тохтоотоххо, маннык.
Коронавирус айдаана баҕарбатахпыт да иһин намырыахтаах, тоҕо диэтэххэ бу көннөрү дьаҥы аһара күүркэппиттэрэ син-биир хаһан эмэ тохтуо. Коронавирус суох буолбатах, баар. Ол гынан баран көннөрү дьаҥ буоларын өссө төгүл итэҕэйдибит. Атын эбитэ буоллар бары өлөн бараммыт буолуо этибит. Арба да, Белоруссияҕа букатын да карантин, самоизоляция диэни олохтооботохторо дии. Оҕолордуун, улахан дьоннуун бары туох да буолбатаҕын курдук сылдьыбыттара. Оннооҕор Кыайыы күнүн бүттүүн өрө көтөҕүллэн бэлиэтээбиттэрэ. Тоҕо эрэ белорустар маассабайдык өлбүттэрин туһунан сурах иһиллибэт.
Самоизоляция кэмэ уһуон баҕарар дьон элбэхтэр. Бастатан туран, былаастар. Кинилэргэ дьон “хаайыыга” олороро үчүгэй бөҕө буоллаҕа. Дьадайаллара туох буолуой? Аны туран бюджетниктар эмиэ элбэхтэр, кинилэр таах кэлэр хамнаһы тоҕо сириэхтэрэй? Хамнаһы сылайан-элэйэн ылар ордук дуу, таах олорон ылар дуу? Үгүстэр үлэлээбэккэ ылары ордорор буоллахтара.
Медиктэргэ эмиэ үчүгэй: коронавируһу кытары үлэлиир быраастарга ыйга 80 тыһыынча эбиллэр, медсестраларга 50, алын медперсоналга 20-тэн 50 тыһ. солкуобайга диэри. Маны ким сириэй? Бу кэм өссө уһууругар баҕарар буоллахтара. Ол иһин коронавирустан ыалдьыбыттар ахсааннара күн-түүн элбии турар… Арай ол харчыларын отой да биэрбэт үһүлэр, айдаан бөҕөтө.
Коронавирус айдаанын электроннай СМИ-лэр, араас блогердар соруйан күөртүүллэр: элбэх киһи өлөн эрэр! Тоҕото өйдөнөр – кинилэри дьиэҕэ хаайтаран олорор үгүс киһи ааҕар, просмотр бөҕөтө. Отой сүүһүнэн тыһыынча, өссө мөлүйүөнүнэн! Инньэ гымматахтарына кинилэри ким ааҕыай? Араас ютубердар, блогердар уонна блогершалар дьэ күннэрэ-ыйдара таҕыста.
Ойуун Габышевы психушкаҕа симтилэр. Дьэ, сатамматах дьон буолан биэрдилэр – төһөнөн туталлар-хабаллар да, соччонон Александр Габышев аар-саарга аатырар буоллаҕа. Геройу бэйэлэрэ оҥорон таһаараллар.
Тоҕо маннык балаһыанньа үөскээбитин быһаарыаҕыҥ. Саха сирин салалтата икки уот икки ардыгар хайаан да түбэһэр: ойуун Габышевы эрдэттэн айанныыр кыаҕын суох оҥорор, эбэтэр отой да кыһаллыбат. Кыһаллыбат түбэлтэтигэр Александр хайаан да айанныыр, оччоҕуна Кремль иннигэр буруйдаах буола түһэр – тоҕо ыыттыгыт, туппатыгыт?! Ол онтон куттанан эрдэттэн бохсо сатыылларыгар тиийэллэр.
Аны хаайдахтарына эмиэ аҕыс айдаан, ол билигин номнуо саҕаланна. Омук сиригэр киһибитин отой да били ССРС саҕанааҕы улуу диссиденнэр ахсааннарыгар киллэрэн эрэллэр. Онон эмиэ аар-саарга аатырар буоллубут. Онон умса уур, тиэрэ бырах – ойуун Габышев айдаана өссө күүскэ сэтэриэ.
Дьиҥэр дьыала аналга – “миссияҕа” сытар. Ойуун Габышев миссията – Кремльтэн демоны үүрүү. Россия үрдүнэн үгүс киһи санаатын табан, бу тула хамсааһын бара турар. Дьыала өссө киһитигэр да буолбатах. Уларыйыылар кэмнэригэр биһиги ойууммут аата-суола өссө да ахтыллыа.
Аныгыскы сырыыга экономикабыт туһунан ирэ-хоро кэпсэтиэхпит. Харчы хантан кэлэрий? Ону быһаарыахпыт.
Александр ЯКОВЛЕВ-Айсан.
