(“Туймаада”. 2022 сыл. Алтынньы 6 күнэ)
Айылҕа, уопсастыба, киһи диалектика сокуоннарынан олорор, сайдар, өлөр. Диалектика үс сокуоннаах:
1. Сомоҕолоһуу уонна охсуһуу – айылҕа, уопсастыба, киһи сайдыытын ис күүһэ.
2. Ахсаан уларыйыыта үрдүгү дабайан атын, үрдүк сайдыыга тахсар.
3. Ааспыт сайдыыттан аккаастанан саҥаттан саҥа сайдыы таһымыгар тахсан иһиэхтээх.
Виктор Данилович Михайлов биһиги философиябыт кафедратын уһун сылларга баһылаабыт баар-суох философскай үөрэхтээх бастаан философскай наука кандидата, доцент, онтон философскай наука докторын диссертациятын барыбыт иннибитигэр көмүскээбит уонна профессор званиетын ылбыт коллегабыт буолар. Кини диссертацията кырдьык сөбүлэһии философията диэн саҥа сүүрээни киллэрэр аналлаах философияҕа саҥа хайысхал этэ. Бу хайысхал хайдах эрэ диалектика бастакы сокуонун кэһэр курдуга. Ону кини этэрэ: хаһан эрэ сомоҕолоһуу баһыйыа, охсуһуу көрүҥнэрин эрдэттэн билэн, кини охсуһуу форматыгар тиэрдэбэккэ быһааран иһиэхтэрэ диэн биһигини итэҕэппитэ уонна биир да утарыыта суох философия доктора буолбута.
Виктор Данилович марксизмы билиммэт этэ диэн суос-сымыйа. Мин марксизм тиэмэтигэр философскай наука кандидата, онтон доктора буолбутум. Виктор Данилович мин доктор буоларбар научнай консультаным этэ. Кини К.Маркс уонна Ф.Энгельс диалектика сокуоннарын баһылаан, онно тирэҕирэн бэйэлэрин улуу үөрэхтэрин айбыттара диэн сүрдээх чуолкайдык этэрэ.
Онон, Чыычаахап Онотуолуй Эрэмиэйэбис, В.Д.Михайлов диалектика сокуоннарын туһунан этиитин сыыһа өйдөөбүккүн. Марксизм уонна нууччатыйбыт марксизм-ленинизм бэйэлэрин бэйэлэрэ көмүскэнэллэр, коммунистар тарҕаталлар, единэйдэр кинилэрэ килиэйдииллэр – ол диалектика сокуонугар сөп түбэһэр.
Онон, О.Э.Чыычаахап, эн төһө күүһүҥ кыайарынан марксизмы уонна нууччатыйбыт марксизмы тарҕатыахтааххын. Ол иһин коммунист буоллаҕыҥ дии. Коммунист диэн аатынан коммунизм иһин охсуһар дьон ааттаныахтаахтар. Оттон эн, Онотуолуй Эрэмиэйэбис, социализмы тутуом диир сураҕыҥ иһиллэр дии. Ол аата эн социалист эбэтэр социал-демократ буоллаҕыҥ буолуо.
Лазарь ФИЛИППОВ,
философскай наука
доктора, профессор.
