Доллар61.32 Евро75.65
-1 °С
Аватар пользователя admin
admin 11:12 в 11.04.20180 15

Ардахтаах түүн

Бөһүөлэк үрдүнэн хараҥа былыт сабардаан турар. Тугу эрэ саанар курдук өһүөннээхтик ыраах этиҥ этэн лүһүгүрүүр. Хараан киэһэ буолан үөнэ сүрдээх этэ.

Натаайа түннүктэри үөннээн баран утуйардыы тэринэн, оронун оҥостон сыппыта. Түүн кини күүлэ хаптаһын аанын дарбыйалларыттан уһукта биэрэн: «Эмиэ! Арыгы көрдүү кэллэхтэрэ!» – диэн өсөһүөҕүнэн-өсөһөн тулуйа сатыы сытта. Ол сыттаҕына аны утуйар хоһун түннүгүнэн кэлэн тоҥсуйдулар. Маннык кинини бэркэ диэн билэр эрэ киһи гыныахтааҕа.

Натаайа туран халаатын кэтэн күүлэҕэ тахсыбыта чаҕылҕана, этиҥэ сүрдэммит. «Кимий?» – диэн дьахтар эйэҕэһэ суох ыйытыытыгар таһыттан ардахха баттатан ыксаабыт саҥа: «Эдьиий, арый-арый, манна иэдэйэн турабыт, Владикпын», – диир саҥаны истэн, тиийэн аан күрүчүөгүн төлө тарта. Ону кытта таһыттан ибили сытыйбыт Влад киирэн кэллэ.

Кини дьиэҕэ киирэн таҥаһын уста туран: «Мин соҕотох буолбатахпын», – диэбитигэр дьиэлээх дьахтар сөбүлээбэтэ, тииһэ ыалдьыбытын курдук тутта түһээт: «О, боже! Эмиэ арыгылаан баран айдаарсан сүгүн утуппаттарын буллахтара», – дии саныы-саныы күүлэҕэ атаҕын сотто турар киһини көрбөккө да эрэ хоһугар киирэн эмиэ утуйардыы сытта.

Ити Влад кини аҕатын хойукку кэргэнин уола (дуомугар да буоллар быраата буоллаҕа). «Аймаҕым эрэ диэн алыс да буолан эрэр. Манна ордууланан аны арыгылыыр сир оҥоһуннаҕа», – диэнтэн санаата алдьанан утуйан биэрбэккэ сытта. Дьиктитэ диэн Влад киирээт даҕаны уоту саба тутан кэбиспитэ. Чэй сылытан, иһити-хомуоһу таҥкынаппакка ылы-чып аан хоско киирэн, биир киһи сытар эргэ тимир кырабаатыгар оҥостон сыппыт курдук буолбуттара.

Натаайа балысхан ардах дьиэ хоруобуйатыгар түһэн табыгырыырын истэ-истэ онно бигэнэн утуйуохха буолан иһэн, өссө биир тыаһы, тимир кырабаат тохтообокко биир тэҥ оҕону бигиир курдук тыаһыырын иһиттэ. «Кырабааты тоҕо кыычырҕатар буоллахтарай?» – диэн санааттан кини уута букатын даҕаны көтөн хаалла. Оттон кырабаат тыаһа сэллиэхтээҕэр өссө күүһүрэн, омуннуран, уоҕуран иһэр. Ити тыаска эбии дьон ыараханнык тыынара, туттуна сатыы-сатыы төлүтэ биэрэр дьахтар быстах ынчыга иһиллэр буолла.

Хаптаһын соҕуруокка нөҥүө туох буола турарын дьиэлээх дьахтар дьэ манна кэлэн биирдэ өйдөөтө. Кини итини истимээри сыттыгынан төбөтүн бүрүнүөҕүнэн бүрүнэн тулуйа сатыы сытта. Өтөр-өтөр сыттыгын арыйан иһиттэҕинэ кырабаат тыаһа ньим барбыт буолар. Ардыгар тимир куруһуна субу аҕай көтүллэн түһүөҕүнүү тыас-уус өссө сүрдэммит буолар. Хаста да туран, ааҥҥа тиийэн: «Бу туох үлүгэр сүрэй, аргыый буолуҥ эрэ!» – диэн күргүйдээн тохтотолуон санаталаан баран, арыычча туттунна.

Сарсыарда кини хойутаан, төбөтө ыалдьан турда. Аан хатыыта суох, хоноһолоро туран ороннорун оҥорон, баран хаалбыттар. Тимир кырабаат эрэйдээх көтүллүбэтэх үөрүүтүттэн үөһэ тыыммыт курдук соҥуоран турар. Хоһу салгылатаары дьиэ аанын тэлэччи арыйан таһырдьа тахсыбыта сир-дойду сэргэхсийбит, илгэлээх ардахтан чэбдигирбит, күн чэмэлкэйэ буолбут.

Кини күүлэ бэриилэтигэр өйөнөн туран: «Аата киһини эчэтиэххэ айылаах хамсаналлара баҕас тоҕо холуонай баҕаһай», – дии саныы турда. Эр киһи уоҕун-кылынын бачча сааһыгар диэри билбэтэҕэ кини дьоло эбитэ дуу, соро дуу… «Дьолум дуу, сорум дуу», – дии саныы турда.

 

Оҥку.