Доллар61.32 Евро75.65
-1 °С
Аватар пользователя admin
admin 14:29 в 11.04.20180 10

Ээр-сэмээр уруккуну ахтыһан

Малаанньа дьүөгэтигэр Лияҕа кэлэн, сылаас үүттээх хойуу чэй иһэ-иһэ күө-дьаа кэпсэтэ олороллор. Эдэр саастарын санаан оргууй үөһэ тыыналлар…

Ол хайдах этэй? Малаанньа үөрэҕин бүтэрэн хоту үлэлии барар. Лия үрдүк үөрэҕи бүтэрэн Аммаҕа дойдутугар учууталынан үлэлии тахсар. Дьүөгэлэр суругунан бэйэ-бэйэлэрин билсэ тураллар. Икки-үс сыллаах дуогабардара бүтэн, кыргыттар барахсаттар көҕүспүт курдук куоракка тардыһаллар. Малаанньа улахан тэрилтэҕэ кадр отдела, Лия 14-с оскуолаҕа математика учуутала. Кыракый 1 хостоох дьиэҕэ иккиэн куортамнаһан олороллор. Өрөбүллэригэр пааркаҕа таансыга сылдьаллар.

Ол сылдьан Женя диэн уолу кытта доҕордоһон Миланья таптал уотугар умайар. Сотору кэминэн кэргэннии буолуох буолан, өрүс эҥэр Миланья Женятын батыһыннаран дьонугар тахсар.

Ийэтэ барахсан кыыһа уоллаах кэлбититтэн үөрэн, нөҥүө күнүгэр аймахтарын, дьүөгэлэрин ыҥыран көрсүһүү оҥордо. Ас-үөл остуол хотойорунан. Күтүөт оҕо Өймөкөөнтөн сылдьар, куоракка улахан тэрилтэҕэ тойону солбуйааччы эбит. Хобороос эмээхсин үрдүк үөрэхтээх, тойон-хаан күтүөттэнииһибин диэн күлүгэр имнэнэр. Сыбаайбаларын от ыйын 20 күнүгэр оҥоруох буолан, күтүөт Миланьяҕа харчы хаалларан, үлэтигэр төннөр. Кыракый дэриэбинэҕэ сурах-садьык сиэллэнэн-кутуруктанан иһиллэр. Аймахтар Павловтар кыыстарын сыбаайбатын тэрийээри түбүгүрүү, һуу-һаа бөҕө… Күн-дьыл ааһара түргэнэ сүрдээх. Миланья доҕорун күүтэн аҥаара, кэтэһэн кэлтэгэй буолар.

Сыбаайба аһа-үөлэ астанан бүтэр. Чаас бардар баран иһэр. Биирдэ көрбүттэрэ биэс чаас буолбут. Ыалдьыттар олбуорга толорулар. Миланья киэргэниэҕинэн киэргэнэн баран, хааман доҕулдьуйар. Күтүөт айаныгар тардылыннаҕа буолуо дэһэллэр. Киэһэ буолла. Аһаабыта-сиэбитэ буолан баран ыалдьыттар киэһэ хойут тарҕастылар. Миланья ол да буоллар санаата бөҕөх. Оттон Хобороос эмээхсин айманыы, ытааһын бөҕө… «Саатар кыыһым барахсан кэргэн тахсабын диэн хоонньоһон кэбиспит, арай бырахтаҕына саат-суут, хайдах дьон сирэйин таба көрөбүт?».

Миланья икки хонон баран куоракка киирэн, Өймөкөөҥҥө барар билиэт ылан көттө. Дэриэбинэҕэ кэлэн ыйдаран ыалын булбута, киһитэ дьиэтигэр баар үһү. Олус судургутук «мин быраас кыыһы кэргэн ылар буоллум» диэбит. Миланьяны портка киллэрэн, начаалынньыгын кытта кэпсэтэн куоракка көтүппүт.

Миланья албыннаппытыттан кэлэйэн, саатан түүл-бит курдук сылдьыбыт. Тугу да өйдөөбөт. Хата уоппускатын кэмэ буолан абыраабыт. Бу 60-с сыллар бүтүүлэрэ этэ. Ыарахан буолтум буолуо диэн кэтэнии-мананыы бөҕө. Дойдутугар төттөрү тахсыан килбик, сэмэй кыыс саатыттан тахсыбатах… Муҥур уһугар тиийэн бэйэтигэр тиийинэргэ санаммыт… Түүл-бит курдук сылдьан быа-туһах көрдөөбүт. Хоспоххо ыйанаары турдаҕына дьукаах дьахтара өрүһүйбүт… Киһи быстах санааҕа киирэрэ дөбөҥ.

Оо, таптал сороҕор наһаа да тыйыскын… Миланья барахсан дьүөгэтин сүбэтинэн кытаанах санааны ылынан олох олорорго турууласпыт. Күннэр-дьыллар ааһан элэгэлдьиһэн испиттэр. Ити түбэлтэ кэнниттэн 4-5 сыл ааспытын кэннэ биир кэриэй киһитэ Миланьяны таптаан, кэргэн ылбыт. Үрдүк айыылар аһынаннар кыыс оҕону бэлэхтээбиттэр. Бачча сыл тухары тохпут хараҕын уутун кыыһынан куурдубут… Миланья үөрүүтүттэн көтүөн кыната эрэ суох. Кыыһа улаатан, төлөбүрдээх үөрэххэ үөрэнэн биир улахан тэрилтэҕэ хотун-хаан. Миланья Викторовна хас да үлэҕэ үлэлээн кыыһын үөрэттэрдэ. Ипотекаҕа киирэн дьиэлээтэ-уоттаата.

Кыыһа Күннэй нап-нарын, толору түөстээх, синньигэс бииллээх, ис киирбэх дьүһүннээх кыыс. Асчыта, тугу барытын сатыыра бэйэтин киэнэ. Оччо кырасыабай кыыһы уолаттар сүгүн сырытыннарыахтара дуо? Ким эдэр сааһыгар таптал таарымтатыгар хаарыллыбатаҕа баарай? Иннибитин тымтыктанан көрбүт суох…

Күннэй сааһа 36-та. Билигин үһүс олоҕор олорор. Эмиэ хоту дойду киһитигэр түбэһэн. Бастаан кэргэн тахсарыгар оҕолордоохпун, оҕолорбун атаҕастаан буоллаххына диэн Олегка эппэтэх быһыылаах. Олег Күннэй бастакы оҕотун Коляны атаҕастыыр, туоратар. Оҕо барахсан туох буруйдаах буолуой? Коля эбээтигэр Миланья Викторовнаҕа олорор. Устудьуон. Ол эрээри төрөппүт ийэтин ахтар, суохтуур. Дьиэтигэр төннүөн баҕарбат…

Иккис кэргэниттэн кыыһыгар Айаанаҕа сыһыана үчүгэй. Бэйэтин оҕотун уратытык тутар. Кэргэнигэр Күннэйгэ сыһыана үчүгэй. Баай-талым олоххо олороллор. Малаанньалаах Лия ис сүрэхтэриттэн истиҥник сэһэргэһэн, санааларын атастаһан, илии тутуурдаах, өттүк харалаах Малаанньа үөрэ-көтө дьиэлээтэ.

 

Харыстаана

КАРДАШЕВСКАЯ.