Доллар61.32 Евро75.65
-1 °С
Аватар пользователя admin
admin 14:27 в 11.04.20180 13

Эн хайдах ойоххунуй?

 

Бу тест “Младек” диэн болгар сурунаалыттан ылылынна. Эппиэттэргитин буукубаларынан бэлиэтээҥ.

1. Эриҥ сымыйалаабытын биллэххинэ тугу гыныаҥ этэй?

- бырастыы гыннарыам /а/;

- билбэтэх-көрбөтөх курдук туттуом /г/;

- тугу саныырбын барытын этиэм /ж/.

2. Эриҥ сыбаайбаҕыт күнүн умнан кэбиспит буоллаҕына эн...

- өһүргэнэн өргө диэри кинини кытта кэпсэппэппин /з/;

- ити датаны улахан буукубаларынан суруйан баран кини көрөр сиригэр ыйыыбын /д/;

- кинини дьэ үчүгэйдик саҥаран биэрэбин /б/.

3. Эн муостаҕын сууйан бүтээккин кытта эриҥ таһырдьаттан киирэн атаҕын таҥаһын устубакка эрэ дьиэҕэ хаамыталыыр:

- үктээбит сирдэрин бэйэтигэр сотторобун /е/;

- мин даҕаны алҕаска итинник гыныахпын сөп /и/;

- тохтотоммун атаҕын таҥаһын уһултарабын /в/.

4. Кэнники кэмҥэ эриҥ эйиэхэ олус болҕомтолоохтук, истиҥник сыһыаннаһар:

- туох буруйу оҥорбутун ыйытабын /г/:

- онон туһанаммын саҥа саҥыйахха наадыйарым туһунан туруорсабын /з/;

- мин эмиэ киниэхэ болҕомтолоохтук, истиҥник сыһыаннаһабын /б/.

5. Эрим сарсыарда үлэтигэр барарыгар пиджагар биир тимэҕэ суох этэ, дьиэтигэр тимэхтээх кэлбитэ...

- тутатына быһаарсабын /д/;

- тимэҕин тигэн ыыппатахпыттан кыбыстыам /а/;

- кыһаллыам суоҕа /ж/.

6. Ыалдьыттыы сылдьан эн бааргар эриҥ атын дьахтары кытта эрийсэр...

- сонно тутатына эрбин мөҥөн биэрэбин /и/;

- көрбөтөх-билбэтэх курдук туттабын эрээри, дьиэбитигэр тиийэн быһаарсабын /е/;

- кыалларынан ити түбэлтэни көргө-күлүүгэ кубулута сатыыбын /в/.

7. Эриҥ баттаҕа чачараабытын өйдөөн көрдүҥ...

- эрим тас көрүҥэр ити сабыдыаллаабатаҕын туһунан киниэхэ этэбин /а/;

- балыыһаҕа баран көрдөрөрүн модьуйабын /г/;

- хас этиһии аайы итинэн киирэбин /з/.

8.Эн эргэр саҥа хаалтыс бэлэхтээбиккин кини сөбүлээбэтэ...

- сонно тута кыптыйынан хаалтыһы быһыта кырыйан кэбиһэбин /и/;

- маҕаһыыҥҥа баран хаалтыһы уларытан кэл диэн тылбар киллэрэбин /б/;

- мин итинник боппуруостарга эрбинээҕэр ордук билэр-көрөр буоламмын хаалтыс киниэхэ олус барарын дакаастыыбын /д/.

9. Кэнники кэмҥэ эриҥ дьиэтигэр хойутаан, тугу эрэ атыны санаан, кыйаханан кэлэр буолла...

- салгыы ити тохтооботоҕуна арахсыахпыт туһунан сэрэтэбин /з/;

- туора сиргэ туох эрэ көччүйэрдэммиттээх буолаарай диэн бэрэбиэркэ ыытабын /г/;

- аһаҕас кэпсэтиигэ аҕала сатыыбын уонна көмөлөһөбүн /а/.

10. Эриҥ дьиҥнээх эр киһилии быһыыны оҥордо. Эн сыанабылыҥ?

- алҕас гыммыта буолуо дии саныыбын /и/;

- олус астыныам эрээри олус киһиргэтиэм суоҕа /б/;

- хайаан даҕаны чиэскэ-хайҕалга, наҕараадаҕа тиксэриэхтээхпин /в/.

Дьэ билигин очколаргытын ааҕыҥ: а, б, в – 10-нуу очко, г, д, е – 5-тии очко, ж, з, и – маннык эппиэт аайы уопсай сууматтан 5-тии очкону көҕүрэтиҥ.

Эппиэтэ:

90 очко уонна оннооҕор элбэх. Эн идеальнай ойоххун, үтүө майгылааххын, истиҥ сыһыаннааххын, болҕомтолооххун, тулуурдааххын. Эн эриҥ – дьиэ кэргэн дьиҥнээх баһылыга.

70-тан 85-кэ диэри. Эн эр киһи психологиятын олус билэҕин, санаатын табаҕын, дьиэ кэргэниҥ эйэлээх олоҕун уонна бэйэ-бэйэни өйдөһүүгүтүн араҥаччылыыгын.

45-тэн 65-кэ диэри. Эргэр син киһилии сыһыаннааххын, Ол эрээри сотору-сотору түүрэйдиигин, сороҕор букатын да буруйа суоҕун үрдүнэн “хааччыйа”. Ити майгыгын бырах!

5-тэн 40-ҥа диэри. Эргинээн соччото суох сыһыаннааххын. Эппиэттэргиттэн көстөрүнэн итиннэ эн буруйуҥ эмиэ баар. Мэлдьи, сыыһа да буолтун иһин, бэйэҥ эрэ санааҕын соҥнуугун.

0 уонна онтон кыра /”минус” бэлиэлээх эппиэт/. Арааһа эн соччо дьиҥнээхтик, чиэһинэйдик эппиэттээбэтиҥ эбэтэр эргэр кыыһыра сылдьарыҥ олус күүстээх. Баҕар олох да эрэ суох эрээри маннык буолаарай диэн быһа барыллаан эппиэттээбит буолуоххун эмиэ сөп. Оччоҕо бу тест быһыытынан саатар 50 очкону ылар буолуоххар диэри эргэ тахсыма, дьону эрэйдээмэ!

Күндү дьахталлар! Эр киһи айылҕатынан даҕаны модороон, куруубай оҥоһуулаах, быһыылаах-майгылаах. Кини ыарахан үлэҕэ, сэриигэ-кыргыһыыга, дьонун-сэргэтин араҥаччылыырга-көмүскүүргэ аналлаах. Кини сырыыта киэҥ, алтыһар дьоно-сэргэтэ элбэх, билэрэ-көрөрө, сатыыра буолунай. Дьахтар, төһө да бэйэтин үрдүктүк санаммытын үрдүнэн, ханан да эр киһини кытта тэҥнэһэр кыаҕа суох – дьиэтин иһинээҕи түбүктэн ордон дьахтар сайдар, күүһүрэр-бөҕөргүүр, өйө-санаата сайҕанар усулуобуйата суох.

Эр дьону кытта бэрт былдьаһыма! Ити эһигини абааһы көрөн дуу, сэнээн дуу этии буолбатах. Төттөрүтүн, эһигини аһынан, эһиги олоххут тубустун диэн, эһиги үөрэ-көтө сылдьаргытын көрөр баҕаттан этилиннэ.

 

Юрий МЕКУМЯНОВ.