2024 сыл. Ыам ыйын 15 күнэ. Сэттиэлэ үлэтин үһүс күнэ эбит. Дьылбыт түмүктэнэрэ 7 хонук хаалбыт. Ол аата саха Саҥа сыла саҕаланыа эмиэ 7 күн баар.
Быйыл Ньурба улууһун бары тыаларыгар Сайыны көрсүү — Дьылы атаарыыны бары кыстыктарга тэриллиэхтэрэ үһү — иллэрээ күн улуус культуураҕа салаатын үлэһиттэрэ иһитиннэрбиттэринэн. Мээрийэлэр уонна Антооновкалар чопчу оҥороллорун бигэтик билэбин — кыттыһа сылдьабын.
Ол эрээри, диирбэр тиийэбин: тыалары кытта кэпсэтэ сырыттым уонна ол улуустааҕы культуура салаатын үлэһиттэрэ дьиҥнээхтик Сайыны Көрсүү — Дьылы fтаарыы сиэрин-туомун оҥорбокко көннөрү оһуокай күннэрин оҥороору тииһэллэр эбит. Дьылы түмүктүүр-диэн дьоро бэлиэ күнү БИЛБЭТТЭР диэн өйдөөтүм. Көннөрү оһуокай дьиҥнээх саха Итэҕэлинэн Сайыны көрсүү — Дьылы түмүктээһин — Саҥа Саха Сылын көрсүү сиэрин-туомун солбуйбата биллэр. Онон хомойдум. Ол эрээри баҕар бүгүн улуус культуураҕа салаатын үлэһиттэрин кытта иккистээн көрсүөм, чопчулаатахпына сатанар.
Өйүүн били муус устар ый устата улууспут тыаларынан кэрийэ айаннаан олохтоохтору кытта кэпсэтиибит түмүгүн улуустааҕы ТЫЛ СҮБЭТИН мунньаҕар дьүүллэһиэхпит. Онтон үөрдүм. Сайын чугаһаан киһи таһырдьаттан дьиэҕэ киириэн баҕарбат күннэрэ үүнэн тураллар. Бөөлүүн күүстээх сылаас самыыр-ардах түһэн халлааммыт — һуу гынан чэпчээбит көрүҥнээх. Тиэргэн ото көҕөрөн эрэр. Тыыраакылар, хоптолор, чуускуннар лоокууттар обургулар бары кэлэн мин көрөрбөр Дьыл эрдэлээн эрэр курдук.
Бүлүү ЭБЭ мууһа улаханнык харан дьону ыксата сырытта — Дьаархаҥҥа, Антооновка нефтебаазатыгар уонна Убайааҥҥа. Күргэлэрбит түөрэ бары ууннан бүрүллэ сырыттылар. Дьобуруопалары үтүктэн 10-ча сыллааҕыта -биһиги Ньурбалар Попов БН. киирэн 60 саастаахтан үөһээ кырдьаҕас күрэхтэһээччилэр дьоҕус күрэхтэһии 10-ча көрүҥэр Бүлүү сүнньүн кырдьаҕастарын ортотугар бэртээхэй күрэхтэһиилэри тэрийэн саҕалаабыппыт. 2 сыл дьаҥҥа эрэ тохтообуппут. Быйылгы 8-сыс күрэхтэһиибит Үөһээ Бүлүүгэ бэс ыйын 8-9 күннэригэр буолуохтаах.
Үөһээ Бүлүүлэр обургулар элбэх уларытыыны киллэрдилэр. Утум сүүрүүгэ урут 5 киһи 400 м сүүрэр эбит буоллахха быйыл 6 буолан 600 м сүүрүү буолуохтаах. Сахавол диэн күрэхтэһии саҥа көрүҥүн эмиэ Үөһээ Бүлүүлэр айбыттар быһылаах — хомуур хапсаҕай курдук. Дьээбэ төбөлөөх дьоннор — ыкса ыалларбыт чугас аймахтарбыт. Атын көрүҥнэрин суруйбаппын — уһуна бэт буолуо. Кэмигэр — кытыннахпына суруйуоҕум.
Дьылы түмүктүүр биир бэртээхэй Арыылаах диэн тэрилтэ баар. Сыл аайы Оттук Дьылын түмүктүүллэр. Мин эмиэ көтүппэппин. Улууска биир чаҕылхай чулуу сахалыы тыыннаах тэрилтэ буолар. Бэс ыйын саҕаланыыта оҥоруохтара — улуус киинигэр Киирэпкэ!
Онон урааҥхай сахалар сайын чугаһаабычча күҥҥэ КӨҺҮ хаамыҥ! Эдэрдэр элбэх оҕолоноргутун отой умнубаккыт, күнүстэри түүннэри кырата ортотунан 5 оҕо туһугар түһүнэн кэбиһэҕит — саха Таҥаратын ирдэбилэ итинник буолан турар. Эһээлэр, эбээлэр, төрөппүттэр оҕолорбутун, сиэннэрбитин түөрэлэрин сахалыы үөрэтиэҕиҥ! Сахаларга — айхал! Урааҥхайдарга — уруй!
Ньурбаттан Б.Э.С.уо. 2024 сыл. Ыам ыйын 15 күнэ. Сэттиэлэ үлэтин үһүс күнэ.
