
Аҕа Баһылык А.С.Николаевка! Дьокуускай мэрэ Евгений Григорьевка!
Россия үгүс куораттарыгар олох куорат киинигэр ипподромнар хас эмэ үйэ тухары үлэлии тураллар. Куоракка “Триумф”, “Эллэй Боотур”, “Дохсун” курдук спортивнай уораҕайдар үлэлии тураллар. Манна бэккэлээтэҕинэ 4-5 тыһыынча киһи дьарыктанара, күрэхтэһэрэ буолуо. Улахан ороскуоттаах тутуулар.
Онтон Саха дьоно кулун тутар ыйтан ыкса кыһыҥҥа диэри ат сүүрүүтүн көрөбүт. Улуустарга Намҥа, Хаҥаласка, Мэҥэҕэ, Аммаҕа, Чурапчыга, Тааттаҕа, Уус-Алдаҥҥа 10-20 тыһыынча киһи мустар, үксүлэрэ сааһырбыт дьон эрэ буолбатах, дьахталлар, кыргыттар, оскуола оҕолоро бары мустан көрөллөр. Ааспыт Улуу ыһыахха Үс Хатыҥҥа 40 тыһыынча киһи мустубута – ат сүүрдүүтэ Саха сиригэр саамай тутаах, сөбүлүүр күрэхтэһиитэ буолар.
Уб. Айсен Сергеевич, Евгений Николаевич! Президеннэр, баһылыктар, мэрдэр уларыйаллар, уурайаллар, оттон Саха атын сүүрдүүтэ үйэлэргэ салҕанар. Эһиги үлэлиир кэмҥитигэр киин куораппыт ипподрома сабылыннаҕына, улахан сыыһаны оҥороҕут. Сыыһаны оҥорбот инниттэн ипподрому саҥардан оҥорор сорук турар.
Тоҕо куоракка ипподром нааданый?
— Сайын ыһыахха Үс Хатыҥҥа айанныыр проблема. Бэйэҥ массыынаҕынан бардаххына 2-3 чаастаах пробкаҕа түбэһэҕин, автобуска олордоххуна элбэх тутуурдаммаккын, киэһээ хойутаатаххына автобуска тиксибэккин.
— Үс Хатыҥҥа ыһыахха эрэ ат сүүрүүтүн көрүөххэ сөп, онтон атын сүүрүүлэри куорат киинигэр көрөр курдук – көрбөккүн. Киһи барыта барар кыаҕа суох.
— Сүүрүк сылгылары кыһын устата Үс Хатыҥҥа көрөр, туруорар, дьарыктыыр кыах суох.
— Куорат киинигэр ипподромҥа кыһыннары оҕолору, инбэлииттэри дьарыктыырга усулуобуйа толору баар, онтон оҕолорбут бу спорт көрүҥүн сөбүлээтэхтэринэ, таптаатахтарына Саха сайдар кэскилэ.
— Ат сүүрдүүтэ, ат спорда олус сыралаах, эрэйдээх, олус эппиэтинэстээх үлэ. Ыраас хааннаах, мөлүйүөнүнэн сыаналаах сылгылары граница таһыттан аҕалыы элбээн иһэр. Көрөөччүлэр ыраас хааннаах сүүрүктэр сүүрэллэрин ордороллор, кэтэһэллэр.
— Куорат киинигэр Академия территориятыгар турар, көрөргө көнө буолан олус үчүгэйдик көстөр. Айылҕа анаан оҥорбут Сайсары күөл киэргэлин ыраас хонууну – ипподрому эһэн, көтүрэн суох гынар оннугар, проект оҥорон Россияҕа биллэр ипподром оҥорон Россиятааҕы, Аан дойдутааҕы күрэхтэһиилэри тэрийэр кэм кэллэ.
Суруйдубут:
Амма улууһун
маастар-тренерэ,
Саха сирин
легендарнай мас
тардыһааччыта
А.А. БАИШЕВ.
Мэҥэ-Хаҥалас
маастар-тренерэ
В.А. ИГНАТЬЕВ,
Чурапчы улууһун тренерэ
Д.С. ОСИПОВ,
Хаҥалас улууһун тренерэ
УШНИЦКАЙ И.И.
Нам улууһун
маастар-тренерэ
С.П. ЯДРЕЕВ,
Хатастан тренер
Н.Ф. РЕЕВ,
кырдьаҕас ат баайааччы,
Нөмүгү ОПХ ат
сүүрдээччилэрин
тренеринэн үлэлээбит
М.П. СОЛОМОНОВ,
Бочуот Знага орденнар
кавалердара, Чурапчы
улууһун, республика
чемпион ыанньыксыта
Н.И. ОКОНЕШНИКОВ.
Мугудай нэһилиэгин,
Чурапчы улууһун
бочуоттаах олохтооҕо,
Саха АССР үтүөлээх
зоотехнига, “Мугудай”
сылгы заводун начальнига
А.А. ВАРЛАМОВ.