Сааһырыы боруогар үктэниэхпэр диэри кэннибин хайыһан көрдөхпүнэ уон араас омуктуун бииргэ үлэлээн, куруортарга бииргэ эйэ-дэмнээхтик сынньанан кэлбит эбиппин: саха, нуучча, эбээн, юкагир, бурят, чуваш, киргиз, узбек, чечен, армян. Төһө да тус-туһунан бэйэбит төрөөбүт төрүт тылбытынан саҥардарбыт, барыбытын биир сомоҕо гына түмэр улуу нуучча омук тыла билиһиннэрэн, бары доҕордуу илиибитин уунан биир иллээх дьиэ кэргэн буолбуппут.
Итинник этэн туран, мин олорор дьиэбэр эдэр ыал биэс-алта сыллааҕыта киргизтэр, аймахтарын дьиэлэрин куортамнаан, көһөн кэлбиттэрэ. Эдэр ыаллар үлэһиттэрэ бөҕө, көрсүө-сэмэй майгылаахтара. Уу-чуумпу олохтоох ыаллар бааллара.
Арай биир киэһэ ааным собунуога тырылыы түстэ. Ааммын аһа биэрбитим – хара бараан ис-киирбэх дьүһүннээх, көнө дьылыгыр уҥуохтаах кыысчаан турар. Нууччалыы:
– Киириэххэ син дуо? – диэтэ.
– Киир, – диэтим. Кыыһым сытыы-хотуу:
– Айгуль диэммин.
– Мин Николаевнабын, – диэтим. Билистибит.
19 эрэ саастаах эбит. Миэхэ сиэним курдук. Кэргэнэ Сали 21 саастаах, Авиагруппаҕа үлэлиир диэтэ.
– Хамнас кэлиэр диэри баһаалыста 5 тыһыынчата иэһээ эрэ, – диэтэ.
Биэрдим. Махтанан баран элэс гынан хаалла.
Биир нэдиэлэнэн ылбыт харчытын киллэрэн биэрдэ. Өссө торт астаан киллэрбит. Наһаа минньигэс торт.
– Николаевна, үтүө санааҕар махтанабын! – диэтэ.
Дьэ ити курдук түргэнник билсэн, үөрэ-көтө олоробут. Күһүөрү кыыс оҕону кылбардык оҕолонно. Оҕо таҥаһа, суута ылан биэрдим. Үөрдэ аҕай. Эмиийигэр үүт киирдин диэн собо атыылаһан биэрдим.
Кэлин «бэйэ киһитэ» буолан хаалла. Кыысчааны Сарра диэн сүрэхтээтилэр. Оҕотун олус үчүгэйдик көрөр-истэр. Кэргэнэ Сали киэһэ хойут үлэтиттэн кэлэр. Чөл олоҕу тутуһаллар. Биһиги эмиэ. Сэсиэдтэрбит чуумпулар диэн астынабыт.
Айгуль асчыт, иистэнньэҥ бөҕө. Сороҕор харчы төлөөн иистэннэрэбин. Кыыһа күн-түүн улаатан боҕорҕоно буолан иһэр, киһи таптыах. Сороҕор кыыһын көтөҕөн киирэр. Миэхэ көтөхтөрө биэрэр. Бэйэтэ ас астыыр. Мин илиим ыалдьар буолан өр кыайан көтөхпөппүн, сытыаран кэбиһэбин.
Айгуль наһаа амарах сүрэхтээх, кырдьаҕаска болҕомтолоох. Эрэ эмиэ. Хардарыта ылсан-бэрсэн, күн-дьыл ааһара түргэнэ сүрдээх. Түөрт сыл элэс гынан хаалла. Сарраҕа бырааһынньыктарга бадаарак биэрэбин. Айгуль миэхэ бэргэһэ баайан биэрбитэ. Араас бурдук аһы астаан киллэрэр. Сааһа сүүрбэ үһэ.
Наһаа муударай, өйдөөх кыыс. Экономист идэлээх. Билигин Айгуль кыракый киһини күүтэр. Миэхэ киирэн кэпсэтэр. Дьиэ үлэтигэр көмөлөһөр. Отой сиэним курдук чугастык ылынным.
Төрүүр болдьоҕо кэлэн чэпчэкитик оҕолонно. Биэс хонон таҕыста. Арадьыылкаттан кэлээт, мин ааммын собунуоктаан дьиэтигэр киирбэккэ да эрэ миэхэ киирдэ. Кэмбиэр туттардым. Үөрэн, сыллаан, кууһан ылла. «Биһиги дьүөгэлиибит» диэтэ…
Сыл – хонук. Оҕобут алта ыйа буола оҕуста. Хаарыан ыалым алта сыл курдук олорон баран, ипотеканан кыбартыыра ылан «көһөбүт» диэн икки оҕотун илдьэ киэһэ киирэ сырытта. Көһөр ыалга харчы наада буоллаҕа. Биэнсийэбиттэн биэрдим. Үөрүү бөҕө, хараҕа ууланан ылла. Эмиэ сыллаһыы-куустуһуу.
Икки омук доҕордоһуута күүстээх буолар быһыылаах. Күндүтүк саныыр эдэркээн дьүөгэм, Айгуль, дьоллоох буол!
Харыстаана КАРДАШЕВСКАЯ.
Уруһуй нейросеть (ИИ) көмөтүнэн оҥоһулунна.
