Мин суоппардаабыт түгэннэрбиттэн биири кэпсиим. Өймөкөөн совхозка үлэлии сылдьабын, олунньу ый саҥата. З
“ЗиЛ-133” массыыналаахпын, соҕотох сылдьабын, Хаандыгаттан корма тиэйэн иһэбин. Өлүү түбэлтэлээх ол истэхпинэ 67 кыраадыс тымныы буолла. Массыынам кыаммат курдук, сатахха 12 тоннаны ууруммутум.
Развилканы ааһарбын кытта кэнники икки көлүөһэм ытан кэбистэ. Хайыахпыный, ону оҥостоору онно хоннум. Нөҥүө күнүгэр оҥостон айаннаатым. “Чёрный прижимы” нэһиилэ ынчыктаан тахсан, түһүү буолла. Арай сэрэнэн түһэн истэхпинэ мотуорбар тимир таптайар тыас өрө лаһыгыраата. Тохтуур быраап суох, кыараҕаһа бэрт, суол аасыһыыта суох.
Оннук тыаһаппытынан аллараа түһэн, кэҥэс соҕус сиргэ тохтоон капоппын аһан иһиллээтим. Головкабар тыаһыыр, хаҥас өртө. Хайыахпыный, чаай өрүнэн аһаан баран, сойбут мотуорум клапан крышкатын аһан көрбүтүм клапаным “рассухарыс” буолан клапаным иһирдьэ поршневойбар түспүт.
Дьэ тымныы сүрдэнэн, киһи тыына сыыгыныыр буолан эрэр. Мат диэн баран клапаным штангаларын уһултаан, ол поршень высокайын уһулу тардан баран собуоттаатым. Хата эһиннэ, сып-сап хомунан эмиэ айаннаатым.
Киэһээ хараҥарыыта “Восточка” диэн сиргэ тиийдим. Ону ааһан эрдэхпинэ эмиэ икки көлүөһэм ытан кээстэ. Оо, онно тахсан чохчойо-чохчойо хаһыытаатым! Иһирдьэ киирэн “бостуой суоппар буоламмын, бу кэриэтин сылаас сиргэ хачыгаардаабытым буолла-ар” дии саныыбын. Таһырдьа буурҕа тыала, хаары киһи хоойугар симэр. Онно эбии тымныыта, таҥаһы-сабы курдаттыы саайар, уччуу! Аны миэхэ саппааскам суох, онон олорорбор тиийэбин. Мотуорум нэһиилэ үлэлиир, алдьаммыт тыаһа улаатан иһэр…
Ол түүн хоннум. Арай сарсыарда тибиини быһан совхоз уолаттара иһэр эбиттэр. Оо, онно үөрбүппүөн! Иккистээн төрөөбүт курдук сананным. Дьэ кэлэн көмөлөөн көлүөһэ оҥостон, таһаҕаспын биир массыынаҕа тиэнэн айаннаан дьиэбитин булбуппут. Онно икки өттүбүнэн ойоҕостотон өлө сыспытым.
Маныаха майгынныыр уустук түгэн суоппардаабытым тухары элбэх этэ. Тарыҥҥа түһүү, хайаларга хаар түһэн обвал буолан, сайын үрэхтэри кэстэрэн – барыта киһи өйүттэн сүппэт түгэннэр. Онтон кыһын “Урал” массыына коробкатын суолга устан оҥостуу эҥин баһаам…
Балыарый.
