Биирдэ тохсунньу аан-даам тымныыта түһэн турар кэмигэр тыаҕа сытабыт. Ол саҕана арыгы дэписиит этэ. Били быраага кэмэ.
Биһиги биир билээгини толору быраага көньөрдүбүт. Онтубут оҕо курдук сууланан оһох кэннигэр турар. Киирэ-тахса улахан харабыл олохтонно – мородьуордар тулуйбакка аһан кэбиһиэхтэрэ диэн.
Биир киһибитин куруускалаах үөмэн иһэрин туттубут. Дьэ бары кэчигирээн олорон сууттуубут. «Муннугар биирдии иҥнэни саайарга», – диэн судьуйабыт бириигэбэрдээтэ. Дьэ били онтубутун-мантыбытын абырахтанар иҥнэбитин эргичиҥнэтэбит. Киһибитин хас да киһи тутан турар, ону муннун иҥнэлиибит. «Иһиэҥ дуо, аны?» – дии-дии анньабыт. Киһибит мунна саллаччы иһэн таҕыста, үс иҥнэни нэһиилэ астарда. Өссө биэс киһи иҥнэлэрин анньаары бэлэм тураллар. Киһибит ааттаһар: «Табаарыстаар, аны уоран иһэрбин быраҕыам», – диир. Ону аһынан: «Чэ, аныгыскыгар эбэһээт уон иҥнэни саайыахпыт», – диибит.
Сарсыныгар дьэ киэһэ үлэни бүтэрэн баран, икки дьиэнэн мустан билээгибитин аһабыт. Аам, арыгы сыта тунуйар ээ, дьиэбитин! Киилэлээх чай иһэр куруускаҕа куттан иһэн киллиргэтэбит.
Быраага хойутуу эмискэ саайар ээ. Аһыы олорон эмискэ сүтэн хаалаҕын, быраагаҕа. Автопилотка холбонон робот курдук сылдьаҕын. Тугу гынаргын билбэккин, тугу саҥараргын анаарбаккын. Оннук буолаҕын. Киһини да өлөрүөххүн сөп, тугу-у да гынаргын билбэккин, отключись буолаҕын. Быраага оннук дьайар.
…Мин сарсыарда өйдөммүтүм ороммор сытар эбиппин. Суорҕаммын бүрүммүппүн. Дьиэбит иһэ тыбыс-тымныы. «Оо, б…т», – диэн уот оттоору турбутум – дьиэбит аана суох, биир түннүк кумаланан турар. Ала холорук ытыйбытын курдук.
Таһырдьа тахсан ааны көрдөөтүм да, булбатым. Түннүгү суорҕаммынан бүрүйдүм. Ааны сабаары биир уол суорҕанын ньылбы тардан ыллым. Киһим титирии сытар. Дьоммун барыларын туруортаатым. Бары тахсан дьиэ аанын көрдөөн, инньэ ойуур саҕатыттан буллубут. Түөрт киһи нэһиилэ көтөҕөр халҕанын хайалара бырахпыта буолла, итинник ыраах? Сөҕөн кэбистибит. Хата киһи киһини өлөрбөтөҕөр махтал.
Онтон бэртэх сэрэнэр буолбутум. Сэрэхтээх буоллаҕа, сиргэ эҥин-дьүһүн бары буолуон сөп ээ. Бары мургуттар мусталлар, тыаҕа. Мин аҕай дэммит дьон кэлэр этилэр.
Кэһэйбит КИҺИ.
