Конор Макгрегор (Conor McGregor). ММА ирландскай боеһа “Forbes” сурунаалга үрдүк рейтиннээх. UFC экс-чемпионун дохуота 180 мөлүйүөн доллар буолбут, бу биир сылга. Бу билигин үрдүү турар доллар курсунан 32 миллиард солкуобай буолар! Дьокуускай куорат сыллааҕы бюджета 30 млрд буоларын санааҥ. Кырдьыга, бу сыл дохуотун улахан аҥаарын Макгрегор “ProperNo. Twelve” виски брендин контрольнай долятын атыылаан ылбыт. Онно кини 150 мөлүйүөн доллары өлөрбүт. Өссө 8 мөлүйүөн доллары киниэхэ рекламнай контрактар аҕалбыттар. 22 мөлүйүөнү Октагоҥҥа охсуһууларга кыттан ылбыт.
Лионель Месси. Футболист Лионель Месси биир сыл иһигэр 130 мөлүйүөн доллары ылар, ол эбэтэр 24 млрд. 250 мөл. солкуобай биир сылга. Дьэ, хайдаҕый? Оттон сүүрбэччэ сыл устата сылын ахсын итиччэлиини ыллын? Баһаам харчы. Месси “Лучший бомбардир континента ФИФА” званиетын уонна “Золотая обувь” Европа наҕараадатыгар алтата претенденнээбит. Спортсмен бэйэтин таҥаһынан линиялаах уонна “MessiStore” диэн розничнай маҕаһыыннаах, онтукатын 2019 сыллаахха Барселонаҕа арыйбыт. Эбиитин кини “Adidas” брендин кытта үйэтин тухары контрактаах.
Криштиану Роналду. Криштиану Роналду – аан дойдуга биллэр футболист, “Ювентус” нападающайа. Кини сыллааҕы дохуота – 120 мөлүйүөн доллар. Улахан аҥаарын киниэхэ спонсорскай контрактар аҕалаллар. “Ювентуһу” кытта түөрт сыллаах контрага сылга 64 мөлүйүөн доллары аҕалар. Уопсайынан, карьератын тухары Роналду дохуота 1 миллиард доллартан тахса буолбут, ол эбэтэр 80 миллиард солкуобай. “Nike” брендин кытта үйэтин тухары контрактаах, онно бэйэтэ таҥас линиялаах уонна аксессуардардаах.
Дак Прескотт. Американскай футболга оонньуур “Даллас Ковбойз” хамаанда защитнига сылга 107,5 мөлүйүөн доллары өлөрөр. Спортсмен “Cowboys” хампаанньаны кытта түөрт сылга 160 мөлүйүөн доллардаах контракка илии баттаабыт, эбиитин подписной бонустаах – 66 мөлүйүөн доллар. Техаска “Walk-On” диэн түөрт рестораны арыйарыгар сорох харчытын инвестициялаабыт.
Леброн Джеймс. NBA спортсмена, “Лос-Анджелес Лейкерс” хамаанда баскетболиһа биир сыл иһигэр 96,5 мөлүйүөн доллары өлөрбүт. Ол эбэтэр 12 миллиард, 65 мөл. солкуобайы “лас” гыннарбыт. Түөрт төгүллээх MVP (“Most Valuable Player” – “Самый Ценный Игрок”) НБА Леброн Джеймс бу хамаандаҕа 2018 сыллаахтан оонньуур, түөрт сыллаах контрагын суумата – 153 мөлүйүөн доллар. Кини бэйэтэ продюсерскай хампаанньалаах (SpringHillEntertainment) уонна медиакомпаниялаах (Uninterrupted). Өссө партнёрдарын кытта Чикагоҕа уонна Хотугу Флоридаҕа “Blaze Pizza” диэн 19 франшизалаах, бэйэтэ эмиэ хампаанньа инвестора уонна спонсора.
Неймар (Neymar). 95 мөлүйүөн доллар дохуоттаах “ПСЖ” хамаанда футболиһа. Саҥа контрага эҥин араас бонустары көрөр, онтон чемпионнар Лигатын хоттоҕуна улахан эбиллии кэтэһэр. Неймар “Барселонаттан” “ПСЖ”-га көһүүтэ аан дойду үрдүнэн саамай ыарахан сыаналааҕынан ааҕыллар. Кини сууматын – 263 мөлүйүөн доллары французскай кулууп илии баттыаҕын иннинэ барытын төлөөбүт. Ол эбэтэр 48 миллиард 872 мөл. солкуобайы. “Nike Jordan” брендин контрагыттан тахсыбыт уонна “Puma” брендин кытта контракка илии баттаабыт.
Роджер Федерер. Бу теннисист дохуота биир сыл иһигэр 90 мөлүйүөн долларынан сыаналанар. Киниттэн ордук теннисистэр суох курдуктар. Федерер дохуотун улахан аҥаарын “Uniqlo” диэн японскай таҥас брендэ аҕалар. Ол бренди кытта 2018 сыллаахха уон сыллаах контракка илии баттаабыт, контрагын сууммата 300 мөлүйүөн доллар буолбут. Ол эбэтэр 54 миллиард солкуобай, оттон Сахабыт сирин сыллааҕы бюджета 300 млрд. солк. буоларын санааҥ. Теннис легендатыгар саамай элбэх хамнаһы “On” диэн спортивнай таҥас атыылыыр швейцарскай хампаанньа аҕалыан сөп.
Льюис Хэмилтон. Формула-1 “Мерседес” хамаандатын спортсмена Льюис Хэмилтон сыллааҕы хамнаһа 82 мөлүйүөн доллар. Былырыын Формула-1 титулун ылбыт уонна Михаэль Шумахер рекордун сиппит. Кини “Mercedes F1” хамаанданы кытта контрагын биир сылга уһаппыт. Билигин Хэмилтон Аан дойдуга саамай ыарахан сыанаҕа атыыланар гонщигынан ааҕыллар.
Том Брэди (Tom Brady). Том Брэди – “Тампа-БэйБакканирс” диэн американскай футбол (рэгби) хамаандатыгар оонньуур спортсмен. Сыллааҕы дохуота – 76 мөлүйүөн доллар. “TampaBay” контрагыгар илии баттаабыт. Брэди Аан дойду саамай үчүгэй защитнигынан ааҕыллар, кини “NFL MVP” үс трофейдээх уонна “ProBowl”-га 14-тэ талыллыбыт.
Кевин Дюрант. “Бруклин Нетс” хамаандатын баскетболиһын дохуота биир сыл иһигэр 75 мөлүйүөн доллар (13,3 млрд. солк.). Кинини “Форбс” сурунаалга эмиэ киллэрбиттэр. “Golden State Warriors” хамаандатыгар үс сыл оонньоон баран “Brooklyn Nets”-кэ көспүт. Бу хамаанданы кытта түөрт сыллаах контракка илии баттаабыт, контракт суумата – 164 мөлүйүөн доллар. Эбиитин Дюрант спонсордартан 40 мөлүйүөнтэн тахса доллары ылбыт.
Хаартыскаҕа: 1. Лионель Месси.
